1 Peter 5 - De Beebaa Dabu

Dagi o ssiibi a de Maadua

¹ Au e hagakana ange denga dagi o de nohoanga dabu i oodou magavaa, i hiidinga au gu se dagi hogi bei olaadeu dagodo, gai se dangada ne gidee de hagaduasala o Klisdo, gai e kave naa hogi de mahamaha gu dai hagaago mai laa:

² goodou diiloo ange de hagabuulingaa ssiibi a de Maadua i oodou daha naa, ma de hai hegau gi bei dagodo o denga dagi abodonu, e dee go hiidinga donu huu se hegau gu gaavadu goodou gi haia, aagai go hiidinga doodou malangilangi i de hai lodo o de Maadua; e dee go hiidinga goodou e kave dahi hagaoanga, aagai go hiidinga goodou e llodo abodonu.

³ Goodou gi dee ni dagi bei gilaadeu e dagudagu ina ange dangada i olaadeu lalo, gai goodou gi ni mee hagaago danuaa ange gi denga ssiibi.

⁴ Gai de masavaa naa huu o Tagi o de gau hagaloosi e hagasula mai ai, gai goodou e kave donu de hau mahamaha e dee maua laa gi mmae.

⁵ E bei ai hogi goodou denga dama daane, goodou hagallongo ange gi denga daane maatua. Gai goodou alodahi gi hagadau hagamaolalo i oodou magavaa, go hiidinga “De Maadua e hai baasi ange gi gilaadeu e llodo maolunga, aagai e abodonu ange gi gilaadeu e llodo maolalo.”

⁶ Deenei ai, goodou gi hagamaolalo i lalo de lima sauaa o de Maadua, gai ia ga hagaamua ai goodou i de masavaa heohi.

⁷ Gaavange mee alodahi oodou e manavasaa ai ia gi hagauda ina, i hiidinga ia e tilo danuaa adu goodou.

⁸ Goodou gi hagamadaala ga dagitilo; go hiidinga doodou hagadaumee, go de ia hagabaubau, e seesee saele bei de laiono e haganngolo laa i dana masavaa e ssala dahi manu e holo.

⁹ Goodou hai baasi ange gi de ia ma de tuu gi makaga i de gai, i doodou iloo bolo oodou daina i henua i lalo alodahi e hagaduasala hogi bei oodou dagodo.

¹⁰ Gai dua naa huu doodou hagaduasala i dahi damaa masavaa, gai de Maadua o de abodonu alodahi, ne hagahia adu goodou gi gaavee dono mahamaha e deai laa se ngado i lodo o Klisdo, gi hagaieiangi ina goodou ma de hai gi mmahi goodou, gi maua ai e goodou i de tuu gi makaga.

¹¹ Gidaadeu gi duuhia dono sauaa ga hano ai e dee ngado mai. Amen.

Hagaboo hagaodi

¹² Gai go Silvanus, de ia aagu e hagabinga laa bolo se daina e hai hegau i de mee abodonu, ne balea mai au ga sisi ai de leda bodobodo nei. Au ne lodo e hagammahi adu goodou ma de tala adu bolo deenei donu de abodonu o de Maadua. Goodou tuu gi makaga i de mee nei.

¹³ De hine i Babylon, go de ia ne hili laa bei oodou dagodo, e gaavadu dana hagaboo gi goodou, aama dagu dama hogi go Mark.

¹⁴ Goodou hagadau hagaboo ma de hagadau oso i de hagadau aaloha. De baba gi dagodo i oodou daha alodahi i lodo o Klisdo.