1 Corinthians 3 - De Beebaa Dabu

Tee heloongoi o dangada i de nohoanga dabu

¹ Aagai au, e denga daina, e dee maua i de basa adu gi goodou bei dagodo o dangada e noho de Hagasaalunga i olaadeu daha, aagai e basa ange gi dangada goi daudali i lodo o de angaanga, bei denga gaagaa i lodo o Klisdo.

² Au ne haangai adu goodou i vai uu, e dee go gai makaga, go hiidinga goodou tigi heohi ange gi mee nei. Uaa, goodou goi tigi heohi ange donu aagena,

³ go hiidinga goodou goi hai donu huu lodo o de angaanga. Gai e dee anaa hiidinga oodou e llodo gaiaa ai naa ma de hagadaumee i oodou magavaa: goodou e dee nnoho naa huu i lodo o de angaanga, ma de hai hegau bei dagodo o dangada?

⁴ Goodou e dee hagaago mai naa bolo goodou e bei donu huu dangada, i de hagadaba a dahi dangada, “Au e daudali ange i a Paul,” gai tangada ange laa e hagadaba, “Au e daudali ange i Apollos”?

⁵ Goai go Apollos? Gai goai go Paul? Gimaau ngaadahi ni dangada hai hegau donu huu, ne haia ga maua e goodou i de hagadonusia, bei de hai a Tagi Maolunga gu gaavange ai gi dahi ma dahi dono duuhanga.

⁶ Au ne doo gai Apollos ne hagamaluulu, gai go de Maadua ne haia ga somo.

⁷ Tangada doo ma tangada hagamaluulu e dee hagamogomogo, aagai go de Maadua e haia laa ga somo e hagamogomogo.

⁸ Tangada doo ma tangada hagamaluulu e hedae donu huu, gai gilaau e kave naa hagaoanga o alaau hegau.

⁹ Gai gimaau ni dangada e hai hegau madali de Maadua; gai goodou go de veelenga a de Maadua aama de hale o de Maadua.

¹⁰ Au ne hagaduu tagelo bei dagodo o de labagau heiangi, i tuuhanga a de Maadua gu gaamai laa gi de au i dono abodonu, gai dahi dangada ange e hagaduu ange gi honga tagelo laa. Gai dahi ma dahi gi diiloo gi danuaa dana hai e hagaduu ange ai gi honga tagelo laa.

¹¹ Gai e deai ange donu se dangada e maua i de hagadagodo dahi dagelo gee ma tagelo gu lava laa i de hagadagodo, go Iesu Klisdo.

¹² Gai noo dahi dangada e hagaduu i honga tagelo nei i goolo, be go selevaa, be go hadu hagamogomogo, be go laagau, aabe go helii ma lau mmasa —

¹³ dagodo hegau a dahi ma dahi e ssula danuaa mai naa; i hiidinga e hagaago mai naa i de Laangi laa, de ahi e hai naa ga iloo ono dagodo. Gai de ahi e hagatale ange naa ga tilo be aahee dagodo hegau a dahi ma dahi.

¹⁴ Noo hegau a dahi dangada ne hagaduu ange laa gi honga tagelo laa tee vvela, gai ia e kave naa dahi hagaoanga.

¹⁵ Gai noo hegau a tangada e odi i de dudu i de ahi, gai ia e deai sono hagaoanga; aagai ia e ola mai i de hagaduasala, bei dagodo o tangada gu ola mai i de ahi.

¹⁶ Goodou tigi tonu ange naa donu bolo goodou go de temple o de Maadua, gai de Hagasaalunga o de Maadua e noho i oodou lodo?

¹⁷ Gai noo dahi dangada e oha de temple o de Maadua, gai de Maadua e daa donu ia gi magau. Go hiidinga de temple o de Maadua e dabu, gai go goodou donu de temple laa.

¹⁸ Gai tangada gi dee hagasengalia donu huu ia. Noo dahi goodou e maanadu bolo ia se dangada heiangi i de mouli nei, gai ia gi se dangada senga, gi heiangi abodonu ai ia.

¹⁹ Go hiidinga de heiangi o henua i lalo nei e bei de lodo senga i daho de Maadua. Gai gu sisi e hai ange, “Ia e hagahaisala naa tangada heiangi i ana hegau vaivai dagodo.”

²⁰ Gai gu sisi hogi e hai ange, “Tagi Maolunga e iloo dagodo maanadu a tangada heiangi, bolo e deai donu haigamaiana.”

²¹ Deenei ai, tangada gi dee duuhia dangada! Go hiidinga mee alodahi niiodou:

²² e dee hilihili be go Paul, be go Apollos, be go Cephas, be go henua i lalo, be go de mouli, be go de magau, be go de masavaa go iainei, aabe go de masavaa e humai — mee nei alodahi niiodou,

²³ gai goodou nii Klisdo, gai Klisdo nii de Maadua.