2 Corinthians 11 - De Beebaa Dabu

Paul ma de gau tala hadu muna

¹ Au e lodo goodou gi golomagi ina oodou lodo i de au, gai au ga basa adu bei dagodo o dahi dangada lodo senga. Goodou gi dee haihaia golomagi ina oodou lodo!

² Au gu lodo gaiaa i oodou hiidinga i de lodo gaiaa o de Maadua. Au ne hagatoo donu e hai goodou go de hagababa gilimalali o dahi daane, go Klisdo.

³ Aagai au e manavasaa kana hagasengalia goodou, bei de hai a de labodo ne daahanga ai laa Eve i dono heiangi vaivai dagodo, gai oodou lodo abodonu ma de gilimalali ga daahuli gee i Klisdo.

⁴ Gai noo dahi dangada e humai ga agoago adu goodou i dahi Iesu gee ma de Iesu amaadeu gu agoago adu ai goodou, be go dahi hagasaalunga gee ma de Hagasaalunga oodou gu lava naa i de kave, aabe go dahi longo danuaa gee ma de mee oodou gu daohi naa, gai e moolau naa donu doodou daudali aagena.

⁵ Gai au e hagadaba bolo au e dee maolalo ange donu i gilaadeu e hagataba naa bolo gilaadeu ni dangada tala maolunga.

⁶ Gai ga dee maua naa donu e au i de basa i honga o dangada, gai au e dahi donu ogu iloo mee; gai gimaadeu gu lava i de hai gi tonu danuaa ange goodou gi mee nei alodahi.

⁷ E aha, au ne haisala laa i dagu hai gi maolalo au, gai gi hagaamua ina ai goodou, ma dagu dee hai goodou gi hagao ina dagu agoago adu goodou i de longo danuaa a de Maadua?

⁸ Au ne gaiaa mee a denga nohoanga dabu ange laa, i dagu kave dahi hagaoanga mai i olaadeu daha gi maua ai e au i de bale adu goodou.

⁹ Gai de masavaa oogu ne duasala ai i dogu noho i oodou daha, gai au tee hagahai ngadaa donu dahi goodou, gai go denga daina ne loomai laa i Macedonia ne balea mai au i mee alodahi oogu ne duasala ai. Deenei ai, au ne hagamade donu i mua ma iainei gi dee hagahai ngadaa ina e au dahi goodou i dahi mee.

¹⁰ Go hiidinga de mee abodonu i dagodo o Klisdo e dagodo i ogu lodo, dagu tala tuhi nei e dee maua donu i tee tala i denga ungaamee o Achaia.

¹¹ Gu aha, au tee aloha laa i goodou? Uaa, gai de Maadua e iloo bolo au e aloha donu i goodou!

¹² Gai au e duudagi naa donu huu de hai agu mee e hai nei, e hai ai gi dee maua e gilaadeu e llodo naa e tala bolo alaadeu hegau e bei donu amaadeu hegau e hai nei.

¹³ Gai de gau bee nei ni dangada tala hadu muna, gai ni dangada hai hegau e hagasengalia dangada, ma de hagadulagi ange gilaadeu gi dagodo o de gau tala o Klisdo.

¹⁴ Gai gidaadeu e dee llele donu odaadeu mouli i mee nei, go hiidinga Satan e hagadulagi ange donu hogi gi tangada de langi o de maalama.

¹⁵ Deelaa ai, e dee se mee hagalele mouli donu noo ono dangada hai hegau e hagadulagi ange gi dangada hai hegau o de heohi. Gai delaadeu hagaduasala e hai naa donu gi bei alaadeu hegau.

Denga hagaduasala o Paul

¹⁶ Au e ahe ange e hai adu, gi deai se goodou e maanadu bolo au gu lodo senga; aagai noo goodou e maanadu bee nei, gai goodou gi haia au bei dagodo o dahi dangada lodo senga, au e damaa tala tuhi hogi au.

