1 Corinthians 16 - De Beebaa Dabu

Sseene ange gi dangada o de Maadua

¹ Gai dagodo o de mee e daohi age e gaavange gi dangada o de Maadua: aanei agu muna gu tala ange gi denga nohoanga dabu i Galatia, gai e bei ai hogi goodou.

² Denga dahi laangi alodahi o de uvigi, gai dahi ma dahi gi vaaea gee dana sseene e daohi age ga doange, e dee tali donu go dogu masavaa e dae adu ai e daohi age ai de mee a tangada.

³ Gai dogu masavaa naa huu e dae au ai, gai au ga hai gi hulo oodou dangada gu hili, gi gaavee denga leda madali doodou mee ngadi gaavange gi Jerusalem.

⁴ Gai noo e heohi, gai au ga hano hogi, gai gilaadeu ga hulo ai madali au.

Hagatau a Paul ange gi dono sailago

⁵ Gai au e hanadu naa gi oodou daha i dua dogu hagadaga laa Macedonia, go hiidinga au gu maanadu donu de hano gi Macedonia,

⁶ gai dagu hai au e maua naa i de damaa noho ange i oodou daha, aabe e noho i oodou daha ga odi ai de masavaa hagamagalili, gai goodou ga bale mai ai au i dogu hano e hagadaga saele, e dee hilihili be go hee oogu e hano aagena.

⁷ Au e dee lodo e hanadu gi oodou daha iainei ga lava ga hagasoe ga hano. Gai au e tali bolo au e hanadu naa ga noho i oodou daha i dahi masavaa, noo e dugua mai i daho Tagi Maolunga.

⁸ Aagai au e noho naa i Ephesus ga dae ai gi de Pentecost,

⁹ go hiidinga gu dugua mai gi de au de masavaa danuaa e hagasula ai de hegau i kinei, aagai e soa hogi ogu hagadaumee.

¹⁰ Gai de masavaa naa huu o Timothy e dae adu ai gi oodou daha, gai goodou diiloo abodonu ange gi de ia, i hiidinga ia se daane hogi e haia hegau a Tagi Maolunga bei ogu dagodo.

¹¹ Gai gi deai se goodou e hagangadi mee ina ia. Gai balea ange ga hai ia gi ahe mai i de baba, gi maua ai e ia i de humai gi dae mai gi ogu daha, go hiidinga au e tali ia gi ahe mai madali denga daina ange laa.

¹² Gai dagodo o taadeu daina go Apollos, au ne hagammahi ange ia gi hanadu gi oodou daha madali denga daina ange laa, aagai ia tigi lodo e hanadu iainei. Gai ia e hanadu naa donu i de masavaa e heohi ange ai.

¹³ Goodou dagitilo, ma de tuu gi makaga i de gai, gai gi lo taane ma de lodo mmahi.

¹⁴ Gai goodou haia mee alodahi i de aloha.

¹⁵ Denga daina, goodou gu iloo bolo go Stephanas ma dono huaabodu hugadoo ne hagadonusia i taamada i Achaia, gai ne kona mmao delaadeu bale ange dangada o de Maadua; au e hai adu gi goodou,

¹⁶ goodou daudali i muna a de gau bee nei aama dangada alodahi e balea ma de hai hegau madali gilaadeu.

¹⁷ Gai au ne malangilangi i de tae mai o Stephanas ma Fortunatus, aama Achaicus, i hiidinga gilaadeu gu sui goodou ma gu hai ai mee oodou e dee maua i de hai;

¹⁸ gai gilaadeu gu hai ma gu paba odaadeu lodo alodahi. Deelaa ai, goodou hagadubulia de gau bee nei.

Denga hagaboo hagaodi

¹⁹ Denga nohoanga dabu i Asia e gaavadu delaadeu hagaboo gi goodou. Aquila ma Priscilla e gaavadu hogi delaau hagaboo i lodo o Tagi Maolunga, aama de nohoanga dabu e daumaha laa i delaau hale.

²⁰ Denga daina alodahi e gaavadu hogi delaadeu hagaboo gi goodou. Gai goodou hagadau hagaboo i de oso dabu.

²¹ Go au donu go Paul ne siia de hagaboo nei i dogu lima.

²² Noo dahi goodou e dee aloha i Tagi Maolunga, gai ia e hagamalaia! Gi humai taadeu Dagi Maolunga!

²³ De abodonu o Tagi Maolunga go Iesu gi dagodo i oodou daha.

²⁴ Dogu aloha gi madali goodou alodahi i lodo o Klisdo Iesu.