2 Corinthians 12 - De Beebaa Dabu

De midi hagaago ange a Paul

¹ Au e duudagi de tala tuhi au. Gai e deai donu haigamaiana dagu tuhi au, aagai au e duudagi de tuhi denga midi ma hagaago ange a Tagi Maolunga.

² Au e iloo dahi daane i lodo o Klisdo i e madaangahulu ma haa ngadau gu hulo laa, ia ne gaavage gi tolu langi. Au e dee iloo be ne gaavage i dono angaanga be deai, go de Maadua donu huu e iloo.

³ Au e iloo bolo taane nei ne gaavage gi Paradise — au e dee iloo be ia ne gaavage i dono angaanga aabe ne midi donu huu, go de Maadua donu huu e iloo —

⁴ gai ia ne langona denga mee e dee maua i de pasa ai, gai e dee alaange donu i de tala a dahi dangada daudahi.

⁵ Gai go dagodo o taane nei aagu ga tala tuhi, aagai au e dee tala tuhi ogu dagodo, gai e tala tuhi donu huu dagodo o dogu baageaa.

⁶ Gai e dee galemu donu dogu lodo e tuhi donu huu au, gai au e dee bei dagodo o dahi dangada lodo senga, go hiidinga au e tala de muna abodonu. Aagai au e dee hai de mee nei, gi deai ai se dangada e duuhia ogu dagodo gi kii ange i ana mee gu gidee ma de langona i ogu daha.

⁷ Gai gu gaamai gi de au dahi mee e hagaduasala ai gi dogu angaanga, se mee mai i daho Satan e hagaduasala ai au, gi dee lodo maolunga ai au i hiidinga o mee lagolago gu hagaago mai laa gi de au.

⁸ Ne dolu hanonga aagu ne dangidangi ange ai gi Tagi Maolunga, ia gi aaua gee de mee nei mai i ogu daha.

⁹ Aagai ia ne hai mai gi de au, “Dogu abodonu e dohu i de bale adu ai goe, gai ogu mahi e hai ga honu abodonu i doo baageaa.” Deenei ai, au e kii ange donu de malangilangi i de tala tuhi dogu baageaa, gi dagodo ai ssauaa o Klisdo i ogu daha.

¹⁰ Deenei ai, au e malangilangi donu i ogu mee e baageaa ai, ma de hagadogaa ina ai, ma hai ngadaa, ma vaivai haia, ma hagaduasala i hiidinga de ingoo o Klisdo. Go hiidinga de masavaa oogu e baageaa ai, go de masavaa donu oogu e mmahi abodonu ai.

Tee baba lodo o Paul i de gau Corinth

¹¹ Au ne basa be se dangada lodo senga! Gai go goodou donu ne hidi ai. De mee heohi, go goodou donu e duuhia ngau. Go hiidinga au e dee maolalo ange donu i dangada e hagataba naa bolo gilaadeu ni dangada tala maolunga, e dee galemu donu au se dangada e dee dau.

¹² Au ne hagaduu ngae ga hagaago adu gi goodou dagodo o tangada tala abodonu, i dogu noho i oodou magavaa, i denga hagailonga ma mee hagalele mouli aama denga sauaa mmahi.

¹³ Gai se aha aagu tee hai adu laa gi goodou, gai ne hai ange donu huu gi denga nohoanga dabu ange laa? De mee donu huu aagu tee hai, go tee hai goodou gi balea mai au i hanu sseene. Gai goodou ga degi mai ai i dogu dee heohi!

¹⁴ Gai deenei tolu hanonga oogu ne hagadabena ai e hanadu. Gai au e dee hagahai ngadaa naa donu goodou i dahi mee, go hiidinga au e dee lodo i oodou mee, gai au e lodo i goodou; e dee go denga dama e hagadanuaa ina olaadeu maadua, gai go denga maadua e hagadanuaa ina denga dama.

¹⁵ Gai au e malangilangi donu i de gaavange au ma agu mee alodahi i hiidinga o oodou hagasaalunga. Noo au e kii ange dogu aloha i goodou, gai e hai naa ga kii mai ange oodou aaloha i de au?

¹⁶ Aagai e heohi donu dagu tee hagahai ngadaa goodou i ogu hiidinga, aagai goodou e hagataba bolo au ne vaivai dagodo ga hagasenga ai goodou.

¹⁷ Gai dee hee dagu hai ne vaivai dagodo adu ai gi goodou, go de masavaa aagu ne hai ai laa hanu dangada gi loadu gi oodou daha?

¹⁸ Au ne hagammahi ange Titus gi hanadu madali dahi odaadeu daina ange laa. Gai ne vaivai dagodo adu laa Titus gi goodou? E dee ne dagodo daudahi laa donu huu omaau lodo ma amaau hegau adu gi goodou?

¹⁹ Goodou e maanadu naa bolo gimaadeu e hagaheohi adu gimaadeu? Gimaadeu e pasa adu nei i mada luu mada o de Maadua bei dagodo o dangada e seesee i lodo o Klisdo, denga daina hagamogomogo, mee nei alodahi ne hai e hagammahi ai oodou kai.

²⁰ Gai au e manavasaa i dogu dae adu gi oodou daha, ga gidee bolo oodou dagodo gu dee bei mai dogu lodo ai, gai ogu dagodo gu dee bei adu hogi oodou lodo. Au e manavasaa i dagu gidee bolo goodou e dee buni, gai e llodo gaiaa, ma de moolau de llili, ma tee anga ange gi dangada, ma de hagadau hebagi, ma de hagadau hagabaubau, ma de hai samu, ma de llodo maolunga aama hellumi.

²¹ Au e manavasaa i de hagadogaa a de Maadua ngau i dogu masavaa e ahe adu ai gi oodou daha, ma dogu dangi i hiidinga o de gau soa gu haisala laa i mua, gai tigi daahuli donu olaadeu lodo mai i alaadeu hegau hakino gee, ma de dagodo haisala, ma denga dahulinga hai be se manu.