1 John 2 - De Beebaa Dabu

Klisdo taadeu bale

¹ Agu dama, au e sisi adu mee nei gi dee haisala ai goodou. Gai noo dahi goodou gu haisala, gai e dahi odaadeu ia bale e dangidangi i odaadeu hiidinga i mada luu mada o Tamana — go Iesu Klisdo, go de Ia Heohi.

² Go ia ssigidaumaha e tala ai odaadeu haisala, gai e dee go odaadeu haisala donu huu, gai go haisala hogi o henua i lalo alodahi.

³ Gai deenei taadeu hai e iloo abodonu ai bolo gidaadeu e iloo ia: noo gidaadeu e daohi ana muna.

⁴ Tangada e hagadaba, “Au e iloo ia” aagai e dee daohi ana muna, se dangada hadu muna, gai e deai donu se muna abodonu e dagodo i ono lodo,

⁵ aagai be goai e daohia ana muna, gai ni muna abodonu de aloha o de Maadua gu honu abodonu i ono daha. Deenei taadeu hai e iloo abodonu ai bolo gidaadeu e nnoho donu i ono lodo:

⁶ be goai e hagadaba bolo ia e noho i lodo o de Maadua, gai ia gi seesee bei de hai o Iesu ne seesee ai laa.

Dahi hainga hoou

⁷ Ogu soa hagamogomogo, muna aagu e sisi adu nei gi goodou e dee ni muna hoou, aagai ni muna duai donu niiodou gu iloo mai i taamada age; muna duai go muna donu gu lava laa i doodou hagallongo.

⁸ Gai ni muna hoou hogi aagu e sisi adu nei gi goodou, gai se muna abodonu i lodo o Klisdo aama oodou lodo hogi, go hiidinga de gohu ga lilo nei donu, gai de maalama abodonu gu sula age donu.

⁹ Be goai e hagadaba bolo ia e seesee i de maalama aagai ia e kino i dono daina, gai ia goi noho donu huu i lo te gohu.

¹⁰ Be goai e aloha i dono daina e noho donu i de maalama, gai e deai donu se mee e haia ia gi haisala.

¹¹ Aagai tangada e kino i dono daina e noho donu i lo te gohu ma de seesee i lo te gohu, ia e dee gidee danuaa dono haiava e seesee ai, go hiidinga de gohu gu haoli luoono mada.

¹² Denga dama, au e sisi adu mee nei gi goodou, i hiidinga de Maadua gu degi adu gi oodou haisala i hiidinga de ingoo o Iesu.

¹³ Denga damana, au e sisi adu mee nei gi goodou, i hiidinga goodou e iloo de ia gu noho mai laa i taamada age. Denga dama daane, au e sisi adu mee nei gi goodou, i hiidinga goodou gu kii i de ia hagabaubau. Denga dama, au e sisi adu mee nei gi goodou, i hiidinga goodou e iloo Tamana.

¹⁴ Denga damana, au e sisi adu mee nei gi goodou, i hiidinga goodou gu iloo donu de ia gu noho mai laa i taamada age. Denga dama daane, au e sisi adu mee nei gi goodou, i hiidinga goodou e mmahi, gai muna a de Maadua e daakodo i oodou lodo, gai goodou gu kii i de ia hagabaubau.

Aude aloha i henua i lalo

¹⁵ Aude aloha i henua i lalo aabe go mee o henua i lalo. Noo tangada e aloha i henua i lalo, gai ia e dee aloha i Tamana.

¹⁶ Go hiidinga mee alodahi i henua i lalo — go lodo baubau o de angaanga, ma mee a luu ganomada e nnoo ange laa aagena, aama mee a tangada e tuhi ai laa ia — e dee ni mee mai i daho Tamana aagai ni mee mai i henua i lalo.

¹⁷ Henua i lalo ma ono lodo alodahi e llilo donu, aagai tangada e haia lodo o de Maadua e mouli ga hano ai.

De hagadaumee o Klisdo

¹⁸ Agu dama, gu baa mai donu de aoaa hagaodi! Goodou gu langona bolo de hagadaumee o Klisdo e humai naa, gai gu soa donu hagadaumee o Klisdo gu loomai. Deenei taadeu hai e iloo ai bolo gu dae mai donu de aoaa hagaodi.

¹⁹ De gau naa ne hulo gee mai i odaadeu daha, aagai gilaadeu tee dau mai donu madali gidaadeu. Noo gilaadeu ni dangada e dau mai gi gidaadeu, gai gilaadeu ne nnoho donu madali gidaadeu. Gai delaadeu hulo gee ne hagaago mai bolo gilaadeu e dee ni dangada e dau madali gidaadeu.

²⁰ Aagai doodou hagadabu i de lolo se mee mai i daho de Ia Dabu laa, gai goodou alodahi gu iloo donu de muna abodonu.

²¹ Au tee sisi adu mee nei i hiidinga goodou e dee iloo de muna abodonu, aagai go hiidinga goodou e iloo donu de muna abodonu, gai e deai donu se muna hhadu e daamada mai i de muna abodonu.

²² Gai goai tangada hadu muna? E dee go tangada e hagadaba laa bolo Iesu e dee go de Klisdo? Tangada bee nei go de hagadaumee donu o Klisdo — ia e hagadee iloo Tamana ma Tama Daane.

²³ Gai noo tangada e hagadee iloo Tama, gai Tamana e dee noho hogi i ono daha. Tangada e daalaa hagadonu dagodo o Tama, gai Tamana e noho donu hogi i ono daha.

²⁴ Gai goodou daohia mee oodou gu langona mai i taamada. Noo goodou e daohi mee nei, gai goodou e noho i lodo o Tama ma Tamana.

²⁵ Gai deenei dana mee gu hagatoo donu mai gi gidaadeu: go de mouli e dee ngado mai.

²⁶ Au e sisi adu mee nei e tala adu ai dagodo o dangada e llodo laa e dagina gee goodou.

²⁷ Aagai de hagadabu i de lolo oodou gu kave naa i daho Klisdo gu noho donu i oodou lodo, deenei ai, e deai ange donu se dangada e agoagona adu goodou i de mee heohi. Aagai go de hagadabu i de lolo oodou gu kave naa e agoagona adu goodou i mee alodahi, gai ni muna abodonu, e dee ni muna hhadu — goodou nnoho i ono lodo bei doodou hai gu agoago ai naa.

Dama a de Maadua

²⁸ Agu dama, goodou gi duudagi ina de nnoho i ono lodo, gi llodo mmahi ai goodou ma tee dookaa, i ono mada i mua i dono masavaa e hagasula mai ai.

²⁹ Noo goodou e iloo bolo Klisdo e heohi, gai goodou e iloo hogi bolo dangada alodahi e haia de mee heohi ne haanau mai i ono daha.