2 Corinthians 1 - De Beebaa Dabu

De hagaboo

¹ Mai i daho Paul, tangada tala o Klisdo Iesu, bei dagodo de hagatau a de Maadua, aama taadeu daina go Timothy. Ange gi de nohoanga dabu o de Maadua i Corinth, aama dangada alodahi o de Maadua i Achaia.

² De abodonu ma de baba mai i daho de Maadua taadeu Damana, aama mai i daho Tagi Maolunga go Iesu Klisdo gi dagodo i oodou daha.

De Maadua o de hagaaneane

³ Duuhia de Maadua ma Tamana o Iesu Klisdo taadeu Dagi Maolunga, gai go Tamana o de abodonu ma de Maadua e hagaaneane ina lodo alodahi.

⁴ Ia ne hagaaneane gimaau i omaau daemaha alodahi, gi maua ai hogi e gimaau i de hagaaneane lodo o dangada e daemaha laa, bei de hai a de Maadua gu hagaaneane mai ai gimaau.

⁵ Gimaau gu dau hogi i de hagaduasala laumalie madali Klisdo, deelaa ai, gimaau gu kave hogi de hagaaneane laumalie i daho Klisdo.

⁶ Noo gimaau gu duasala, gai ne hai e hagaaneane ai hogi ma de hagamouli ai goodou; noo gimaau gu hagaaneane ina omaau lodo, gai goodou e hagaaneane ai naa hogi, gi lodo mmahi ai goodou i de golomagi lodo i doodou hagaduasala ina bei omaau dagodo.

⁷ Gai demaau tali hagalodolodo i oodou hiidinga e dee ngalungalue donu, go hiidinga demaau iloo bolo goodou e hagaduasala hogi madali gimaau, aama de hagaaneane ina oodou lodo madali gimaau.

⁸ Denga daina, gimaau e llodo goodou gi iloo dagodo o omaau hagaduasala i Asia; gimaau ne kona iho i omaau hagaduasala, gai ne dubu ange donu i amaau mee ne mau i de hagauda; gimaau ne maanadu bolo gimaau e maakau naa donu.

⁹ Ni muna abodonu, gimaau ne langona iho donu bolo gimaau e tuu ange donu gi de magau. Aagai de mee nei se hai gi dee tali hagalodolodo ange ai gimaau gi omaau mahi donu huu, aagai gi tali hagalodolodo ange gi de Maadua e hagamouli ina age laa de gau maakau.

¹⁰ Ia ne hagaola gimaau mai i de hai ngadaa hagamaakau laa, gai ia e duudagi naa donu huu de hagaola gimaau. Gai gimaau e tali hagalodolodo bolo ia e ahe ange naa donu ga hagaola gimaau.

¹¹ Gai goodou balea mai hogi gimaau i talodalo, gi soa ai dangada e hagaahe ange de abodonu, i hiidinga de manuuia gu gaamai nei gi gimaau i de dalodalo o dangada soa.

De sui hagatau a Paul

¹² Gai deenei demaau mee e tala tuhi ai, ma de tala hagadonu o tagi i omaau lodo: bolo gimaau ne hai hegau i de mee heohi i henua i lalo ma adu hogi gi goodou, i de lodo se muna abodonu, gai e dee se mee ne hai i de heiangi o henua i lalo, aagai mai i de abodonu o de Maadua.

¹³ Gai e deai ange donu amaau mee e sisi adu gi goodou, gai go mee donu huu oodou e maua i de dau ga tonu ange aagena. Gai au e tali bolo goodou e tonu ange abodonu gi mee nei,

¹⁴ bei doodou hai gu tonu ange ai naa, gai goodou e tonu ange donu gi hanu omaau dagodo, gai goodou ga tala tuhi ai hogi gimaau bei demaau tala tuhi oodou dagodo, i de laangi o Tagi Maolunga go Iesu.

¹⁵ Gai deenei dagu mee gu iloo abodonu; deelaa ai, au ne hagatau e hanadu gi oodou daha i taamada, gi lua ai hanonga e haigamaiana adu ai gi goodou.

¹⁶ Au ne hagatau e hanadu laa oodou daha, i dogu masavaa e hano ai gi Macedonia, ma de ahe mai gi oodou daha i dogu ahe mai i Macedonia, gai goodou ga bale mai ai au i dogu hano gi Judea.

¹⁷ E aha, au ne lodo lagolago laa i de masavaa aagu ne hai ai de hagatau nei? Aabe au ne hai dagu hagatau bei dagodo hagatau o henua i lalo; au e hagadaba “Uaa, uaa” gai e “Deai, deai” i de hanonga daudahi?

¹⁸ Gai e bei de hai hegau o de Maadua i de muna abodonu, amaau muna adu gi goodou tee hai adu bolo “uaa” gai e “deai” hogi.

¹⁹ Gai Tama Daane a de Maadua, go Iesu Klisdo, amaadeu ma Silvanus ma Timothy gu agoago ai laa i oodou magavaa, e dee hai adu “uaa” gai e “deai,” aagai masavaa alodahi e “uaa” i ono lodo.

²⁰ Gai denga hagatoo donu alodahi a de Maadua se “Uaa” i daho Klisdo. Deenei de hiidinga adaadeu e hagataba ai laa “Amen” i dono ingoo, gi hagamahamaha ina ai de Maadua.

²¹ Aagai go de Maadua ne hagalodo mmahi ina gimaadeu madali goodou i lodo o Klisdo, ga hagadabu gidaadeu

²² ma de maaga gidaadeu i dono hagailonga, i dana gaamai dono Hagasaalunga gi noho i odaadeu lodo e hagadonu ai mee e loomai.

²³ Gai au e hagahi ange de Maadua gi daalaa hagadonu, bolo au tee ahe adu gi Corinth gi dee hagadaemaha ai goodou.

²⁴ Go hiidinga e dee go gimaadeu e huahua i oodou kai, aagai gimaadeu e hai hegau madali goodou gi malangilangi ai goodou, go hiidinga go de gai oodou e tuu ai ga makaga.