1 Corinthians 13 - De Beebaa Dabu

Dagodo o de aloha

¹ Noo au e maua i de basa i hagadaagangaa muna a dangada aabe go muna a de gau de langi, aagai e deai se aloha i ogu daha, gai au e bei dagodo o de baalanga e hagalongaa laa, aabe go de cymbal e hagailiili laa.

² Gai noo au e maua i de basa pelaabisi, ma de donu ange gi mee alodahi e dee iloo laa, ma de kave de iloo mee alodahi, gai noo e dahi ogu gai e hagangaalue ai denga mounga, aagai e deai se aloha i ogu daha, gai au se ngadi mee donu.

³ Noo au e gaavange agu mee alodahi gi de gau hagaau aloha, be e gaavange dogu angaanga e dudu, aagai e deai se aloha i ogu daha, gai e deai donu agu mee e maua i mee nei.

⁴ De aloha e golomagi de lodo, ma de abodonu. De aloha e dee lodo gaiaa, e dee tuhi donu huu ia, gai e dee lodo maolunga.

⁵ De aloha e dee hagangadi mee dangada; e dee maanadu donu huu ia; e dee moolau de lili, gai e dee golo age de baubau.

⁶ De aloha e dee malangilangi i de mee dee heohi, aagai e malangilangi i de muna abodonu.

⁷ De aloha e hagauda mee alodahi i de golomagi lodo, e hagadonu mee alodahi, e tali hagalodolodo ange gi mee alodahi, gai e lodo mmahi i de hagauda mee alodahi.

⁸ De aloha e dee helui donu. Aagai denga muna pelaabisi e hagadeai naa donu; de basa i denga hagadaagangaa muna e tuu naa donu; gai de iloo mee e lilo naa hogi.

⁹ Go hiidinga taadeu iloo mee e dee honu, gai taadeu pasa pelaabisi e dee honu hogi,

¹⁰ aagai de masavaa naa huu e dae mai ai de mee e honu danuaa laa, gai de mee e dee honu danuaa laa gu hagadeai hogi.

¹¹ De masavaa oogu e gauligi ai, gai au e basa gauligi, ma de maanadu gauligi, au ne hagasaele hogi bei de gauligi. Gai de masavaa huu oogu gu madua ai, gai au gu dugu de hai mee a gauligi.

¹² Iainei gai adaadeu mee e gidee e dee masalaba, bei dagodo o mee i lo te galaasa dilodilo; gai de masavaa laa naa huu, gai gidaadeu gu gidee danuaa donu. Iainei gai dagu iloo e dee honu; aagai de masavaa laa naa huu, gai gu honu danuaa dagu iloo, bei de hai a de Maadua e iloo ai laa ogu dagodo alodahi.

¹³ Mee e dolu nei e dee ngado mai donu: go de gai, ma de tali hagalodolodo, aama de aloha, gai de mee e maolunga hugadoo go de aloha.