1 Corinthians 10 - De Beebaa Dabu

Hagakana ange i dagodo o denga dubuna madagidagi

¹ Denga daina, au e lodo goodou gi tonu ange bolo odaadeu dubuna madagidagi ne nnoho i lalo dahi hagausinga, gai gilaadeu alodahi ne hulo ga tae gi de baasi laa de vai;

² gilaadeu alodahi ne babudaisi gi daudali ange i Moses i lalo de hagausinga ma lo te vai,

³ gai gilaadeu alodahi ne gaimee i gai mai i de baasi gi de hagasaalunga,

⁴ gai alodahi ne unu hogi i vai mai i de baasi gi de hagasaalunga; gilaadeu ne unu mai i de hadu a de hagasaalunga ne daudali ange laa i gilaadeu, gai de hadu laa go Klisdo donu.

⁵ Aagai de Maadua tee malangilangi donu i de baasi soa o de gau laa; gai gilaadeu ne maakau ga daakodo saele i de vao.

⁶ Gai mee nei se hagaago danuaa niiodaadeu, gi dee llodo ai gidaadeu i de baubau bei olaadeu dagodo.

⁷ Goodou gi dee daumaha ange gi denga diinonga bei hanu gilaadeu; bei de hai gu sisi ai laa, “Dangada ne nnoho ga gaimee ma de unu, ga lava ga hiihidi age ga hai denga dahulinga baubau.”

⁸ Gidaadeu gi dee haia denga dahulinga dagodo haisala bei hegau a hanu gilaadeu, ga hidi ai de maakau e 23,000 dangada i dahi laangi daudahi.

⁹ Gidaadeu gi dee hagataalea Tagi Maolunga bei hegau a hanu gilaadeu ne hai, gai gilaadeu ne maakau i de gadigadi a denga labodo hagammau.

¹⁰ Aude nanu, bei dagodo o hanu gilaadeu, gai gilaadeu ne daia ga maakau e tangada de langi o de magau.

¹¹ Gai mee ne hai ange gi gilaadeu e hai ai taadeu mee hagaago, gai ne sisi ga daohi e hagakana ange ai gidaadeu, go gidaadeu gu nnoho i denga laangi hagaodi nei.

¹² Deenei ai, tangada e maanadu laa bolo ia e duu ma e makaga gi kana ange gi dee baguu ia.

¹³ E deai donu se hagatale daudahi gu hai adu gi goodou tigi hai ange hogi gi dangada alodahi. Gai de Maadua e hai hegau i de mee abodonu; ia e dee hagatale goodou gi kii ange i oodou mee e mau i de hagauda. Gai de masavaa naa huu oodou e tuu ange ai gi de hagatale, gai ia e hai hogi dahi haiava e hagaola ai goodou, gi maua ai e goodou i de hagauda i de lodo mmahi.

¹⁴ Deenei ai, ogu daina hagamogomogo, goodou saavini hulo gee i de daumaha ange gi denga diinonga.

¹⁵ Au e hai adu gi goodou e maanetonu; goodou hagasaelea dagodo o agu mee e tala adu nei gi goodou.

¹⁶ E aha, de ubu adaadeu e hagaahe ange ai nei de abodonu, e dee go taadeu hagadau kave dodo o Klisdo? Gai e aha, de pelaoaa adaadeu e dohidohi nei, e dee go taadeu hagadau kave de angaanga o Klisdo?

¹⁷ Go hiidinga e dahi donu huu duudangaa pelaoaa, gai e soa gidaadeu e hai ai de angaanga daudahi, go hiidinga gidaadeu alodahi e gai dahi pelaoaa daudahi.

¹⁸ Goodou manadua dagodo hegau a de gau Israel. E aha, dangada alodahi e gai ina laa mee o ssigidaumaha e dee hai hegau laa hogi i de mommee o ssigidaumaha?

¹⁹ Aahee agu muna e tala adu nei? Au e hai adu nei bolo gai gu sigidaumaha ange gi denga diinonga ni mee dau, aabe denga diinonga ni mee dau?

²⁰ E deai, gai au e hai adu nei bolo sigidaumaha a denga Gentile e hai ange gi denga hagasaalunga baubau, e dee hai ange gi de Maadua. Gai au e dee lodo goodou gi dau ange gi denga hagasaalunga baubau.

²¹ Goodou e dee maua i de unu i de ubu a Tagi Maolunga, gai e unu hogi i de ubu a denga hagasaalunga baubau. Goodou e dee maua i de gaimee i teebele o Tagi Maolunga, gai e gaimee hogi i teebele o denga hagasaalunga baubau.

²² E aha, gidaadeu e llodo e hai gi lodo gaiaa Tagi Maolunga? E aha, gidaadeu e mmahi ange laa i de ia?

²³ “Au e alaange i de hai mee alodahi,” — gai e dee go mee alodahi e haigamaiana mai gi de au. “Au e alaange i de hai mee alodahi,” — gai e dee go mee alodahi e maua i de hai gi hagadagadaga age tangada.

²⁴ Tangada gi dee saalaa donu huu de mee e danuaa ange gi de ia, aagai ia gi saalaa hogi de mee e danuaa ange gi tangada ange laa.

²⁵ Gaina mee alodahi e hagao i de mommee hagao giidagi, gai gi dee siilia hanu muna i hiidinga o tagi o de lodo.

²⁶ Go hiidinga “Henua i lalo ma mee alodahi iai ni mee nii Tagi Maolunga.”

²⁷ Noo dahi dangada tigi hagadonusia laa e gauna adu goe gi dahi daonga, gai koe e lodo e hano, gai koe gaina mee alodahi gu dugu i oo mada i mua, gai koe aude siilia hanu muna i hiidinga tagi o de lodo.

²⁸ (Gai noo dahi dangada e hai adu gi de goe, “Gai nei gu lava i de sigidaumaha ange gi dahi diinonga,” gai koe aude gaina i hiidinga o tangada ne daalaa adu mee laa gi de goe, aama hiidinga o tagi o de lodo;

²⁹ au e dee basa adu i tagi i oo lodo, gai go tagi i de lodo o tangada ange laa.) “Gai gu aha gu hai ai go tagi i de lodo o dahi dangada gee e hagamodu ina mai agu mee e hai i dogu ilaage?”

³⁰ Noo au e hagaahe ange de abodonu gi de Maadua i agu mee e gai, gai gu aha gu hagabaubau ina ai nei au i dagu gai mee aagu e hagaahe ange ai de abodonu?

³¹ Deenei ai, e dee hilihili be goodou e gaimee be unu, aabe ni aha ange oodou e hai, gai goodou haia mee alodahi e hagamahamaha ai de Maadua.

³² Goodou gi dee hagadaemaha ina lodo o de gau Ssuu, be go de gau Greek, aabe go de nohoanga dabu o de Maadua,

³³ bei dagu hai gu hagatale ai laa de hagamalangilangi dangada alodahi i agu mee alodahi e hai; au e dee ssala donu huu de mee e danuaa mai gi de au, aagai go de mee e danuaa ange gi dangada soa, gi hagamouli ai gilaadeu.