1 Corinthians 8 - De Beebaa Dabu

Gai gu sigidaumaha ange gi denga diinonga

¹ Gai dagodo o denga gai gu sigidaumaha ange laa gi denga diinonga: gidaadeu e iloo bolo “gidaadeu alodahi e hanu donu odaadeu iloo mee.” De iloo mee nei e hidi mai ai de lodo maolunga, gai de aloha e hagammahi lodo o dangada.

² Noo tangada e maanadu bolo ia e hanu ana mee e iloo, aagai tigi honu danuaa donu dana iloo.

³ Gai tangada e aloha i de Maadua, se dangada hogi nii de Maadua e iloo.

⁴ Gai aanei dagodo o de gai mee gu sigidaumaha ange laa gi denga diinonga: gidaadeu e iloo bolo “tiinonga e dee se mee abodonu,” aagai “e dahi donu huu Maadua abodonu.”

⁵ Gai e hanu donu mee a dangada e hagabinga bolo ni maadua i de langi ma henua i lalo — gai e soa donu “maadua” ma “dagi maolunga” —

⁶ aagai e dahi donu huu Maadua abodonu, go Tamana ne daamada mai ai laa mee alodahi, gai go ia e daohia odaadeu mouli. Gai e dahi donu huu Dagi Maolunga, go Iesu Klisdo, go de ia ne haia mee alodahi gai go ia hogi e gaamai gi gidaadeu de mouli.

⁷ Gai e dee go dangada alodahi e iloo de mee nei. Aagai hanu gu mau ange laa gi denga diinonga, e gai mee laa i delaadeu hagabinga bolo gu lava i de sigidaumaha ange gi denga diinonga; gai go hiidinga tagi i olaadeu lodo e baageaa, gai gu dee gilimalali.

⁸ Denga gai e dee maua i de hai gidaadeu gi paa ange gi de Maadua. Gidaadeu e dee kii ange de baubau noo gidaadeu e dee gai mee nei, aabe e kii ange tanuaa i taadeu gai.

⁹ Gai goodou kana ange gi dee hagabaageaa ina e goodou lodo o dangada e baageaa laa olaadeu kai, i doodou hai hegau i doodou ilaage e hai dahi mee.

¹⁰ Gai noo dahi dangada e baageaa laa tagi i ono lodo e gidee goe, tangada iloo mee, e gaimee i de hale daumaha o dahi diinonga, gai e dee go koe ai naa e hagammahi ina ange ia gi gaina mee gu sigidaumaha ange gi denga diinonga?

¹¹ Gai doo iloo mee gu oha taina e baageaa laa, go de ia o Klisdo ne magau i ono hiidinga.

¹² Gai koe gu haisala ange donu gi oo daina i dau hai mee nei, ma de hagabaageaa tagi i olaadeu lodo, gai koe gu haisala ange donu hogi gi Klisdo.

¹³ Deenei ai, noo denga gai e hai ga baageaa lodo o dogu daina, gai au gi dee ahe ange donu gi gaina hanu giidagi, kana haia e au ga doo dogu daina.