2 Chronicles 3 - De Beebaa Dabu

De hagaduu a Solomon de temple

¹ Dua mee nei gai Solomon ne daamada de hagaduu age de hale o Tagi Maolunga i Jerusalem, i honga de mounga go Moriah, de mommee o Tagi Maolunga ne hakide ange ai laa gi dono damana go David, go de mommee a David gu hagailonga i de mommee hili huamanu o Araunah taane Jebus.

² Ia ne daamada de hagaduu i de lua malama o de haa ngadau oona ne hodooligi ai.

³ Aanei haidenga ne gaavange gi Solomon e hagaduu ai de hale o de Maadua: e madaono sugilima de looloa, gai e madalua sugilima de lahalaha (ia ne haide i de haidenga i mua).

⁴ De velanda i ma te hale e madalua sugilima de looloa, bei de lahalaha o de hale, gai se madalua sugilima tuuduu. Gai ia ne haoli ono lodo i goolo hagamogomogo.

⁵ Ia ne haoli lo te aabi e mua gi daha i laagau cypress, ga haoli i goolo hagamogomogo, ma de hagalaagii i denga palm ma seeini ga hagalaagii.

⁶ Ia ne hagalaagii lo te hale i denga hadu hagamogomogo ma goolo mai i Parvaim.

⁷ Ia ne haoli denga dogai, ma laagau o de haitoga, ma lo te hale, ma ono abaaba i goolo, ma de maaga ange denga cherubim gi luu baasi i lodo.

⁸ Ia ne hai de Aabi Dabu mmao gi looloa bei de lahalaha o de hale; se madalua sugilima de looloa ma de lahalaha. Gai ia ne haoli laa lodo i e onolau talent goolo hagamogomogo.

⁹ Gai taemaha o goolo ne hai ai denga neele se madalima shekel. Ia ne haoli hogi lodo aabi e mua gi lunga i goolo.

¹⁰ Gai lo te Aabi Dabu mmao laa iai e lua cherubim ne hagaduu i denga laagau ga haoli i goolo.

¹¹ Bakau o luu cherubim laa ngaadahi se madalua sugilima. De bakau o dahi cherub laa se lima sugilima, gai e hano ma e duu ange gi de baasi de hale, gai de bakau ange laa e hano ma e duu ange gi dahi bakau o cherub ange laa;

¹² de bakau o de cherub ange laa se lima hogi sugilima de looloa, gai e hano ma e duu ange gi de baasi de hale, dono bakau ange laa se lima hogi sugilima, gai e hano ma e duu ange gi dahi bakau o cherub ange laa.

¹³ Bakau o luu cherubim laa ngaadahi se madalua sugilima i de doha gi daha. Luu cherubim laa e tuu ma e huuhuli ange gi de aabi laumalie o de hale.

¹⁴ Ia ne hai hogi dahi malo buibui i malo buluu ma de purple ma de mmea, aama linen danuaa, ga maaga ange hanu cherubim aagena.

Luu duludulu bronze

¹⁵ Ia ne hai hogi e lua duludulu ga hagatuu i ma te hale, dahi duludulu laa se matolu ma lima sugilima tuuduu, gai de mee hagalaagii i ulu o dahi duludulu laa se lima sugilima.

¹⁶ Ia ne hai hogi e lua seeini ga dau ange gi honga mee i ulu luu duludulu laa, e lau pomegranate ne hagabigibigi ange gi luu seeini laa.

¹⁷ Gai ia ne hagatuu age luu duludulu laa i ma te haitoga o de temple, dahi i baasi ngaage gai dahi i baasi ngaiho. De ingoo o tuludulu i baasi ngaage go Jakin, gai de ingoo o tuludulu i baasi ngaiho go Boaz.