1 Peter 2 - De Beebaa Dabu

De hadu mouli ma de huaahenua dabu

¹ Deenei ai, goodou dilia denga maanadu baubau alodahi, ma de hagasenga alodahi, ma de daahanga dangada, ma de magiaa, aama de hai samu alodahi.

² Goodou gi bei dagodo o denga gaagaa, e llodo laa i vai uu o de baasi gi de hagasaalunga e dee hilo laa i hanu mee gee, gi maatua abodonu ai goodou ma de hagamouli,

³ go hiidinga goodou gu mami ange ma de iloo bolo Tagi Maolunga e abodonu.

⁴ Goodou loomai gi de ia, go ia de hadu e mouli laa — ne tili gee laa i daho dangada, aagai de Maadua ne hili ia ga hai gi se hadu hagamogomogo —

⁵ gai e bei ai hogi oodou dagodo, goodou go de hadu e mouli laa, e hagaduu ai laa de hale daumaha i de baasi gi de hagasaalunga, e hai ai de gau haimeedabu dabu, gai goodou ga hai ai denga sigidaumaha i de baasi gi de hagasaalunga, e hagamalangilangi ina de Maadua i hiidinga o Iesu Klisdo.

⁶ Go hiidinga e hagadaba de Beebaa Dabu: “Tilo, au e hagaduu dahi hadu i Zion, go tuludulu hagamogomogo i tege ne hili laa, gai be goai e hagadonusia ia e dee hagadogaa ina donu.”

⁷ Deenei ai, de hadu nei e hagamogomogo adu gi goodou e hagadonusia, aagai ange gi gilaadeu e dee hagadonusia, “De hadu a de gau hagatuu hale ne hagangadi mee laa gu hai go de hadu i tege,”

⁸ gai “se hadu e hagalaavea vae o dangada gai se hadu e haia ga baakuu gilaadeu.” Gilaadeu e baakuu naa i hiidinga delaadeu dee daudali i de muna — bei de hai gu hagamodu ange ai laa gi gilaadeu.

⁹ Aagai goodou se huaadangada gu lava i de hili, goodou ni dangada haimeedabu niio de Hodooligi, se huaahenua dabu, gai se huaadangada hagamogomogo niio de Maadua, gai goodou ga tuhi ai de ia ne hagahia goodou, ma de hagassao mai goodou i lo te gohu, ga gaamai gi de maalama danuaa mmao.

¹⁰ I mua gai goodou e dee se huaahenua, aagai iainei goodou go de huaahenua o de Maadua; i mua gai goodou tee kave tegi o de Maadua, aagai iainei goodou gu kave hogi dono degi.

¹¹ Ogu daina hagamogomogo, au e hagammahi adu goodou e nnoho gaainga ma de mavaevae saele, gi dilia lodo haisala o de angaanga, go mee e hai baasi ange laa gi oodou hagasaalunga.

¹² Gai goodou gi dahulinga danuaa i magavaa o denga Gentile, e dee galemu donu delaadeu tala bolo goodou e hai de baubau, gai ga gidee naa huu e gilaadeu oodou hegau danuaa, gai gilaadeu ga tuhi de Maadua i dono laangi e humai ai.

Hagallongo ange gi denga dagi

¹³ Goodou hagadubu ina denga dagi o dangada alodahi, i hiidinga o Tagi Maolunga: e dee hilihili be se hodooligi maolunga,

¹⁴ be go denga goobenaa, go hiidinga de Maadua ne gaamai gilaadeu gi hagaduasala ina dangada e haia mee dee heohi, gai ga tuhi dangada e haia de mee heohi.

¹⁵ Gai de Maadua e lodo goodou gi haia tanuaa, gai goodou ga hai ai gi dee maua e gilaadeu e llodo ssenga i de tala hanu ngadi muna.

¹⁶ Goodou mouli bei dagodo o dangada e ilaage, aagai goodou gi dee hagahai hegau ina oodou ilaage gi hagamuunia ai oodou hegau baubau, gai gi mouli bei dagodo o de gau hai hegau o de Maadua.

¹⁷ Goodou hagadubu ina dangada alodahi: aaloha ange gi denga daina ange laa, madagu i de Maadua, gai hagadubu ina de hodooligi maolunga.

¹⁸ De gau hai hegau, goodou daudali i muna a oodou dangada aamua, ma de hagadubu gilaadeu, gai e dee ange donu huu gi gilaadeu e danuaa ma de abodonu, aagai ange hogi gi gilaadeu e vaivai haia goodou.

¹⁹ Gai se manuuia donu niio tangada, noo ia e golomagi ono lodo i dono hagaduasala ina, gai tigi haisala donu, i hiidinga ia e maanadu lodo o de Maadua.

²⁰ Aagai e heohi donu de tuhi a dangada goodou, noo goodou e golomagi oodou lodo i doodou hagaduasala, i hiidinga o oodou hegau baubau? Aagai noo goodou e golomagi oodou lodo i doodou hagaduasala, i hiidinga doodou hai tanuaa, gai de Maadua e malangilangi i goodou.

Klisdo, taadeu hagaago danuaa

²¹ Gai deenei donu doodou mee ne hagahi ange aagena, go hiidinga Klisdo ne hagaduasala hogi i oodou hiidinga, gai ia gu gaavadu ai gi goodou dahi hagaago danuaa, gai goodou ga daudali ange ai i de ia.

²² “Ia tee haisala donu, ia tee tala hogi dahi muna hagasenga i dono ngudu.”

²³ Gai de masavaa a dangada ne pasa baubau ai i de ia, aagai ia tee sui ange donu alaadeu muna; dono masavaa ne hagaduasala ai, aagai ia tee hagadaba bolo ia e sui ange alaadeu hegau. Aagai ia ne dugu ange mee alodahi gi de ia e hagamodu ina dagodo o mee alodahi i de heohi.

²⁴ Ia ne hagauda odaadeu haisala i dono angaanga i honga de laagau lui, gi deai ai se sauaa o de haisala e dagi ai gidaadeu, aagai gidaadeu gu mouli i de mee heohi. Gai ono mee lagolagohia gu hagaieiangi goodou.

²⁵ I mua gai goodou e bei denga ssiibi gu ssenga saele laa, aagai iainei goodou gu aahe mai gi de Ia Hagaloosi ma de ia e hagaloosi ina oodou hagasaalunga.