1 Corinthians 7 - De Beebaa Dabu

Dagodo o de hai bodu

¹ Gai dagodo o mee oodou ne sisi laa ga ssili mai: “E dee danuaa de hagahebaa o dahi daane ma dahi hahine.”

² Aagai go hiidinga gu kona de dagodo haisala o dangada, deelaa ai, taane gi haia donu gi dahi ono bodu, gai de hine gi haia hogi gi dahi ono bodu.

³ Taane dau bodu gi dugua ange dono angaanga gi dono bodu, gai de hine dau bodu gi haia ange hogi de hegau nei gi dono bodu.

⁴ Go hiidinga e dee go de hine dau bodu e huahua i dono angaanga, gai go taane e huahua ai; gai e bei ai hogi, e dee go taane dau bodu e huahua i dono angaanga, gai go de hine e huahua ai.

⁵ Tangada gi dee daohia dono angaanga i dono bodu, deelaa donu huu noo gilaau gu heloongoi i dahi masavaa bodobodo, bolo gilaau ga kave hanu masavaa e dalodalo ai, muli mai gai gilaau gi aahe ange gi hagahebaa, gi dee hagataalea ai goodou i Satan, i hiidinga goodou e dee maua i de daohi goodou gi dee hagahebaa.

⁶ Au e dee tala hagasoe adu donu huu de mee nei, gai niiodou de hilihili.

⁷ Mee naa dangada alodahi gi dee hai bodu bei ogu dagodo. Aagai dahi ma dahi gu kave dono duuhanga mai i daho de Maadua; tuuhanga o dahi e dagodo gee ma tuuhanga o tangada ange laa.

⁸ Gai au e hai ange gi dangada tigi hai bodu laa ma gilaadeu gu maakau olaadeu bodu, e danuaa donu delaadeu nnoho donu huu bei ogu dagodo e noho ai nei.

⁹ Aagai noo gilaadeu e dee maua i tee dagodo haisala, gai gilaadeu gi haia olaadeu bodu. Go hiidinga e danuaa ange de hai bodu o tangada i dono sae ange gi de dagodo haisala.

¹⁰ Gai aanei agu muna ange gi dangada gu hai bodu (e dee niiagu muna nei, aagai nii Tagi Maolunga): de hine dau bodu gi dee maavae ange gi dono bodu.

¹¹ Aagai noo ia gu maavae, gai ia gi dee hai bodu ange gi dahi daane gee, gai gi ahe ange gi dono bodu donu. Taane dau bodu gi dee maavae ange hogi gi dono bodu.

¹² Gai au e hai ange gi de gau ange laa (niiagu muna nei, e dee nii Tagi Maolunga): noo dahi daane gu hai bodu ange gi dahi hahine e dee hagadonusia, gai de hine laa e lodo e noho i ono daha, gai taane laa gi dee maavae ange gi de ia.

¹³ Gai noo dahi hahine gu hai bodu ange gi dahi daane tigi hagadonusia, gai taane laa e lodo e noho i ono daha, gai de hine laa gi dee maavae ange gi taane laa.

¹⁴ Go hiidinga taane dau bodu e dee hagadonusia laa e hai ga dabu i hiidinga o dono bodu, gai de hine dau bodu e dee hagadonusia laa e hai ga dabu i hiidinga o dono bodu. Noo e dee deenei tagodo, gai oodou dama e dee gilimalali, gai iainei gilaadeu gu hagabinga bolo e dabu.

¹⁵ Aagai noo tangada tigi hagadonusia laa gu lodo e maavae ange gi dono bodu, gai gi dugua ange. Noo deenei tagodo, gai taane be go de hine gu hagadonusia laa gu dee noodia i de hainga o de hai bodu. De Maadua gu hagahi gidaadeu gi nnoho i de baba.

¹⁶ De hine dau bodu, koe e dee iloo donu be go koe e hidi ai de hagamouli o doo bodu. Taane dau bodu, koe e dee iloo donu be go koe e hidi mai ai de hagamouli o doo bodu.

Noho bei de hai a de Maadua ne hagahi ai goe

¹⁷ Gai dahi ma dahi gi noho bei de hai a Tagi Maolunga gu hagamodu ange ai gi de ia, bei de hai a de Maadua gu hagahi ange ai ia. Gai deenei de hainga aagu gu gaavange gi denga nohoanga dabu alodahi.

¹⁸ Tangada gu lava i de tuu dagaholiage i dono masavaa ne hagahia ai, gi dee saalaa de hai e sui ai dono tuu dagaholiage. Gai tangada tigi tuu dagaholiage i dono masavaa ne hagahia ai, gai ia gi dee tuu dagaholiage.

¹⁹ De tuu dagaholiage be go tee tuu dagaholiage e deai donu ono haigamaiana, aagai de mee hagamogomogo go de daohi muna a de Maadua.

²⁰ Dahi ma dahi gi noho donu huu bei ono dagodo i mua dono hagahia e de Maadua.

