1 John 3 - De Beebaa Dabu

¹ Ga dae laa de laumalie de aloha o Tamana i gidaadeu, i dana hagabinga bolo gidaadeu go dama a de Maadua! Gai aanei donu odaadeu dagodo. Deenei ai, henua i lalo e dee iloo gidaadeu, go hiidinga e dee iloo de Maadua.

² Ogu soa hagamogomogo, gidaadeu gu ni dama donu nii de Maadua iainei, gai tigi iloo danuaa odaadeu dagodo i muli mai. Gai gidaadeu e iloo bolo de masavaa naa huu o Klisdo e hagasula mai ai, gai gidaadeu e bei naa ono dagodo; go hiidinga gidaadeu e gidee danuaa naa donu ono dagodo.

³ Gai dangada alodahi gu dagodo de tali hagalodolodo nei i olaadeu daha e hai gi gilimalali gilaadeu bei ono dagodo, ia e gilimalali.

⁴ Tangada e haisala gu oha donu de hainga a de Maadua; go hiidinga de haisala go de oha donu o de hainga.

⁵ Aagai goodou e iloo bolo Klisdo ne humai, gai ia ga kave gee ai odaadeu haisala. Gai ia e deai donu ono haisala.

⁶ E deai donu se dangada e noho i lodo o Klisdo e haisala. E deai hogi se dangada gu gidee aabe gu iloo ia e aheahe ange ga haisala.

⁷ Agu dama, goodou gi dee dugu ange dahi dangada gi daahangadia goodou. Tangada e haia de mee heohi se dangada heohi, ia e bei dagodo o Klisdo, ia e heohi.

⁸ Tangada e haisala se dama donu nii de ia hagabaubau, go hiidinga de ia hagabaubau gu haisala mai huu i taamada age. Aagai Tama Daane a de Maadua ne humai e oha hegau a de ia hagabaubau.

⁹ E deai donu se dangada gu haanau i daho de Maadua e aheahe ange ga haisala, go hiidinga hua o de Maadua e dagodo i ono daha; ia e dee maua donu i de aheahe ange e haisala, go hiidinga ia gu haanau i daho de Maadua.

¹⁰ Gai deenei taadeu hai e madea ai dama a de Maadua ma dama a de ia hagabaubau laa: tangada e dee haia de mee heohi e dee se dama nii de Maadua, aabe go tangada e dee aloha i dono daina.

De hagadau aaloha

¹¹ Gai deenei de agoago oodou gu langona mai i taamada: gidaadeu gi hagadau aaloha.

¹² Gidaadeu gi dee bei dagodo o Cain, ia se dama nii de ia hagabaubau, gai ia ne daa ga magau dono daina daane. Gai aahee hiidinga aana ne daa ai dono daina ga magau? Go hiidinga ana hegau e baubau, gai hegau a dono daane e heohi.

¹³ Denga daina, goodou gi dee llele oodou mouli, i de kino o henua i lalo i goodou.

¹⁴ Gidaadeu e iloo bolo gidaadeu gu ssao ma gu hulo gee i de magau gai gu ulu i de mouli, go hiidinga gidaadeu e aaloha i denga daina. Tangada e dee aloha gu noho donu i lalo de magau.

¹⁵ Tangada e kino i dono daina se dangada donu e daia tangada gi magau, gai goodou e iloo bolo e deai donu se dangada e daia tangada gi magau e dagodo de mouli e dee ngado mai i ono daha.

¹⁶ Gai deenei taadeu hai e iloo ai dagodo o de aloha abodonu: Iesu Klisdo ne gaavange dono mouli i odaadeu hiidinga. Gai gidaadeu gi gaavange hogi odaadeu mouli i hiidinga odaadeu daina.

¹⁷ Noo tangada e hanu ono goloa, gai ia e gidee dahi ono daina e duasala, aagai ia e dee abodonu ange gi de ia, gai dee hee dana hai e tala ai bolo de aloha o de Maadua e dagodo i ono daha?

¹⁸ Agu dama, gidaadeu gi dee daalaa donu huu bolo gidaadeu e aaloha, aagai gidaadeu gi hagahai hegau ina odaadeu aaloha i de mee abodonu.

¹⁹ Deenei taadeu hai e iloo ai bolo gidaadeu ni dangada e dau ange gi de mee abodonu, ma de hai gi dee manavasaa odaadeu lodo i mada luu mada o de Maadua:

²⁰ noo odaadeu lodo e hagabaubau gidaadeu, gai gidaadeu e iloo bolo de Maadua e maolunga ange i odaadeu lodo, gai ia e iloo mee alodahi.

²¹ Ogu soa hagamogomogo, noo odaadeu lodo e dee hagabaubau gidaadeu, gai gidaadeu e lo taane i mada luu mada o de Maadua,

²² gai e maua mee alodahi odaadeu e dangidangi ai, go hiidinga gidaadeu e daohi ana muna, ma de hai ono mee e malangilangi ai.

²³ Gai aanei ana muna: gidaadeu gi hagadonusia i de ingoo o dana Dama Daane, go Iesu Klisdo, ma de hagadau aaloha, bei dana hai gu tala mai ai gi gidaadeu.

²⁴ Be goai e daohia ana muna, gai ia e noho i lodo o de Maadua, gai de Maadua e noho i ono lodo. Gai deenei taadeu hai e iloo ai bolo ia e noho i odaadeu lodo: gidaadeu e iloo de mee nei i daho de Hagasaalunga ⌊Dabu⌋ aana gu gaamai gi gidaadeu.