1 Corinthians 14 - De Beebaa Dabu

De basa i denga hagadaagangaa muna

¹ Goodou hagaduu ngae i de aloha, ma de llodo mmao i denga duuhanga mai i daho de Hagasaalunga, gai gi kii ange doodou llodo i de pasa pelaabisi.

² Go hiidinga tangada e basa i denga hagadaagangaa muna, e dee basa ange gi dangada, aagai e basa ange gi de Maadua. Gai e deai donu dangada e tonu ange gi ana muna; gai ia e tala mee e dee iloo laa i ssauaa o de Hagasaalunga.

³ Aagai deenei tagodo, tangada e basa pelaabisi, e hai ga hagadagadaga age dangada ma de hagammahi olaadeu lodo, aama de hagaaneane ange gilaadeu.

⁴ Tangada e basa i denga hagadaagangaa muna e hagammahi donu huu ono lodo, aagai tangada e basa pelaabisi e hagammahi lodo o de nohoanga dabu.

⁵ Gai mee naa goodou alodahi gi maua i de pasa i denga hagadaagangaa muna, gai e kii ange mmao dogu lodo goodou gi pasa pelaabisi. Tangada e basa pelaabisi e maolunga ange i tangada e basa i denga hagadaagangaa muna, deelaa donu huu noo e dahi dangada e hagadonu ina ana muna, e hagammahi ai lodo o de nohoanga dabu alodahi.

⁶ Denga daina, noo au e basa adu gi goodou i denga hagadaagangaa muna, gai e hanu ai naa donu ogu haigamaiana adu gi goodou, deelaa donu huu noo au e gaavadu gi goodou dahi hagaago be go de iloo mee, be go de basa pelaabisi aabe go de agoago adu goodou.

⁷ Gai e bei ai hogi dagodo o denga mee hagadangidangi bei de flute aabe go de harp: dee hee de hai a dangada e iloo ai be se daahili bee hee gu hagadangidangi ai laa, noo e dee ili be tale gi molomolo?

⁸ Gai noo de trumpet e dee ili gi heohi, gai goai ai naa donu e hagadabena ange gi de hebagi?

⁹ Gai e bei ai hogi oodou dagodo; noo goodou e pasa i denga hagadaagangaa muna e dee tonu ange dangada aagena, gai dee hee ai naa de hai o dahi dangada e donu adu ai gi oodou muna? Oodou muna e bei donu huu denga ngadi madangi.

¹⁰ E lagolago donu hagadaagangaa muna i henua i lalo, gai e hanu hugadoo olaadeu hagadoonunga.

¹¹ Aagai noo au e dee donu ange gi hanu muna, gai au e dee se dangada de henua i daho tangada e basa laa, gai mai gi de au, ia se dangada dahi henua gee.

¹² Gai e bei ai hogi oodou dagodo; go hiidinga goodou e llodo mmao i duuhanga mai i daho de Hagasaalunga, deenei ai, goodou hagammahi gi kii ange doodou maua i de hai gi hagadagadaga age de nohoanga dabu.

¹³ Deenei ai, tangada e basa i denga hagadaagangaa muna, gi dalodalo gi maua e ia i de hagadonu ana muna.

¹⁴ Gai noo au e basa i denga hagadaagangaa muna e dalodalo ai, gai dogu hagasaalunga e dalodalo, aagai au e dee donu ange gi agu muna e tala.

¹⁵ Gai ni aha ai aagu e hai? Au e dalodalo i dogu hagasaalunga, aagai e dalodalo hogi i agu muna e donu ange aagena. Au e daahili i dogu hagasaalunga, aagai au e daahili hogi i agu muna e donu ange aagena.

¹⁶ Gai noo koe e hagaahe ange de abodonu gi de Maadua i doo hagasaalunga, gai dee hee naa de hai o dahi dangada gee hagadaba ai, “Amen,” gai ia e dee donu adu gi au muna?

¹⁷ Koe e maua i de hagaahe ange de abodonu i de hai nei, aagai au muna e dee maua i de hai gi hagadagadaga tangada ange laa.

¹⁸ Au e hagaahe ange de abodonu gi de Maadua i de kii ange dogu basa i denga hagadaagangaa muna i goodou alodahi.

¹⁹ Aagai de masavaa o taumaha gai au e danuaa ange dagu tala e lima muna oogu e donu ange aagena, i dagu tala e semada hagadaagangaa muna, gi maua ai hogi e au i de agoago ange de gau ange laa.

²⁰ Denga daina, goodou gi dee maanadu gauligi; gai maanadu bei dagodo o denga gaagaa i de hai de baubau, aagai oodou maanadu gi maatua abodonu.