¹⁷ (Agu muna e tala adu e dee tala adu i ssauaa o Tagi Maolunga, aagai ni muna nii dahi dangada lodo senga e tala tuhi ai ia.)

¹⁸ Go hiidinga e soa dangada e tala tuhi gilaadeu i mee o henua i lalo nei, deelaa ai, au e tala tuhi hogi au.

¹⁹ Gai goodou ne malangilangi donu i de dugu ange de gau llodo ssenga naa, gai goodou ne maanadu bolo goodou e heiangi!

²⁰ Gai goodou e dugu ange naa donu dahi dangada gi haia goodou gi ni dangada hai hegau, be e vaivai hai goodou, be dagudagu adu oodou mee e hai, be e hagamaolunga i goodou, aabe e hagailiili oodou ganomada.

²¹ Au e dogaa i de tala adu bolo gimaadeu ne baageaa i de hai mee laa! Aagai be se aha naa huu a dahi dangada e tuhi ai ia — au e basa adu nei bei dagodo o tangada lodo senga — gai au e maua hogi i de tuhi ai au.

²² Noo gilaadeu ni dangada Hebrew, gai au se dangada Hebrew hogi. Noo gilaadeu ni dangada Israel, gai ai se dangada Israel hogi. Noo gilaadeu ni hagadiilinga niio Abraham, gai au se hagadiilinga hogi niio Abraham.

²³ Noo gilaadeu ni dangada hai hegau niio Klisdo, gai au e danuaa ange donu i gilaadeu — au e basa adu bei dagodo o dahi dangada senga. Agu hegau e maolunga ange, gai ne lagolago ange ogu hanonga ne tili ange ai gi lo te hale pono, gai e dee maua i de dau ogu hanonga ne hagailiilihia ai, ne dee modu dogu duu ange gi de magau.

²⁴ Ne lima ogu hanonga ne hagailiilihia ai i daho de gau Ssuu, i de hagaili e dagimadahaa laa hanonga, aagai ne matolu ma siva ogu hanonga ne hagailiilia ai.

²⁵ Ne dolu ogu hanonga ne hagailiilihia ai i denga laagau, gai ne dahi ogu hanonga ne magaa ina ai i denga hadu. E dolu hanonga ne maoha ai de vaga oogu ne hano ai, gai e dahi boo ma e dahi laangi oogu ne dahedahea ai i de moana.

²⁶ Dogu hagadaga saele i hanonga lagolago, gai au ne duu ange gi mee hagamanavasaa i honga denga saalingaa vai, ma daho de gau gaiaa, ma daho ogu dangada donu, ma mee hagamanavasaa i daho denga Gentile, ma mee hagamanavasaa i lo te aduhale, ma de vao, ma honga tai, ma daho dangada e dee ni daina abodonu;

²⁷ ma de kona agu hegau e hai ma de hai ngadaa, ma tee seni i boo lagolago, ma de hiigai ma de hieunu, ma tee modu teai agu gai, ma teai sogu mommee e noho ai aama teai ogu malo.

²⁸ Gai e hanu ange mee laa daha mee nei, go tee baba ogu lodo i dagu maanadu dagodo o denga nohoanga dabu alodahi.

²⁹ Goai ne baageaa laa, gai au tee baageaa madali ia? Gai goai ne ahe dua laa, gai au tee daemaha ogu lodo?

³⁰ Noo au e tala tuhi dahi mee, gai au gi duuhia mee e hagaago danuaa mai ai laa dogu baageaa.

³¹ Gai de Maadua ma Tamana o Tagi Maolunga go Iesu, e heohi laa taadeu tuhi ga hano ai, e iloo bolo au e dee hadu muna donu.

³² Dogu masavaa nogo i Damascus ai gai de goobenaa i lalo o de hodooligi go Aretas ne hai hanu gi dagidiiloo de haitoga o de aduhale gi boogia ai au.

³³ Aagai hanu ne hagasege iho au i lo te gede i dahi haitoga damaa mee i de baasi de buibui o de aduhale, gai au gu ola mai i gilaadeu.