1 Timothy 4 - De Beebaa Dabu

De gau agoago hadu muna

¹ Gai de Hagasaalunga ⌊Dabu⌋ gu tala bolo hanu e daahuli gee naa i de gai i laangi hagaodi, gai gilaadeu ga daudali i lodo o hagasaalunga hadu muna aama de agoago i daho denga hagasaalunga baubau.

² Gai agoago nei e loomai i daho de gau hadu muna, go gilaadeu gu maaga tagi i olaadeu lodo i de baalanga ula.

³ Gilaadeu e hai naa dangada gi dee hai bodu, ma de hai gilaadeu gi dee gaina gai a de Maadua gu hai e gai dangada, gai ni mee niilaadeu e hagadonusia ma de iloo de muna abodonu e hagaahe ange ai de abodonu.

⁴ Mee alodahi a de Maadua ne hai e danuaa, gai e deai donu se mee daudahi tili gee, noo gidaadeu e kave ma de hagaahe ange ai de abodonu,

⁵ go hiidinga gu hagadabu i muna a de Maadua ma talodalo.

Tangada hai hegau abodonu o Iesu Klisdo

⁶ Noo koe e tala ange mee nei gi denga daina, gai koe gu se dangada hai hegau danuaa niio Klisdo Iesu, koe gu agoago abodonu i muna o de gai, ma agoago danuaa oou e daudali ai naa.

⁷ Gai koe gi dee anga ange gi denga ngadi daalanga e dee bei lodo o de Maadua, ma ngadi daalanga a denga haahine madumaatua. Aagai koe agoago i de hai lodo o de Maadua;

⁸ go hiidinga de agoago ga hagaabo de angaanga e hanu ono haigamaiana, aagai de hai lodo o de Maadua e haigamaiana ange gi mee alodahi, go hiidinga go kilaa iai de hagatoo donu ange gi de mouli nei aama de mouli e humai.

⁹ Muna nei ni muna abodonu gai e heohi taadeu daohi.

¹⁰ Gai deenei taadeu mee e hai hegau ange ma de hagammahi ange aagena, go hiidinga taadeu tali hagalodolodo go daho de Maadua e mouli laa iai, go de Ia Hagamouli o dangada alodahi, gai ange donu gi gilaadeu e hagadonusia.

¹¹ Koe gi daalaa ange aama de agoago ange dangada i mee nei.

¹² Gai koe gi dee dugua ange dahi dangada gi hagangadi mee ina goe i hiidinga koe goi gauligi huu, gai koe gi se hagaago danuaa ange gi gilaadeu e hagadonusia, i au muna, ma au ngalungalue, ma doo aloha, ma doo gai, aama doo gilimalali.

¹³ Gai koe gi kana ange daulia muna o de Beebaa Dabu i madamada o dangada, ma de tala muna nei ga agoago ai, ga dae ai gi dogu dae adu.

¹⁴ Koe gi dee hagangadi mee ina tuuhanga gu gaavadu naa gi de goe i muna pelaabisi i denga masavaa a denga dagi ne dugu adu ai olaadeu lima gi oo elunga.

¹⁵ Koe gi kana ange gi haia mee nei, gai hagaduu ngae hai hegau ange aagena, gi gidee ai e dangada alodahi doo hagadagadaga age i mee nei.

¹⁶ Koe gi dagidiiloo iho oo dagodo aama dagodo o au mee e agoago. Koe gi lodo mmahi i de hai mee nei, go hiidinga noo koe e hai mee nei, aagai koe gu hagamouli goe aama gilaadeu e hagalaangona au muna.