²¹ Gai gu sisi i de hainga e hai ange, “Au e basa ange gi de huaadangada nei i denga hagadaagangaa muna, ma muna a de gau henua gee, aagai gilaadeu e dee hagallongo mai donu gi de au, go Tagi Maolunga e hagadaba.”

²² Deenei ai, tuuhanga go de basa i denga hagadaagangaa muna e dee se hagailonga ange gi dangada gu hagadonusia, aagai ange gi gilaadeu tigi hagadonusia. Aagai de basa pelaabisi e dee se mee ange gi gilaadeu tigi hagadonusia, aagai ange gi gilaadeu gu hagadonusia.

²³ Deenei ai, noo de nohoanga dabu alodahi gu hagabuni, gai dangada alodahi e pasa i denga hagadaagangaa muna, gai hanu dangada gee aabe ni dangada tigi hagadonusia e ulu mai, gai gilaadeu e dee hagataba naa bolo goodou gu ssenga ange?

²⁴ Gai noo goodou alodahi e pasa pelaabisi, gai dahi dangada tigi hagadonusia laa, aabe se dangada gee e humai gi oodou daha, gai ia gu dee donu iho bolo ia gu haisala, ma de velosia ono lodo i ana mee alodahi gu langona,

²⁵ gai mee i ono lodo e dee iloo gu hagaago ange gi de ia. Gai ia e ino naa gi lalo ga daumaha ange gi de Maadua ga hagadaba, “De Maadua e noho donu i oodou daha!”

De hagatau danuaa o taumaha

²⁶ Denga daina, dee hee ai tagodo o mee i doodou masavaa e hagabuni ai? Dahi dangada e hai dahi daahili, e dahi se agoago, e dahi dangada e dahi ana mee e hagaago adu, dahi e basa i denga hagadaagangaa muna, aabe e hagadonu muna laa. Gai haia mee alodahi gi hagadagadaga age ai alodahi.

²⁷ Noo hanu e llodo e pasa i denga hagadaagangaa muna, gai e dogolua donu huu aabe dogodolu e dugu ange gi pasa, e dee kii ange i togodolu, gai gilaadeu gi hagasolo; gai dahi dangada gi hagadonu ina alaadeu muna.

²⁸ Aagai noo e deai donu dangada e hagadonu ina alaadeu muna, gai gilaadeu gi dee pasa i de masavaa o taumaha, gai dahi ma dahi gi basa donu huu i ono lodo aama de basa ange gi de Maadua.

²⁹ E dogolua aabe e dogodolu dangada gi pasa pelaabisi, gai de gau ange laa gi hagalaangona ma de hagasaelea dagodo o alaadeu muna.

³⁰ Noo de Maadua gu hagaago ange dahi mee gi dahi dangada e noho laa gi lalo, gai tangada e basa laa gi duudia dono ana muna.

³¹ Gai goodou alodahi e maua i de agoago, gai goodou hagasolo, gi maua ai e goodou alodahi i de ago dahi mee ma de hagammahi oodou lodo.

³² Gai sauaa o tuuhanga go de basa pelaabisi go tangada e basa pelaabisi laa e daohia.

³³ Gai de Maadua e dee se Maadua e haia gi ssenga ange dangada, aagai ia go de Maadua o de nnoho paba. Gai mee e hai i nohoanga dabu alodahi o dangada o de Maadua,

³⁴ denga haahine gi dee muu i lo te hale daumaha. E dee dugu ange gilaadeu gi pasa, aagai gilaadeu gi daudali i hainga a olaadeu bodu, bei dagodo muna o de hainga.

³⁵ Gai noo gilaadeu e llodo gi tonu ange gilaadeu gi dahi mee, gai gilaadeu gi siilia ange gi olaadeu bodu i olaadeu hale. Go hiidinga se mee hagadookaa donu de basa o dahi hahine i lo te hale daumaha.

³⁶ Gai e aha, go oodou daha ne daamada mai ai muna a de Maadua? Aabe go goodou donu huu gu tae adu aagena muna nei?

³⁷ Noo tangada e maanadu bolo ia se pelaabisi, gai se duuhanga hegau donu mai i daho de Hagasaalunga, gai ia gi donu ange bolo agu muna e sisi adu ni muna donu nii Tagi Maolunga.

³⁸ Gai noo tangada e hagadee iloo muna nei, gai goodou gi hagadee iloo ina hogi ia.

³⁹ Deenei ai, denga daina, goodou llodo i tuuhanga go de pasa pelaabisi, aagai gi dee buibuia tuuhanga o de basa i denga hagadaagangaa muna.

⁴⁰ Aagai haia mee alodahi gi danuaa, ma de hagatau heohi.