1 Thessalonians 5 - De Beebaa Dabu

Dagitilo de dae mai de laangi o Tagi Maolunga

¹ Denga daina, e deai haigamaiana demaadeu sisi adu gi goodou dagodo o denga masavaa ma laangi e hai ai mee nei.

² Goodou gu iloo donu bolo de laangi o Tagi Maolunga e humai ai e bei naa dagodo o tangada gaiaa e humai laa i lo te boo.

³ De masavaa a dangada e hagataba ai, “Gu nnoho paba dangada ma tee manavasaa,” gai gu moolau donu de dae mai de hagaduasala, bei dagodo o de hai hagalangona o de hine gu dai haanau, aagai e deai donu e maua i de saavini e hulo gee.

⁴ Aagai goodou, denga daina, e dee nnoho i lo te gohu, gai goodou ga llele ai oodou mouli i de dae mai o de laangi laa, bei dagodo o de humai o tangada gaiaa.

⁵ Goodou alodahi ni dama nii de maalama aama de laangi. Gidaadeu e dee ni dangada niio de boo aabe niio de gohu.

⁶ Deenei ai, gidaadeu gi dee bei dagodo o hanu, go gilaadeu e sseni, aagai gidaadeu gi dagitilo ma de hagamadaala.

⁷ Gilaadeu e sseni e sseni i de boo; gai gilaadeu e unu ga ssenga e unu ga ssenga i de boo.

⁸ Aagai go hiidinga gidaadeu ni dangada niio de laangi, gidaadeu ga dagitilo, ga hagauda de gai ma de aloha bei de mee dau i hadahada, aama de goobai go de tali hagalodolodo ange gi de hagamouli.

⁹ De Maadua tee hili gidaadeu e hagaduasala i dono bole, aagai ne hili gidaadeu gi hagamouli i daho taadeu Dagi Maolunga go Iesu Klisdo.

¹⁰ Ia ne magau i odaadeu hiidinga, gai e dee hilihili be gidaadeu e mouli aabe e maakau, gai gidaadeu alodahi e nnoho madali ia.

¹¹ Deenei ai, goodou hagadau hagaaneane ina oodou lodo aama de hagadau bale i de tuu gi makaga, bei oodou dagodo iainei.

Muna hagaodi

¹² Denga daina, gimaadeu e dangidangi adu goodou gi hagadubulia gilaadeu e hagaduu ngae ma e hai hegau i oodou magavaa, ma de dagi goodou i lodo o Tagi Maolunga aama de agoago adu goodou.

¹³ Gai gi kii ange doodou hagadubu gilaadeu ma de aaloha i gilaadeu, i hiidinga o alaadeu hegau. Gai goodou gi nnoho hagabuni i de baba.

¹⁴ Denga daina, gimaadeu e dangidangi adu goodou gi agoagona ange gilaadeu e vaiduu, ma de hagaaneane ange gilaadeu e daemaha olaadeu lodo, aama de bale ange gilaadeu e baageaa, gai golomagi ina oodou lodo i dangada alodahi.

¹⁵ Goodou dagidiiloo gi dee suuia ange e goodou de baubau i de baubau, aagai gi dee helui doodou hagadau hai tanuaa i oodou magavaa, aama ange hogi gi dangada alodahi.

¹⁶ Goodou gi malangilangi i masavaa alodahi,

¹⁷ gai gi dee helui doodou dalodalo,

¹⁸ ma de hagaahe ange de abodonu i mee alodahi; go hiidinga aanei donu lodo o de Maadua i lodo o Klisdo Iesu.

¹⁹ Goodou gi dee buibuia de Hagasaalunga ⌊Dabu⌋,

²⁰ gai goodou aude hagangadi mee ina agoago i de basa pelaabisi,

²¹ aagai hagataalea ange mee alodahi; gai daohi mee danuaa.

²² Goodou dilia denga hagadaagangaa mee baubau alodahi.

²³ De Maadua o de baba gi haia gi dabu abodonu goodou. Gai oodou hagasaalunga ma oodou lodo aama oodou angaanga alodahi gi gilimalali, i de masavaa o taadeu Dagi Maolunga go Iesu Klisdo e humai ai.

²⁴ Gai de ia ne hagahia goodou e hagasula naa donu de mee nei, i hiidinga ia e hai hegau i de muna abodonu.

²⁵ Denga daina, goodou dalodalo i gimaadeu.

²⁶ Dagu hagaboo ange gi denga daina alodahi i de oso dabu.

²⁷ Au e tala adu gi goodou i ssauaa o Tagi Maolunga, goodou daulia ange de leda nei gi denga daina alodahi.

²⁸ De abodonu o taadeu Dagi Maolunga go Iesu Klisdo gi dagodo i oodou daha.