²¹ Koe se dangada hai hegau i doo masavaa ne hagahia ai? Koe aude manavasaa; aagai noo koe gu maua i de hai gi se dangada e ilaage goe, gai koe haia de mee nei.

²² Go hiidinga tangada se dangada hai hegau i dono masavaa ne hagahia ange ai i lodo o Tagi Maolunga se dangada ilaage niio Tagi Maolunga. E bei ai hogi, tangada ilaage i dono masavaa ne hagahia ai, gu se dangada hai hegau niio Klisdo.

²³ Goodou ne hagao i dahi hagaoanga laumalie; goodou e dee ni dangada hai hegau niio dangada.

²⁴ Deenei ai, denga daina, be dee hee naa huu de hai o tangada e noho ai i dono masavaa ne hagahia ai, gai ia gi noho ai donu huu i lodo o de Maadua.

Denga haahine e deai olaadeu bodu

²⁵ Gai dagodo o de bua moe tigi hai bodu laa, au e dee maua i de tala adu dahi muna mai i daho Tagi Maolunga, aagai au e tala adu dagu maanadu, au se dangada niiodou e maua i de hagadonu, i de abodonu o Tagi Maolunga.

²⁶ Au e hagadaba bolo e danuaa de noho o tangada bei dogu hai e noho ai naa iainei, go hiidinga gu hai ngadaa de masavaa.

²⁷ Noo koe gu hai bodu ange gi dahi hahine, gai koe aude maavae ange gi de ia. Noo koe tigi hai bodu, gai koe aude hai bodu.

²⁸ Aagai noo koe e hai bodu, gai koe e dee haisala, gai noo dahi bua moe e hai bodu, gai ia e dee haisala hogi. Aagai dangada e hai bodu laa e tuu ange donu gi denga hai ngadaa o de mouli nei, gai au e lodo e buibui goodou i mee nei.

²⁹ Denga daina, deenei de hagadoonunga o muna nei, de masavaa gu hagamodu gu baa mai donu. Mai iainei gai denga daane dau bodu gi bei denga daane e deai olaadeu bodu,

³⁰ gai gilaadeu e hinangalosaa gi bei dagodo o dangada e dee hinangalosaa, gilaadeu e malangilangi gi bei dagodo o dangada e dee malangilangi, gilaadeu e hagao mee gi bei dagodo o dangada e deai olaadeu goloa,

³¹ gai gilaadeu e hagahai hegau ina goloa o henua i lalo, gi hai hegau bei gilaadeu e dee haia mee nei. Go hiidinga henua i lalo nei e odi naa donu.

³² Au e lodo goodou gi dee manavasaa. Taane e dee hai bodu e maanadu donu huu mee o Tagi Maolunga, ma dana hai e hagamalangilangi ai Tagi Maolunga,

³³ aagai taane dau bodu e manavasaa ono lodo i mee o henua i lalo, ma dana hai e hagamalangilangi ai dono bodu,

³⁴ ma de lodo lagolago. Gai de hine e dee hai bodu aabe go de bua moe e maanadu donu huu hegau a Tagi Maolunga, i dana hai e hagadabu ange ai dono angaanga ma ono lodo gi de ia. Aagai de hine dau bodu e maanadu mee o de mouli nei, ma dana hai e hagamalangilangi ai dono bodu.

³⁵ Au e tala adu mee nei e bale adu ai goodou, e dee se hai e daohi ai gi dee haia e goodou dahi mee, gai se hai gi maua ai e goodou i de hai hegau i de mee heohi i doodou hagaduu ngae i lodo o Tagi Maolunga.

³⁶ Noo dahi daane e maanadu bolo gu dee heohi dono hai e ngalungalue ange ai gi de bua moe oona gu hagababa laa aagena, gai noo ia gu dee maua i de daohi dono lodo i tamaa hine laa, gai e danuaa donu delaau hai bodu; gai ia e dee haisala.

³⁷ Aagai be goai gu baba dana hagasaele, e deai hogi e usuusuhia ange ia, gai ia e maua i de daohi ia gi dee dagodo haisala, gai gu baba donu ono lodo bolo ia e dee hai bodu ange gi de bua moe laa — gai e danuaa donu.

³⁸ Tangada e hai bodu ange gi dono hagababa e heohi, gai tangada e dee hai bodu e danuaa ange.

³⁹ De hine dau bodu gi hagapigi ange gi dono bodu i taulooloa de mouli o taane laa. Gai noo dono bodu gu magau, gai de hine laa gu maua i de ahe ange e hai bodu ange gi taane oona e lodo ai, gai haia gi se daane e noho i lodo o Tagi Maolunga.

⁴⁰ Gai dagu maanadu, ia e kii ange donu de malangilangi noo ia e noho donu huu i de ia. Au e hagadaba bolo agu maanadu e bei donu lodo o de Hagasaalunga o de Maadua.