1 Thessalonians 3 - De Beebaa Dabu

¹ Gai ga dee maua huu e gimaadeu i de golomagi demaadeu hinangalosaa i goodou, gai gimaadeu ne maanadu bolo e danuaa demaau nnoho i Athens,

² gai ga hai taadeu daina go Timothy gi hanadu gi oodou daha, ia se dangada hai hegau hogi niio de Maadua ange gi de longo danuaa o Klisdo madali gimaadeu, gai ia ga hagammahi adu ai goodou ma de hai gi lo taane goodou i oodou kai,

³ gi deai ai se goodou e baageaa i hiidinga o denga vaivai haia nei. Gai goodou e iloo bolo denga vaivai haia nei ni mee donu gu hagamodu e hai mai gi gidaadeu.

⁴ Gai gimaadeu gu tala adu donu hogi mee nei i de masavaa omaadeu nogo nnoho ai i oodou daha, bolo gidaadeu e vaivai haia naa. Gai gu hai donu mee nei, bei doodou hai e iloo ai naa.

⁵ Deenei ai, ga dee maua huu e au i de golomagi ogu lodo, gai au ga hai Timothy gi hanadu gi oodou daha, gi iloo ai e au dagodo o oodou kai. Au ne manavasaa i dagu maanadu bolo de ia hagatale gu hagatale goodou, gai amaadeu hegau gu deai donu haigamaiana.

Dagodo kai ma aaloha o de gau Thessalonica

⁶ Iainei gai Timothy gu ahe mai donu ma gu dae mai gi omaadeu daha, gai ia gu tala mai dagodo o oodou kai aama oodou aaloha. Ia gu tala mai hogi bolo goodou goi manadua mai huu gimaadeu, ma de llodo mmao e tilo gimaadeu, bei demaadeu hai e llodo ai nei hogi e tilo goodou.

⁷ Deenei ai, denga daina, oodou kai gu hagaaneane hogi omaadeu lodo i omaadeu vaivai haia alodahi aama omaadeu daemaha.

⁸ Gai gimaadeu gu mouli donu noo goodou e tuu ma e makaga i lodo o Tagi Maolunga.

⁹ Gai dee hee ai demaadeu hai e hagadohu ai de hagaahe ange de abodonu gi de Maadua, i hiidinga demaadeu malangilangi i mada luu mada o taadeu Maadua i oodou hiidinga?

¹⁰ Gai gimaadeu e hagaduu ngae e dalodalo i de laangi ma de boo gi maua e gidaadeu i de hedae ange, gai gimaadeu ga hagadohu ai mee tigi dohu i oodou kai.

¹¹ Deenei ai, de Maadua taadeu Damana, aama taadeu Dagi Maolunga go Iesu gi dagina demaadeu haiava e loadu ai gi oodou daha!

¹² Tagi Maolunga gi haia gi kii ange doodou hagadau aaloha aama doodou aaloha ange gi dangada ange laa, bei tagodo demaadeu aaloha i goodou,

¹³ gai ia ga hagammahi ai oodou lodo, ga hai gi odi ange danuaa oodou dagodo, gai goodou gu dabu i mada luu mada o de Maadua taadeu Damana, i de humai o taadeu Dagi Maolunga go Iesu madali ono dangada dabu alodahi.