1 Corinthians 5 - De Beebaa Dabu

De dagodo haisala i lo te nohoanga dabu

¹ Gai gu hagadele mai bolo hanu dahulinga dagodo haisala e hai i oodou magavaa, gai ni dahulinga donu e dee hai i daho denga Gentile; dahi daane e dagodo haisala ma de bodu o dono damana.

² Gai goodou e hagamaolunga! Gai de mee e heohi doodou hai go de daemaha oodou lodo ma aau gee tangada gu haia de hegau nei mai i oodou magavaa!

³ Gai au, e dee galemu donu dogu dee madali goodou i de angaanga, aagai dogu hagasaalunga e madali goodou. Gai au gu lava donu i de hagamodu muna o taane ne haia de hegau naa, e dagodo be au e noho donu i oodou daha.

⁴ De masavaa oodou e hagabuni ai i de ingoo o Tagi Maolunga go Iesu, gai dogu hagasaalunga e madali goodou i ssauaa o taadeu Dagi Maolunga go Iesu,

⁵ gai goodou dugua ange taane naa gi Satan e oha ai lodo o de angaanga, gai dono hagasaalunga gu maua de mouli i de laangi o Tagi Maolunga.

⁶ E dee danuaa doodou tuhi donu huu goodou. Goodou e dee iloo bolo hanu momo mee hagahua e hai ga hua de laabungaa pelaoaa alodahi?

⁷ Aaua gee mee hagahua duai mai i oodou daha, gi bei ai goodou dagodo o de laabunga hoou e deai laa mee hagahua iai. Goodou se laabunga donu e deai mee hagahua iai. Go hiidinga Klisdo, taadeu ssiibi gauligi o ssigidaumaha o Taonga Hagasili, gu lava donu i de hai ai ssigidaumaha.

⁸ Deenei ai, gidaadeu ga hai Taonga Hagasili, gai e dee hai i mee hagahua duai, be go de mee hagahua go de vaivai hai dangada ma de baubau, aagai e hai i pelaoaa e dee hagahua, go de lodo e gilimalali ma de mee abodonu.

⁹ Aagai au ne sisi adu i dagu leda bolo goodou gi dee hagabuni ange gi de gau dagodo haisala —

¹⁰ gai e dee go de gau o henua i lalo e dagodo haisala laa, be go gilaadeu e nnoo hagamau mee ma de gaiaa, aabe go dangada o henua i lalo e daumaha ange laa gi denga diinonga. Noo deenei tagodo, gai e heohi donu doodou hulo gee mai i henua i lalo nei.

¹¹ Aagai au ne sisi adu goodou gi dee hagabuni ange gi tangada e hagadaba bolo ia se daina noo ia se dangada hai be se manu, be se dangada nnoo hagamau mee, be e daumaha ange gi denga diinonga, be se dangada hai samu, be se dangada e lodo i de unu gi senga, aabe se dangada gaiaa. Gai goodou e dee gaimee donu hogi madali tangada bee nei.

¹² Gai e dee go au donu e hagamodu ina muna o denga Gentile. Gai go goodou donu e hagamodu ina dagodo o dangada i lo te nohoanga dabu?

¹³ Aagai go de Maadua e hagamodu ina muna o de gau tua de mee. “Goodou dilia gee tangada baubau mai i oodou magavaa.”