1 Corinthians 6 - De Beebaa Dabu

Dau gaavange o dahi daina gi de hainga

¹ Noo dahi dangada e dahi ono mee e hagadaumee ange ai gi dahi ono daina, gai gu aha ia gu kave ai e gaavange gi de gau baubau gi hagamodu ina ono muna, e dee kave ia gi daho dangada o de Maadua?

² Goodou e dee iloo bolo go dangada o de Maadua e hagamodu ina muna o henua i lalo? Noo go goodou e hagamodu ina muna o henua i lalo, gai gu aha gu dee maua ai e goodou i de hagamodu dagodo o mee vaaligiligi naa?

³ Goodou e dee iloo bolo gidaadeu e hagamodu naa muna o denga dangada de langi? Gai e kii ange donu taadeu maua i de hagamodu dagodo o mee i de mouli nei!

⁴ Deelaa ai, noo gu hanu mee bee nei oodou e dee heloongoi ai, gai gu aha goodou gu kave ai e gaavange gi hanu dangada e dee hagadubu i lo te nohoanga dabu?

⁵ Au e tala adu mee nei gi dookaa ai goodou. E aha, gu deai laa donu se dangada heiangi i oodou daha e maua i de hagamodu muna i magavaa o denga daina?

⁶ Aagai dahi daina e gaavange dono daina gi de hainga — gai mee nei e hai i madamada o dangada e dee hagadonusia.

⁷ Gai doodou hagadau gaavange gi de hainga gu hagaago mai bolo goodou e dee heohi donu. Gai gu aha gu dee hagauda ai donu huu de mee dee heohi gu hai adu laa gi goodou? Gai gu aha gu dee dugu ange ai donu huu gi gaiaadia oodou mee?

⁸ Aagai goodou e dee heohi donu hogi ma de gaiaa, goodou e gaiaa mee a oodou daina ange laa.

⁹ Goodou e dee iloo laa bolo dangada e haia mee dee heohi e dee maua donu i de ulu i de nohoanga hodooligi o de Maadua? Goodou gi dee daahangadia donu huu goodou: gilaadeu e dagodo haisala, ma gilaadeu e daumaha ange gi denga diinonga, ma gilaadeu e gaiaadia bodu o dangada, ma denga daane e dagodo haisala ma denga daane,

¹⁰ ma de gau gaiaa, ma gilaadeu e nnoo hagamau mee, ma gilaadeu e unu ga ssenga, ma de gau hai samu, aama gilaadeu e haia gi de mahi mee a dangada e dee ulu donu i de nohoanga hodooligi o de Maadua.

¹¹ I mua gai hanu goodou e dagodo bee nei. Aagai iainei goodou gu hagagilimalali ma gu vvae gee ma gu hai gi dabu, goodou gu hagaheohi i de ingoo o Tagi Maolunga go Iesu Klisdo aama ssauaa o de Hagasaalunga o taadeu Maadua.

Hagamahamaha ina de Maadua i oodou angaanga

¹² ⌊Tangada e maua i de hagadaba,⌋ “Au e alaange i de hai mee alodahi,” aagai e dee go mee alodahi e hanu ono haigamaiana. “Au e alaange i de hai mee alodahi,” aagai au e dee dugu ange dahi mee daudahi gi dagina au.

¹³ “Denga gai se hai e hhao gi lo te dinae, gai tinae ne hai e hhao ai denga gai,” aagai de Maadua e oha naa donu luu mee nei ngaadahi. De angaanga e dee se mee ange gi denga dahulinga dagodo haisala, aagai se mee ange gi Tagi Maolunga, gai Tagi Maolunga ange gi de angaanga.

¹⁴ De Maadua ne hagamouli ina age laa Tagi Maolunga, e hagamouli age naa hogi gidaadeu i dono sauaa.

¹⁵ Goodou e dee iloo laa bolo oodou angaanga ni mee donu niio de angaanga o Klisdo? Gai dee hee ai dagu hai e kave ai dahi mee de angaanga o Klisdo e hai gi ange gi de angaanga o dahi hahine hai be se manu? E dee maua donu!

¹⁶ Goodou e dee iloo laa bolo tangada e dagodo haisala madali dahi hahine hai be se manu, gu hai donu ma gu se angaanga daudahi ma de hine laa? Go hiidinga gu sisi e hai ange, “Gilaau gu hai ma gu se angaanga daudahi.”

¹⁷ Aagai tangada gu buni laa ma Tagi Maolunga gu buni ma ia i dahi hagasaalunga daudahi.

¹⁸ Goodou saavini hulo gee i denga dahulinga dagodo haisala. Haisala ange laa e hai i tua de angaanga, aagai denga dahulinga hai be se manu e hai baasi ange donu gi de angaanga o tangada.

¹⁹ Goodou e dee iloo laa bolo oodou angaanga go de temple donu o de Hagasaalunga Dabu e noho laa i oodou lodo, gai ia ne humai i daho de Maadua? Gai e dee go goodou donu e huahua i goodou;

²⁰ goodou ne hagao ina i dahi hagaoanga laumalie. Deenei ai, goodou hagamahamaha ina de Maadua i oodou angaanga.