1 Thessalonians 4 - De Beebaa Dabu

De mouli o de Maadua e malangilangi ai

¹ Aanei amaadeu muna hagaodi: denga daina, gimaadeu e iloo bolo goodou e hagamalangilangi donu de Maadua i oodou mouli, gai gimaadeu e dangidangi adu gi goodou i hiidinga o taadeu Dagi Maolunga go Iesu Klisdo, goodou haia gi kii ange doodou hai de mee nei, bei de hai amaadeu gu agoago adu ai goodou.

² Goodou gu iloo denga agoago amaadeu gu agoago adu ai goodou i de ingoo o Tagi Maolunga go Iesu.

³ Gai aanei lodo o de Maadua, go doodou hai gi dabu goodou, goodou dilia de hai be se manu,

⁴ gai dahi ma dahi gi maua e ia i de daohi dono angaanga gi gilimalali ma de hagadubu.

⁵ Goodou gi dee hai hegau i denga lodo haisala i oodou lodo bei dagodo o denga Gentile, go dangada e dee iloo e gilaadeu de Maadua.

⁶ Gai gi deai se goodou e haisala ange gi dono daina i de mee nei, go hiidinga Tagi Maolunga e hagao ange donu tangada e haia mee nei hugadoo, bei de hai amaadeu gu tala adu ai gi goodou, aama de agoago adu ai goodou i mua.

⁷ Gai de Maadua tee hagahi gidaadeu gi haia mee hakino gee, gai ia ne hagahi gidaadeu gi hai hegau i tagodo e dabu.

⁸ Deenei ai, tangada e hagangadi mee ina hainga nei e dee hagangadi mee dangada, gai ia e hagangadi mee donu de Maadua, go de ia ne gaavadu gi goodou dono Hagasaalunga Dabu.

⁹ Gai e deai haigamaiana demaadeu sisi adu gi goodou dagodo o de hagadau aaloha o denga daina, go hiidinga gu lava donu i doodou agoago i daho de Maadua doodou hai e hagadau aaloha ai.

¹⁰ Gai goodou e aaloha donu i denga daina alodahi i Macedonia. Aagai gimaadeu e dangidangi adu goodou, denga daina, gi haia gi hagadagadaga age oodou aaloha.

¹¹ Aagai goodou haia gi dee lagolago oodou muna e tala; gai kana iho mage diiloo oodou dagodo aama de hai hegau bei demaadeu hai gu agoago adu ai goodou.

¹² Noo goodou e hai mee nei, gai goodou e hagadubulia ai naa i daho olaadeu e dee hagadonusia, aagai goodou e dee duasala hogi i dahi mee.

De ahe mai o Tagi Maolunga

¹³ Denga daina, gimaadeu e llodo goodou gi tonu ange gi dagodo o de gau maakau, gi dee hinangalosaa ai goodou bei dagodo dangada e deai selaadeu tali.

¹⁴ Gai go hiidinga gidaadeu e hagadonusia bolo Iesu ne magau, gai gu mouli age ange, aagai gidaadeu e hagadonusia hogi bolo de Maadua e gaamai donu hogi madali Iesu gilaadeu ne maakau laa i ono lodo.

¹⁵ Gai gimaadeu e tala adu de mee nei, bei dagodo muna a Tagi Maolunga, bolo gidaadeu e mouli laa ga dae ai gi de laangi o Tagi Maolunga e humai ai, e dee hulo naa donu i mua o dangada gu maakau laa.

¹⁶ Gai Tagi Maolunga e hano iho naa donu i de langi ma de oo i de leo mmahi, madali de leo o tangada de langi maolunga aama de ili o de trumpet a de Maadua. Gai de gau maakau ne hagadonusia laa e mouli age naa i mua.

¹⁷ Aagai gidaadeu goi mouli laa e gaavage naa madali gilaadeu i lo te giliiga, ga hedae ange ai gi Tagi Maolunga i lo te langi i lunga, gai gidaadeu ga nnoho ai i daho Tagi Maolunga ga hano ai.

¹⁸ Deenei ai, goodou hagadau hagaaneane i muna nei.