1 Timothy 5 - De Beebaa Dabu

Agoago ange gi de nohoanga dabu alodahi

¹ Aude hagaseegina taane e madua ange i de goe, aagai koe balea ange ia gi bei dagodo o doo damana. Gai koe haia denga dama daane bei dau hai e hai ai laa dahi oo daina daane,

² gai haia denga haahine maatua gi bei oo dinana donu, gai denga damaa hine gi bei oo daina haahine donu, i de gilimalali alodahi.

³ Hagadubu ina denga haahine gu maakau olaadeu bodu gai gu duasala abodonu laa.

⁴ Aagai noo de hine gu magau dono bodu, gai e hanu ana dama aabe ni mogobuna, gai gilaadeu gi hai hegau i de hagadubu ina i mua i lodo olaadeu huaabodu donu, ma de sui ange hegau danuaa a olaadeu maadua, go hiidinga de mee nei se mee e hagamalangilangi ina de Maadua.

⁵ De hine gu magau dono bodu gai e duasala abodonu, aagai e deai dangada e balea ange ia, dana tali hagalodolodo go de Maadua, gai ia e duudagi tangidangi ange gi de Maadua i de laangi ma de boo.

⁶ Aagai de hine gu magau dono bodu gai e hagamalangilangi donu huu ia gu magau donu, e dee galemu donu ia goi mouli huu.

⁷ Agoagona ange hogi gilaadeu i muna nei, gi dee haisala ai gilaadeu.

⁸ Aagai noo tangada e dee hagadanuaa ono dangada donu, go dangada i dono huaabodu, gai ia e hagangadi mee dono gai, gai ia e kii ange de baubau i tangada tigi hagadonusia laa.

⁹ Gai de hine gu magau laa dono bodu e dee sisi dono ingoo ga dae ai gi de madaono ono ngadau aabe e kii ange, gai ia ne dahi donu huu ono bodu,

¹⁰ gai se hine gu iloo abodonu ana hegau danuaa — ia ne agoago danuaa ana dama, ma de abodonu ange gi dangada i dono hale, ma de hhui vae o dangada o de Maadua, ma de bale ange gilaadeu e hai ngadaa, aama de hagaduu ngae i denga hagadaagangaa hegau danuaa alodahi.

¹¹ Aagai koe gi dee daohia ingoo o denga haahine gu maakau laa olaadeu bodu gai goi dama daane huu. Go hiidinga de masavaa naa huu o lodo o de angaanga e hagadaahuli gee ai gilaadeu i Klisdo, gai gilaadeu gu llodo e hai bodu.

¹² Gai gilaadeu gu hagaduasala i delaadeu oha de hagatoo donu alaadeu ne hai i taamada.

¹³ E dahi ange mee, gilaadeu gu ngadi nnoho, ma de hagadaga saele i hale o dangada ga hai samu ai ma de baatai, aama de tala mee e dee heohi delaadeu tala.

¹⁴ Deenei ai, au e maanadu bolo denga haahine gu maakau olaadeu bodu goi dama daane laa gi aahe ange gi hai bodu, ga haanau hanu dama, ma de tilo ange olaadeu huaabodu, gi dee maua ai e de hagadaumee i de hagabaubau gidaadeu.

¹⁵ Gai gu hanu donu haahine gu aahe dua ma gu daudali ange i Satan.

¹⁶ Gai noo dahi hine gu hagadonusia laa, e hanu haahine gu maakau olaadeu bodu i dono huaabodu, gai ia gi diiloo ange gilaadeu; gai gi dee dugua ange go de nohoanga dabu e diiloo ange gilaadeu, gi maua ai de nohoanga dabu i de bale ange denga haahine gu maakau olaadeu bodu gu duasala abodonu laa.

¹⁷ Denga dagi e kana ange laa i alaadeu hegau, gi laumalie ange delaadeu hagadubu, gai go gilaadeu donu e daalaa ma de agoagona muna a de Maadua e kii ange delaadeu hagadubu.

¹⁸ Go hiidinga e hagadaba de Beebaa Dabu, “Aude noodia de ngudu o de kaau i dana masavaa e duuduu ai denga grain,” gai “Tangada hai hegau e heohi donu de kave dono hagaoanga.”

¹⁹ Aude anga ange gi de hagabaubau ina o dahi dagi noo tigi dogolua, aabe dogodolu dangada ne gidee dana hai mee laa.

²⁰ Gai koe hagaseegina gilaadeu e aheahe ange ma e haisala i madamada o dangada alodahi, gi maatagu ai de gau ange laa.

²¹ Au e hai adu gi de goe i mada luu mada o de Maadua ma Klisdo Iesu aama de gau de langi gu hili laa, koe gi daohia muna nei, gai koe gi dee vae dangada, aabe gi hilihili dangada.

²² Aude hagamoolau gi hagadabu ina dahi dangada, aabe gi hagabuni ange gi dahi gi haisala ai. Koe gi gilimalali oo dagodo.

²³ Aude unumia donu huu vai, aagai unumia hanu momo uvaini e bale adu ai doo dinae aama oo magi e dee modu naa de magi ai.

²⁴ Haisala o hanu dangada e iloo danuaa donu, gai e dagi ange gilaadeu gi de hagamodu olaadeu muna, aagai haisala o hanu e iloo naa i muli mai.

²⁵ Gai e bei ai hogi, hegau danuaa a hanu e iloo danuaa donu; aagai hegau danuaa tigi iloo laa e dee maua donu i de hagammuni.