1 Thessalonians 2 - De Beebaa Dabu

Hegau a Paul i Thessalonica

¹ Denga daina, goodou e iloo bolo e dee se ngadi mee demaadeu loadu ga nnoho i oodou magavaa.

² Gai goodou ne iloo hogi dagodo o demaadeu vaivai haia aama de hagadookaa ina i Philippi i mua demaadeu loadu gi oodou daha. Gai de Maadua ne gaamai gi gimaadeu de lo taane i de tala adu de longo danuaa gi goodou, e dee galemu de soa dangada e buibuia amaadeu hegau.

³ Gai demaadeu hagakana ange adu goodou tee hai i de mee e dee heohi, aabe gimaadeu ne hagatale de hagasenga goodou;

⁴ aagai ne hai bei de hai a de Maadua ne gaamai ai gi gimaadeu de longo danuaa. Deelaa ai, gimaadeu tee tala mee nei e hagamalangilangi ai dangada, aagai ne tala e hagamalangilangi ai de Maadua, go de ia e hagataalea dagodo maanadu i odaadeu lodo.

⁵ Goodou e iloo bolo gimaadeu tee hagasegesege adu donu goodou i amaadeu muna, be ne hagasenga goodou gi dee iloo ai e goodou demaadeu nnoo hagamau mee — go de Maadua demaadeu dangada tala hagadonu.

⁶ Gimaadeu e dee ssala hogi de tuhi mai i daho dangada, e dee go de tuhi mai i oodou daha, aabe go mai i daho hanu dangada gee. Gai gimaadeu ne maua i de kave de bale mai i oodou daha i hiidinga gimaadeu ni dangada tala niio Klisdo.

⁷ Aagai gimaadeu ne nnoho daudonu i oodou magavaa bei dagodo o tinana e haelea laa ma de tilo ange ana dama.

⁸ Gimaadeu e aloha mmao i goodou, deelaa ai, gimaadeu tee malangilangi donu huu i de gaavadu gi goodou de longo danuaa a de Maadua, aagai go omaadeu mouli hogi.

⁹ Denga daina, goodou manadua demaadeu hagaduu ngae ga hai hegau i oodou magavaa! Gai gimaadeu ne hai hegau i de boo ma de laangi gi dee hagadaemaha ina ai e gimaadeu dahi goodou i de masavaa amaadeu e tala adu ai de longo danuaa a de Maadua gi goodou.

¹⁰ Gai goodou go omaadeu dangada tala hagadonu, gai e bei ai hogi de Maadua, bolo gimaadeu ne hai hegau i de dabu ma de heohi, aama de gilimalali adu gi goodou e hagadonusia.

¹¹ Goodou e iloo hogi bolo gimaadeu ne hai hegau adu gi goodou bei dagodo o tamana ange gi ana dama;

¹² gimaadeu ne hagakana ange goodou, ma de hagaaneane aama de hagammahi adu goodou gi mouli bei dagodo e heohi ange laa gi de Maadua, ne hagahia ange goodou gi dono nohoanga hodooligi ma dono mahamaha.

¹³ Gimaadeu e hagaahe ange hogi de abodonu gi de Maadua i masavaa alodahi, go hiidinga de masavaa oodou ne kave ai muna a de Maadua oodou ne langona laa i omaadeu daha, gai goodou tee kave bei dagodo muna a dangada, aagai ne kave bei ono dagodo donu, go muna a de Maadua, gai gu hai hegau i lodo o oodou gu hagadonusia laa.

¹⁴ Denga daina, goodou gu bei dagodo o denga nohoanga dabu o de Maadua i lodo o Klisdo Iesu i Judea. Goodou ne vaivai haia hogi i daho dangada doodou henua, bei delaadeu hai ne vaivai haia ai i daho de gau Ssuu,

¹⁵ aanei hogi gilaadeu ne daia ga magau Tagi Maolunga go Iesu ma denga pelaabisi, aama de alualu gimaadeu gi hulo. Gilaadeu tee hagamalangilangi de Maadua, aama de hai baasi ange gi dangada alodahi!

¹⁶ De gau nei ne hagammahi donu ga buibui gimaadeu gi dee agoagona ange denga Gentile, gi dee hagamouli ai gilaadeu. Gai gilaadeu e hai gi kii ange de hoohonu olaadeu haisala i delaadeu hai mee nei. Gai de bole ⌊o de Maadua⌋ gu duu ange donu gi gilaadeu iainei!

De lodo o Paul e tilo de gau Thessalonica

¹⁷ Denga daina, gimaadeu gu vvae gee mai i goodou i dahi damaa masavaa — gai go omaadeu angaanga donu huu, e dee go amaadeu maanadu — gai gu kii ange donu demaadeu llodo e tilo goodou, i hiidinga demaadeu hinangalosaa i goodou.

¹⁸ Gai gimaadeu ne llodo mmao e loadu gi oodou daha. Gai au donu gu hagatale de ahe adu gi oodou daha i hanonga lagolago, gai Satan e buibui gimaadeu.

¹⁹ E aha, e dee go goodou demaadeu tali hagalodolodo, ma demaadeu malangilangi, aama omaadeu hau hodooligi e hagamahamaha ai i mada luu mada o taadeu Dagi Maolunga go Iesu i dono ahe mai?

²⁰ Uaa, go goodou donu demaadeu mahamaha aama demaadeu malangilangi!