1 Peter 4 - De Beebaa Dabu

De sui hagahoou

¹ Deenei ai, go hiidinga Klisdo gu lava donu i de hagaduasala i de angaanga nei, oodou maanadu gi bei hogi ana maanadu, go hiidinga tangada gu hagaduasala i de angaanga nei gu tuu dono haisala.

² Gai dono masavaa e mouli ai i de angaanga nei, gai ia gu dee hai lodo o de angaanga, aagai gu hai lodo o de Maadua.

³ Gu odi de masavaa e hai hegau ai bei denga Gentile — go de hai denga dahulinga baubau, ma lodo o de angaanga, ma de unu gi senga, ma de hai daonga e unu ai ga ssenga dangada ma de hagalongaa, aama de daumaha ange gi denga diinonga hakino gee.

⁴ Gai iainei gilaadeu gu llele mouli i doodou dee hagabuni ma gilaadeu e hai ai denga dahulinga baubau, gai gilaadeu gu hagabaubau goodou.

⁵ Aagai gilaadeu e tala ange naa dagodo o alaadeu hegau alodahi, gi de ia gu baba ange laa e hagamodu muna o dangada goi mouli laa ma gilaadeu gu maakau.

⁶ Aanei hiidinga ne agoago ange ai laa de longo danuaa gi gilaadeu e maakau iainei, gi maua ai i de hagamodu olaadeu muna i de angaanga nei, aagai olaadeu hagasaalunga gu mouli ange gi de Maadua.

Duuhanga mai i daho de Maadua

⁷ De hagaodi o mee alodahi gu baa mai donu. Deenei ai, goodou gi mada ala ma de dagitilo ga dalodalo.

⁸ Gai de mee hagamogomogo hugadoo, go doodou hagadau aaloha, go hiidinga de aloha e haoli denga haisala lagolago.

⁹ Goodou hagadau abodonu ange gi dangada i oodou hale, gai gi dee nnanu.

¹⁰ Dahi ma dahi gi hagahai hegau ina tuuhanga gu gaavange gi de ia, e bale ange ai de gau ange laa, bei dagodo o tangada e hagahai hegau ina denga hagadaagangaa duuhanga mai i de abodonu o de Maadua.

¹¹ Noo dahi dangada e agoago, gai ia gi daalaa muna a de Maadua. Noo tangada se dangada e balea ange dangada, gai ia gi haia mee nei i mahi a de Maadua gu gaavange gi de ia, gai gi duuhia ai de Maadua i mee alodahi i daho Iesu Klisdo. Gai go ia e bau ange gi de kave taadeu tuhi ma de mahamaha ma ssauaa ga hano ai e dee ngado mai. Amen.

De vaivai haia i hiidinga o Klisdo

¹² Ogu soa hagamogomogo, goodou gi dee llele oodou mouli i de tuu adu denga hagaduasala hagammae gi goodou e hagatale ai goodou, ga maanadu bolo hanu mee e dee heohi de hai gu tuu adu gi goodou.

¹³ Aagai goodou malangilangi i doodou hagauda de hagaduasala madali Klisdo, gai gi malangilangi ai hogi goodou ma de llodo danuaa i de masavaa oona e hagasula mai ai i dono mahamaha.

¹⁴ Noo goodou e hagadookaa ina i hiidinga de ingoo o Klisdo, gai goodou gu manuuia, go hiidinga de Hagasaalunga o de mahamaha, e bei go de Hagasaalunga o de Maadua, e noho i oodou elunga.

¹⁵ Aagai gi deai se goodou e hagaduasala i hiidinga ia se dangada e daia dangada gi maakau, be se dangada gaiaa, be se dangada e haia mee dee heohi, aabe se dangada badai.

¹⁶ Gai noo dahi dangada gu hagaduasala i hiidinga dana hagadonusia de ingoo o Klisdo, gai ia gi dee dogaa, aagai ia gi duuhia de Maadua i hiidinga ia e hagauda de ingoo laa.

¹⁷ Gai gu dae mai de masavaa e daamada ai de hagamodu muna o dangada o de Maadua; gai noo de hagamodu muna e daamada i gidaadeu, gai aahee ai naa dagodo o dangada e dee hagallongo ange gi de longo danuaa a de Maadua?

¹⁸ Gai “Noo e hai ngadaa de hagamouli o tangada heohi, gai aahee ai naa dagodo o tangada baubau ma tangada haisala?”

¹⁹ Deenei ai, gilaadeu e hagaduasala ina laa bei dagodo de hagatau a de Maadua, gi haia de mee heohi ma de dugu ange olaadeu hagasaalunga gi de ia ne haia gilaadeu, ia e hai hegau i de mee heohi.