1 John 5 - De Beebaa Dabu

Taadeu kii henua i lalo i de gai

¹ Be goai e hagadonusia bolo Iesu go de Klisdo ne haanau donu i daho de Maadua, gai be goai e aloha i tamana e aloha hogi i tama ne hagadili laa i ono daha.

² Gai deenei taadeu hai e iloo ai bolo gidaadeu e aaloha i dama a de Maadua, go taadeu aaloha i de Maadua ma de daudali i ana muna.

³ Gai deenei taadeu aloha i de Maadua, go taadeu daohi ana muna. Gai ana muna e dee hagadaemaha donu,

⁴ gai tangada gu haanau i daho de Maadua gu kii donu i henua i lalo. Deenei de mee adaadeu e hagadee kii ai henua i lalo: go odaadeu kai.

⁵ Gai goai e maua i de hagadee kii henua i lalo? Go tangada e hagadonusia bolo Iesu go Tama Daane donu a de Maadua.

De tala hagadonu dagodo o Iesu Klisdo

⁶ Deenei de ia ne humai laa i vai ma dodo — go Iesu Klisdo, gai e dee go vai donu huu aagai go vai ma dodo. Gai de Hagasaalunga ⌊Dabu⌋ go de ia tala hagadonu, go hiidinga de Hagasaalunga go de muna abodonu.

⁷ Gai e dolu mee e daalaa hagadonu mee:

⁸ go de Hagasaalunga ⌊Dabu⌋, ma de vai, aama dodo; mee e dolu nei e buni.

⁹ Gidaadeu e hagadonusia muna a dangada e tala, aagai muna a de Maadua e tala e maolunga ange, go hiidinga aanei muna a de Maadua gu tala hagadonu ai dagodo o dana Dama Daane.

¹⁰ Be goai e hagadonusia Tama Daane a de Maadua, gai ia e daohia de tala hagadonu nei i ono lodo. Gai tangada e dee hagadonusia de Maadua gu hai de Maadua gi se ia hadu muna, go hiidinga ia tee hagadonusia muna a de Maadua gu tala ai dagodo o dana Dama Daane.

¹¹ Gai aanei muna o de tala hagadonu: de Maadua gu gaamai gi gidaadeu de mouli e dee ngado mai, gai de mouli nei e dagodo i daho dana Dama.

¹² Be goai e noho Tama i ono daha e maua de mouli; aagai be goai e dee noho Tama Daane a de Maadua i ono daha e dee dagodo de mouli i ono daha.

De mouli e dee ngado mai

¹³ Au e sisi adu mee nei gi goodou gu hagadonusia de ingoo o Tama Daane a de Maadua, gi iloo ai e goodou bolo goodou gu maua donu de mouli e dee ngado mai.

¹⁴ Gai deenei de mee e haia gi lo taane gidaadeu i mada luoono mada: noo gidaadeu e dangidangi i dahi mee bei dagodo ono lodo, gai ia e hagallongo donu adaadeu dalodalo.

¹⁵ Noo gidaadeu e iloo bolo ia e hagallongo mee alodahi odaadeu e dangidangi, gai gidaadeu e iloo hogi bolo gidaadeu e maua donu mee odaadeu gu dangidangi ange ai.

¹⁶ Noo koe e gidee doo daina gu haisala i de mee oona e dee magau ai, gai koe gi dangidangi ai, gai de Maadua ga hagamouli ai tangada bee nei — go de ia gu haisala i mee oona e dee maakau ai. E dahi donu haisala e magau ai tangada. Gai au e dee hai adu koe gi dalodalo i de mee nei.

¹⁷ Hegau dee heohi alodahi go de haisala donu, aagai e dahi haisala e dee magau ai tangada.

¹⁸ Gidaadeu e iloo bolo tangada gu haanau i daho de Maadua e dee aheahe ange ga haisala, aagai Tama dagidahi a de Maadua e hagaloosi ia, gai de ia hagabaubau e dee maua donu i de poo ange gi de ia.

¹⁹ Gidaadeu e iloo bolo gidaadeu ni dama donu nii de Maadua, aagai henua i lalo alodahi e dagodo i lalo ssauaa o de ia hagabaubau.

²⁰ Gidaadeu e iloo bolo Tama Daane a de Maadua gu humai donu, gai ia gu hai gi tonu danuaa ange gidaadeu, gi iloo ai e gidaadeu de Maadua abodonu. Gai gidaadeu ga nnoho ai i lodo o de Maadua abodonu, i lodo o dana Dama Daane go Iesu Klisdo. Gai go ia donu de Maadua abodonu ma de mouli e dee ngado mai.

²¹ Agu dama, goodou dagidiiloo gi dee daumaha ange goodou gi denga diinonga.