1 Peter 1 - De Beebaa Dabu

De hagaboo

¹ Mai i daho Peter, tangada tala o Iesu Klisdo. Ange gi dangada a de Maadua gu hili, gai gu mavaevae saele i denga ungaamee o Pontus, ma Galatia, ma Cappadocia, ma Asia, aama Bithynia,

² go dangada ne hili bei dagodo de iloo mee o de Maadua Tamana, gai gu hai gi se huaadangada dabu i ssauaa o de Hagasaalunga ⌊Dabu⌋, gai gi hagallongo ange ai gilaadeu gi Iesu Klisdo ma de hagagilimalali i ono dodo: Gi laumalie de abodonu ma de baba i oodou daha.

De tali hagalodolodo abodonu

³ Gidaadeu ga tuhi de Maadua ma Tamana o taadeu Dagi Maolunga go Iesu Klisdo! Ia ne hai gi maua e gidaadeu de aahe ange e haanau hoou, gi maua ai e gidaadeu de tali hagalodolodo abodonu, i de mouli age o Iesu Klisdo i de magau, i hiidinga o dono degi laumalie,

⁴ gai gidaadeu ga tali ai e kave de boolonga e dee maua laa gi lilo, gai e dee maua gi bobo aabe e mmae, gai gu hagadabena adu gi goodou i de langi,

⁵ go goodou e hagaloosia laa i ssauaa o de Maadua, i doodou kai ange gi de ia, ga dae ai gi de hagaago mai de hagamouli gu baba ange laa e hagaago mai i laangi hagaodi.

⁶ Goodou llodo danuaa i hiidinga o mee nei, e dee galemu donu goodou e hagaduasala iainei, i denga hagadaagangaa hagatale i dahi masavaa bodobodo.

⁷ Mee nei ne hai e tilo ai be oodou kai se muna abodonu aabe e deai — gai e hagamogomogo ange i denga goolo e lilo laa, e dee galemu donu gu lava i de hagagilimalali i de ahi — gai goodou ga kave ai de tuhi ma de mahamaha, aama hagadubu i de laangi o Iesu Klisdo e hagasula mai ai.

⁸ E dee galemu donu goodou tee gidee ia, gai goodou e aaloha i de ia; e dee galemu donu goodou e dee gidee ia iainei, gai goodou e hagadonusia ia ma de malangilangi i de malangilangi e dee maua laa i de tala ono dagodo aama de lodo danuaa mmao,

⁹ gai oodou hagasaalunga e hagamouli naa i hiidinga doodou kai.

¹⁰ Dagodo o de hagamouli, denga pelaabisi ne tala dagodo o de abodonu gu dai dae mai laa gi goodou, ma de hagaduu ngae ga ssala dagodo o de mee nei;

¹¹ gilaadeu ne ssala gi iloo e gilaadeu tangada ma de masavaa a de Hagasaalunga o Klisdo e noho laa i olaadeu lodo gu tala laa, i de masavaa aana ne tala pelaabisi ai dagodo de hagaduasala o Klisdo aama dono hagamahamaha i dua mee nei.

¹² Gai ne hagaago ange gi gilaadeu bolo gilaadeu e dee hai hegau ange donu huu gi gilaadeu gai adu hogi gi goodou, i de masavaa alaadeu ne tala adu ai laa mee gu tala adu naa hogi gi goodou iainei i daho olaadeu ne agoagona adu goodou i de longo danuaa, i ssauaa o de Hagasaalunga Dabu ne hai laa gi hano iho i de langi. Gai denga dangada de langi e llodo donu hogi gi tonu ange gilaadeu gi mee nei.

De hagahi ange gi de mouli dabu

¹³ Deenei ai, goodou hagadabena ina oodou maanadu ma oodou lodo. Goodou gi paba ange aama de tali hagalodolodo ange gi de manuuia gu dai gaavadu gi goodou i de masavaa o Iesu Klisdo e hagasula mai ai.

¹⁴ Gai goodou gi bei dagodo o denga dama e hagallongo i muna, goodou gi dee ago ange i denga hagadaagangaa lodo baubau nogo daakodo laa i oodou lodo i de masavaa oodou nogo llodo ssenga ai.

¹⁵ Aagai oodou hegau alodahi e hai gi dabu, bei dagodo o de Maadua ne hagahia goodou, ia e dabu.

¹⁶ Gai gu sisi e hai ange, “Goodou gi dabu, go hiidinga au e dabu.”

¹⁷ Gai noo goodou e hagahi ange Tamana, go de ia e hagamodu ina muna o dangada, gai e dee vae dangada, gai goodou mouli i de hagadubu ma de maatagu i doodou nnoho gaainga i henua i lalo nei.

¹⁸ Goodou e iloo bolo goodou ne hagaola mai i oodou mouli dee haigamaiana, go mee oodou ne ago mai i daho oodou damana madagidagi, gai tee hagao i hanu mee e moolau laa de llilo, bei selevaa ma goolo,

¹⁹ aagai goodou ne hagao i dodo hagamogomogo o Klisdo, ssiibi gauligi e deai laa mee baubau i dono angaanga.

²⁰ De Maadua ne hili ia i mua de hai henua i lalo, aagai gu hagaago mai ia i denga laangi hagaodi nei i oodou hiidinga.

²¹ Gai go ono hiidinga oodou ne hagadonusia ai de Maadua, de ia ne hagamouli ina age ia mai i de magau ga hagamahamaha ia; deenei ai, tagelo o oodou kai ma oodou tali hagalodolodo go de Maadua.

²² Gai go hiidinga goodou gu gilimalali i doodou daudali i de muna abodonu, gai goodou gu maua i de hagadau aaloha i de lodo se mee abodonu, gai goodou hagadau aaloha i de lodo e gilimalali.

²³ Goodou gu aahe ange ma gu haanau hoou, gai tee hhaa mai i mee e hulo laa ga pobo, aagai go mee e dee maua laa gi pobo, go muna a de Maadua e mouli laa ga hano ai e dee ngado mai;

²⁴ go hiidinga, “Dangada alodahi e bei dagodo o denga helii, olaadeu mahamaha alodahi e bei huaala o denga helii; denga helii e mmae, gai denga huaala e malili,

²⁵ aagai muna a Tagi Maolunga e daakodo ga hano ai.” Gai aanei muna o de longo danuaa gu agoago adu gi goodou.