2 Chronicles 4 - De Beebaa Dabu

Goloa ange gi de temple

¹ Ia ne hagaduu dahi mommee o ssigidaumaha i bronze, se madalua sugilima de looloa, gai e madalua sugilima de lahalaha, gai se madaangahulu sugilima tuuduu.

² Ia ne hagavaivai hogi hanu baalanga ga hai ai dahi daaba moe; se madaangahulu sugilima mai i de hiihii i dahi baasi gi de hiihii i de baasi gee, gai se lima sugilima tuuduu. Gai de haidenga o taaba laa ga holiage ai se matolu sugilima.

³ Gai lalo de hiihii o taaba laa e maaga ange ada o hanu kaau ma e holiage ai, gai e madaangahulu kaau ange gi dahi sugilima. Gai e lua hagataaunga o denga kaau laa e maaga ange gi taaba laa.

⁴ Gai taaba laa e duu i honga e madaangahulu ma lua kaau, e dolu e huuhuli gi ngaiho, e dolu e huuhuli gi dai, e dolu e huuhuli gi ngaage, gai e dolu e huuhuli gi dua. Taaba e duu i olaadeu elunga, gai muli o denga manu laa i lalo taaba.

⁵ Gai de maadolu o taaba laa se dahi ianga; de hiihii e bei de hiihii o de ubu, gai e bei hogi de huaala o de lilii. Gai se dolumano bath e hhao ai.

⁶ Ia ne hai hogi e madaangahulu beisini nnui e hagagilimalali ai, ga dugu e lima i de baasi madau, gai e lima i de baasi masui. Gai go lodo beisini nei e hagagilimalali ai mee e hai ai ssigidaumaha dudu, gai taaba laa se mee e hagagilimalali ai de gau haimeedabu.

⁷ Ia ne hai hogi e madaangahulu mee dugu laama i goolo bei de hai gu hagaago ange ai laa, ga hagatuu i lo te temple, e lima i de baasi madau, gai e lima i de baasi masui.

⁸ E madaangahulu hogi ana deebele ne hai ga dugu i lo te temple, e lima i de baasi madau, gai e lima i de baasi masui. Ia ne hai hogi e lau beisini i goolo.

⁹ Ia ne hai hogi dahi mommee buibui moo de gau haimeedabu, ma dahi mommee buibui laumalie ma ono haitoga, ga haoli olaadeu abaaba i denga bronze.

¹⁰ Gai ia ne hagaduu taaba laa i tege gi ngaage i de bido gi dua.

¹¹ Huram ne hai hogi denga anibada, ma savolo, aama beisini. Ia ne hai ga lava hegau alodahi a de hodooligi go Solomon ne lodo ia gi haia ange gi de hale o de Maadua:

¹² luu duludulu laa; mee be ni boolo i ulu luu duludulu laa; luu gaini e hagalaagii ai laa luu mee be ni boolo i denga duludulu;

¹³ de haalau pomegranate ange gi gaini e lua laa (e lua hagataaunga i dahi gaini, e hagalaagii ai denga mee be ni boolo i ulu luu duludulu laa);

¹⁴ denga hada ma denga beisini;

¹⁵ taaba, ma de madaangahulu ma lua kaau i ono lalo laa;

¹⁶ denga anibada, ma savolo, ma poogo, ma goloa alodahi. Goloa alodahi a Huram-Abi ne hai maa de hodooligi go Solomon ange gi de hale o Tagi Maolunga, ne hai i bronze hagamalamalama.

¹⁷ Gai de hodooligi ne hagavaivai denga bronze, ga hai ai mee laa alodahi i de geelonga i gaogao Jordan, se mommee iai bela pigi i magavaa o Succoth ma Zeredah.

¹⁸ Solomon ne hai ga lagolago mmao mee nei, deelaa ai, taemaha o denga bronze ne hai ai mee laa tee maua donu gi iloo.

¹⁹ Gai Solomon ne hai hogi goloa alodahi i lo te hale o de Maadua: go de mommee o ssigidaumaha goolo; denga deebele e dugu ai pelaoaa i Mada Luoono Mada;

²⁰ denga mee dugu laama ma olaadeu laama i goolo danuaa, e haula ai gi ula i mada i mua o de aabi e mua gi lodo, bei de hai gu tala ange ai;

²¹ denga huaala, ma laama, ma igohi ne hai i goolo hagamogomogo;

²² denga mee diinei laama, ma beisini, ma gumedi o mee maanongi, ma mee e hhao ai maga ahi ne hai hogi i goolo hagamogomogo; denga abaaba o de Aabi Dabu mmao, ma abaaba o de aabi e mua gi daha ne hai hogi i goolo.