2 Corinthians 3 - De Beebaa Dabu

De gau hai hegau o de hagatoo donu hagaheloongoi hoou

¹ E aha, gimaadeu ga aahe ange nei e tuhi gimaadeu? Be gimaadeu gu bei nei hanu dangada e llodo laa e hai hanu leda e tala hagadonu adu ai omaadeu dagodo gi goodou, aabe e gaamai i oodou daha e hagadonu ai amaadeu hegau?

² Gai go goodou donu amaadeu leda e tala hagadonu ai omaadeu dagodo, gu sisi laa i omaadeu lodo, gi iloo ai ma de daulia e dangada alodahi.

³ Gai goodou gu hagaago danuaa mai bolo goodou se leda mai i daho Klisdo, go hua o amaadeu hegau. Gai de leda nei tee sisi i denga ink aagai ne sisi i daho de Hagasaalunga o de Maadua e mouli laa, tee sisi hogi i honga denga hadu baabaa, aagai ne sisi i lodo o dangada.

⁴ Gai e dahi donu amaadeu tali hagalodolodo i lodo o Klisdo i daho de Maadua.

⁵ Gai e deai donu se hiidinga e maua ai e gimaadeu i de hagataba bolo dahi mee ne humai i omaadeu daha, gai go de Maadua ne haia ga maua mee nei.

⁶ Gai go ia ne haia gi maua e gimaadeu i de hai gi ni dangada hai hegau niio de hagatoo donu hagaheloongoi hoou. Gai de hagatoo donu hagaheloongoi tee sisi i de hainga, aagai ne sisi i daho de Hagasaalunga ⌊Dabu⌋. Gai de hainga ne sisi laa e daa ga maakau dangada, aagai de Hagasaalunga e gaamai de mouli.

⁷ Noo de mee ne hegau ne hidi mai ai laa de magau ne hoda ange laa gi honga hanu hadu ne hai i de mahamaha, gai de gau Israel tee maua i de tilo luu mada o Moses, i hiidinga o de maalama o de mahamaha laa, gai de mahamaha se mee donu ne lilo —

⁸ gai dee hee maa ai naa de laumalie ange de mahamaha hegau a de Hagasaalunga?

⁹ Gai noo ne mahamaha de hegau ne hagabaubau ai dangada, gai de hegau ne hagaheohi ai dangada e kii ange donu de mahamaha.

¹⁰ Ni muna abodonu, de mahamaha o de mee gu lilo laa e dee se mahamaha donu, i hiidinga o de mahamaha e kii ange laa de laumalie.

¹¹ Gai noo de mee gu lilo laa ne humai i de mahamaha, gai e kii ange donu de mee e dagodo laa ga hano ai de laumalie dono mahamaha.

¹² Go hiidinga e dahi amaadeu tali hagalodolodo, gimaadeu e lo taane mmao,

¹³ gai gimaadeu e dee bei dagodo o Moses, ia ne haoli luoono mada i dahi malo gi dee gidee ai e de gau Israel de mahamaha ne lilo laa.

¹⁴ Aagai de gau Israel ne hagamakaga olaadeu lodo; anailaa nei donu, gai de masavaa naa huu alaadeu e dau ai de hagatoo donu hagaheloongoi duai, gai de mee haoli laa tigi aau gee donu, i hiidinga go daho Klisdo donu huu e maua ai i de aau gee de mee laa.

¹⁵ Gai e bei donu hogi anailaa nei, de masavaa naa huu e dau ai de hainga a Moses, gai e dahi mee e haoli olaadeu lodo.

¹⁶ Gai de masavaa naa huu o tangada e dahuli ai ga hagadonusia Tagi Maolunga gai de mee haoli laa gu aau gee.

¹⁷ Gai Tagi Maolunga go de Hagasaalunga donu, gai be go hee naa huu o de Hagasaalunga o Tagi Maolunga iai, gai iai hogi de ilaage.

¹⁸ Gai gidaadeu alodahi gu aau gee laa de mee e haolia laa odaadeu mada, gu gidee de mahamaha o Tagi Maolunga, bei de hai e gidee ai laa de ada i lo te galaasa dilodilo, gai e sui ma e hagadagodo ange gi ono dagodo e hagadaga ange de mahamaha, gai de mee nei se mee mai i daho Tagi Maolunga, se Hagasaalunga laa.