1 Timothy 2 - De Beebaa Dabu

De hai e daumaha ai

¹ I mua mee alodahi gai au e hagammahi adu goodou gi dangidangi, ma de dalodalo, ma de hagabuni ga dalodalo ga hagaahe ange de abodonu i hiidinga o dangada alodahi —

² ma denga hodooligi, ma gilaadeu iai ssauaa e dagi ai, gi maua ai e gidaadeu i de nnoho paba ma de duadonu, i taadeu hai lodo o de Maadua, aama de hagadubu alodahi.

³ De mee nei se mee danuaa, gai e hagamalangilangi i mada luu mada o de Maadua taadeu Ia Hagamouli.

⁴ Gai ia e lodo mmao dangada alodahi gi hagamouli, aama de iloo de muna abodonu.

⁵ E dahi donu huu Maadua, gai e dahi donu huu hogi Dangada e hano i magavaa o de Maadua ma dangada, go tangada go Klisdo Iesu,

⁶ go de ia ne gaavange dono mouli e hagaola ai dangada alodahi — de mee nei ne gaamai e hagadonu ai de hagamouli a de Maadua dangada, i de masavaa heohi.

⁷ Deenei de hiidinga oogu ne hilia ai nei gi se dangada agoago, gai gi se dangada tala — au e tala adu de muna abodonu, au e dee hadu muna — gai se dangada e agoagona ange denga Gentile i de gai ma de mee abodonu.

⁸ Au e lodo denga daane i mommee alodahi gi haalo ina olaadeu lima dabu gi dalodalo ai, gilaadeu gi dee lili aabe gi hagadaumee.

⁹ Gai e bei ai hogi, denga haahine gi kahu i malo e heohi i delaadeu kahu ai, gilaadeu gi daudonu ma de dahulinga danuaa; e dee go de bini olaadeu biho, ma de dau mee goolo, ma ango aabe go malo hagao ngadaa,

¹⁰ aagai gilaadeu gi dahulinga danuaa, go mee e heohi i hai a denga hine e hagataba laa, bolo gilaadeu ni dangada e daumaha ange gi de Maadua.

¹¹ De hine gi daudonu i dono masavaa e agoagona ai ma de hagadubu.

¹² Au e dee dugu ange de hine gi agoago aabe gi gaavee ssauaa e dagi ai taane; aagai ia gi noho gi dee muu.

¹³ I hiidinga go Adam ne hai i mua gai muli mai go Eve.

¹⁴ Gai e dee go Adam ne daahangadia, aagai go de hine ne daahangadia gai ia gu haisala.

¹⁵ Aagai de hine e hagamouli i de haanau denga dama — noo gilaadeu e duudagi de daohi de gai ma de aloha, ma de dabu aama de lodo maolalo.