2 Corinthians 13 - De Beebaa Dabu

Muna hagakana ange ma hagaboo hagaodi

¹ Deenei tolu hanonga oogu e hanadu ai gi oodou daha. “Mee alodahi e hagadonu i muna a e dogolua aabe e dogodolu dangada tala hagadonu.”

² Au gu lava i de hagakana ange gilaadeu gu haisala i mua aama de gau ange laa alodahi, i dogu masavaa e dee maleva ai i oodou daha, gilaadeu gi kana mai, bei dagu hai ne basa ange ai laa gi gilaadeu i dogu masavaa ne dae adu ai gi oodou daha i de lua hanonga: de masavaa naa huu oogu e dae adu ange ai, gai au e hagaduasala donu gilaadeu,

³ i hiidinga goodou e llodo e ssala gi iloo abodonu be go Klisdo donu e basa nei i ogu daha. Gai ia e dee baageaa donu i de hai hegau i oodou daha, aagai e mmahi mmao i oodou daha.

⁴ Gai ia ne daudau i de laagau lui i de baageaa, aagai ne mouli age i ssauaa mmahi o de Maadua. Gimaadeu e baageaa hogi bei ono dagodo, aagai e hai hegau adu gi goodou i hiidinga gimaadeu gu mouli age madali ia i ssauaa mmahi o de Maadua.

⁵ Goodou dagidiiloo iho gi danuaa oodou lodo, be goodou e daohi naa huu de gai. Hagataalea ange ma gi diiloo oodou dagodo. Goodou tigi tonu ange naa donu bolo Iesu Klisdo e noho i oodou lodo? Noo e deai, aagai goodou tee maua donu i de daohi de gai.

⁶ Au e tali bolo goodou gu gidee bolo gimaadeu ne daohi donu de gai.

⁷ Gai gimaadeu e dalodalo ange gi de Maadua goodou gi dee haia de mee dee heohi — e dee se hai gi gidee ai bolo gimaadeu gu maua abodonu, aagai se hai gi maua ai e goodou i de hai de mee heohi, e dee galemu donu noo e dagodo be gimaadeu tee maua abodonu.

⁸ Gai gimaadeu e dee maua i de hai dahi mee e hai baasi ange ai gi de mee abodonu, gai gimaadeu e bale de mee abodonu.

⁹ Go hiidinga gimaadeu e malangilangi donu i demaadeu baageaa gai goodou gu mmahi. Gai gimaadeu e dalodalo gi kii ange doodou heohi abodonu.

¹⁰ Au e sisi adu de leda nei i de masavaa oogu e dee maleva ai i oodou daha, gi dee kona ai dagu hagaduasala goodou i ssauaa gu gaamai gi de au i daho Tagi Maolunga, i de masavaa oogu e dae adu ai gi oodou daha, gai au ga hai ai gi tuu goodou gi makaga i de gai, e dee se hai e hagabaageaa ai goodou.

Hagaboo hagaodi

¹¹ Denga daina, dagu hagaboo adu gi goodou. Goodou gi heohi abodonu, goodou hagadau hagammahi ina goodou ma de nnoho hagabuni i de baba, gai de Maadua o de aloha ma de nnoho paba gi noho madali goodou.

¹² Goodou hagadau hagaboo i de oso dabu.

¹³ Dangada alodahi o de Maadua e gaavadu hogi delaadeu hagaboo gi goodou.

¹⁴ De abodonu o Iesu Klisdo Tagi Maolunga, ma de aloha o de Maadua, aama de nnoho hagabuni mai i daho de Hagasaalunga Dabu gi dagodo i oodou daha alodahi.