1 Timothy 1 - De Beebaa Dabu

De hagaboo

¹ Mai i daho Paul, tangada tala o Klisdo Iesu bei de hagamodu a de Maadua, taadeu Ia Hagamouli ma Klisdo Iesu taadeu tali hagalodolodo.

² Ange gi Timothy, dagu dama abodonu i de gai. De abodonu ma tegi aama de baba mai i daho de Maadua Tamana ma Klisdo Iesu taadeu Dagi Maolunga.

De hagakana ange i de gau agoago hadu muna

³ Au ne hai goe gi noho i Ephesus, i dogu masavaa ne hano ai gi Macedonia, gai koe ga hai ai gilaadeu e agoago i hanu agoago gee gi dee agoago ai,

⁴ gilaadeu gi dee anga ange gi denga daalanga hhadu ma hagatau o denga atangada. Mee nei e hai gi dee buni dangada, e dee bale ange hegau a de Maadua e daamada mai laa i de gai.

⁵ De hagaodi o muna nei go de aloha, e daamada mai laa i de lodo e gilimalali ma tagi o de lodo e danuaa aama de gai abodonu.

⁶ Hanu gu hulo gee mai i mee nei, gai ga daudali ange i hanu ngadi muna;

⁷ gilaadeu e llodo e hai gi ni dangada e agoagona de hainga, gai gilaadeu e dee tonu ange gi alaadeu mee e tala, aabe go mee alaadeu e tala hagadonu.

⁸ Gai gidaadeu e iloo bolo denga hainga e danuaa, noo tangada e hai hegau ai i de heohi.

⁹ Gidaadeu e iloo hogi bolo de hainga tee hai ange gi gilaadeu e heohi, aagai ne hai ange gi gilaadeu e oohaa de hainga ma gilaadeu e hai baasi ange aagena, ma de gau baubau, ma gilaadeu e haisala, ma gilaadeu e hakino gee, ma de hagangadi mee de Maadua, ma gilaadeu e daia ga maakau olaadeu maadua, ma gilaadeu e daia dangada ga maakau,

¹⁰ ma gilaadeu e dagodo haisala, ma denga daane e dagodo haisala madali denga daane, ma gilaadeu e hagao ina dangada gi daha, ma de gau hadu muna, ma dangada e oohaa alaadeu hagatoo donu, aama de hai mee alodahi e hai baasi ange laa gi denga agoago heohi,

¹¹ bei dagodo muna o de longo danuaa mahamaha a de Maadua e heohi laa taadeu tuhi, go mee ne gaamai gi de au.

De abodonu o de Maadua ange gi a Paul

¹² Au e hagaahe ange de abodonu gi Klisdo Iesu taadeu Dagi Maolunga, go de ia ne hagammahi ina ogu lodo, ia ne hagabinga bolo au se daane e hai hegau i de mee abodonu, ga hili au gi haia ana hegau.

¹³ I mua gai au se dangada e basa baubau i de ia, ma de vaivai hai dangada ma de alasala. Gai de Maadua ne lodo aloha mai gi de au, i hiidinga au ne hai mee nei i dogu dee donu ma tee hagadonusia.

¹⁴ Gai tegi laumalie o taadeu Dagi Maolunga ne gaamai gi de au i de gai ma de aloha i daho Klisdo Iesu.

¹⁵ Muna nei ni muna abodonu gai e heohi taadeu daohi, bolo Klisdo Iesu ne humai gi henua i lalo e hagamouli ai de gau haisala, gai go au hugadoo e haisala i dangada alodahi.

¹⁶ Gai deenei de hiidinga aagu gu kave ai tegi nei, e hagaago mai ai i ogu daha de kona de golomagi lodo o Klisdo Iesu, gai de mee nei ne hagaago ange gi gilaadeu gu dai hagadonusia ia, gai gilaadeu ga kave ai de mouli e dee ngado mai, gai go au hugadoo e haisala i dangada.

¹⁷ De Hodooligi e mouli laa ga hano ai, ia e deai donu se magau, gai e dee maua gi gidee i ganomada o dangada, gai go ia de Maadua abodonu. Hagadubulia ma de hagamahamaha ina ia ga hano ai e dee ngado mai. Amen.

¹⁸ Timothy, dagu dama, au e tala adu gi de goe de mee nei, bei dagodo o muna pelaabisi gu tala ai oo dagodo i mua. Gai koe ga daudali ai gi maua ai e goe i de hebagi i de hebagi danuaa,

¹⁹ aama de daohi de gai ma tagi o de lodo e dee haisala laa. Hanu gu tili mee nei, gai olaadeu kai gu maoha bei dagodo o de vaga gu maoha laa.

²⁰ Hymenaeus ma Alexander ni dangada gu dagodo bee nei, gai au gu dugu ange gilaau gi Satan, gi dee hagangadi mee ina ai e gilaau de Maadua.