1 Corinthians 2 - De Beebaa Dabu

De tala de daudau o Klisdo i de laagau lui

¹ Denga daina, dogu masavaa ne dae adu ai gi oodou daha, gai au tee hanadu ga agoago adu goodou i muna a de Maadua i muna maolunga, aabe go de iloo mee o dangada.

² Go hiidinga au ne hagababa i ogu lodo bolo au e dee iloo ange dahi mee i dogu masavaa e noho ai i oodou daha, gai go de agoago donu huu i dagodo o Iesu Klisdo ma dono daudau i de laagau lui.

³ Gai au se dangada baageaa ma de madagu mmao aama de bolebole, i dogu masavaa nogo noho ai i oodou daha,

⁴ gai agu muna ma agu agoago tee hai i de heiangi ma de usuusu ange ai dangada, aagai ne hai i ssauaa o de Hagasaalunga ⌊Dabu⌋,

⁵ gi dee go de heiangi ai o dangada e hagatuu ange aagena oodou kai, aagai go ssauaa o de Maadua.

De heiangi o de Maadua

⁶ Gai gimaadeu ne agoago i muna o de heiangi i magavaa o dangada gu maatua abodonu, aagai e dee go de heiangi o de masavaa go iainei, aabe go de heiangi o denga dagi i de masavaa nei, go gilaadeu gu dai llilo.

⁷ Aagai gimaadeu ne agoago i de heiangi o de Maadua e dee iloo laa, gai se heiangi e hagammuni, go de heiangi a de Maadua ne hagasauaa i mua taamada o de masavaa, gi maua ai e gidaadeu de mahamaha.

⁸ Gai e deai donu se dagi o de masavaa go iainei e donu ange gi de mee nei. Noo gilaadeu ne tonu ange aagena, aagai gilaadeu tee daudau Tagi Maolunga mahamaha laa i de laagau lui.

⁹ Gai gu sisi e hai ange, “Mee a dangada tigi gidee, gai tigi langona, gai tigi maanadu i olaadeu lodo — go mee a de Maadua gu hagadabena ange gi gilaadeu e aaloha i de ia”  —

¹⁰ aanei mee a de Maadua gu hagaago mai gi gidaadeu i daho dono Hagasaalunga. Go hiidinga de Hagasaalunga e tilo gi iloo mee alodahi, aama mee donu hogi a de Maadua e hai ngadaa laa i de iloo.

¹¹ E deai donu se dangada e iloo maanadu a dahi dangada, go de hagasaalunga donu huu i ono lodo laa. E bei ai hogi, e deai donu se dangada e donu ange gi maanadu a de Maadua, go de Hagasaalunga donu huu o de Maadua.

¹² Gidaadeu tee kave de hagasaalunga o henua i lalo, aagai ne kave de Hagasaalunga mai i daho de Maadua, gi maua ai e gidaadeu i de tonu ange gi mee a de Maadua gu ngadi gaamai gi gidaadeu.

¹³ Gai gimaadeu e tala mee nei, gai e dee ni mee ne ago i de heiangi o dangada, aagai ne ago i ssauaa o de Hagasaalunga, ma de hagadonu denga agoago heohi o de baasi gi de hagasaalunga, ange gi gilaadeu gu gaavee de Hagasaalunga.

¹⁴ Tangada e dee noho de Hagasaalunga i ono daha e dee maua i de kave mee e loomai i daho de Hagasaalunga o de Maadua, aagai e maanadu bolo mee nei ni ngadi muna, ia e dee donu ange aagena, go hiidinga go gilaadeu donu huu e noho de Hagasaalunga i olaadeu daha e tonu ange aagena.

¹⁵ Tangada e noho de Hagasaalunga i ono daha e maua i de hagamodu dagodo o mee alodahi, aagai e deai donu se dangada e maua i de hagamodu ono dagodo.

¹⁶ “Gai goai e donu ange gi maanadu a Tagi Maolunga, gai ia ga agoago ange ai ana mee e hai?” Aagai gidaadeu e maanadu bei dagodo o Klisdo.