1 Corinthians 1 - De Beebaa Dabu

De hagaboo

¹ Mai i daho Paul, taane ne hagahia laa gi se dangada tala niio Klisdo Iesu, bei dagodo de hagatau a de Maadua, aama taadeu daina go Sosthenes.

² Ange gi de nohoanga dabu o de Maadua i Corinth, go gilaadeu gu hagadabu laa i lodo o Klisdo Iesu, ma de hagahi e hai ai ono dangada dabu, madali gilaadeu alodahi e hagahia ange laa de ingoo o Tagi Maolunga go Iesu Klisdo, i mommee alodahi — go Tagi Maolunga olaadeu aama gimaadeu hogi:

³ De abodonu ma de baba mai i daho de Maadua taadeu Damana, aama Tagi Maolunga go Iesu Klisdo gi dagodo i oodou daha.

De hagaahe ange de abodonu

⁴ Au e hagaahe ange de abodonu gi dogu Maadua i masavaa alodahi i oodou hiidinga, go hiidinga de abodonu o de Maadua gu gaavadu laa gi goodou i lodo o Klisdo Iesu.

⁵ Go hiidinga goodou gu ni dangada e lava i mee alodahi i lodo o Klisdo, i oodou 2co 5 20 muna alodahi ma de iloo mee alodahi.

⁶ Gai agoago o Klisdo gu doange danuaa i oodou lodo,

⁷ gai gu deai donu se duuhanga oodou tigi kave i de baasi gi de hagasaalunga, i doodou tali de ahe mai o Iesu Klisdo taadeu Dagi Maolunga.

⁸ Gai go ia e hagammahi ina oodou lodo ga dae ai gi de hagaodi, gai goodou gu dee hagabaubau i de laangi o taadeu Dagi Maolunga go Iesu Klisdo e humai ai.

⁹ De Maadua e hai hegau i de mee abodonu, gai go ia ne hagahia goodou ga hai gi dahi madali dana Dama, go Iesu Klisdo taadeu Dagi Maolunga.

Tee heloongoi o dangada i de nohoanga dabu

¹⁰ Denga daina, au e dangidangi adu i de ingoo o taadeu Dagi Maolunga go Iesu Klisdo, goodou gi hagadau hagaheloongoi i oodou magavaa, gai gi deai donu oodou mee e dee heloongoi ai, gai goodou gu buni i de lodo daudahi ma de maanadu daudahi.

¹¹ Denga daina, hanu dangada mai i de huaabodu o Chloe gu tala mai bolo goodou e hagadaumee i oodou magavaa,

¹² gai aanei oodou mee e hagadaumee ai: dahi e hagadaba, “Au e daudali ange gi a Paul,” gai dahi e hagadaba, “Au e daudali ange gi Apollos,” gai dahi e hagadaba, “Au e daudali ange gi Cephas,”  gai tangada ange laa e hagadaba, “Au e daudali ange gi Klisdo.”

¹³ E aha, de angaanga o Klisdo gu vaevae laa ma gu hai ai hanu hagabuulinga geegee? Go Paul ne daudau laa i de laagau lui i oodou hiidinga? Gai go de ingoo o Paul oodou ne babudaisi ai laa?

¹⁴ Au e hagaahe ange de abodonu gi de Maadua i hiidinga teai ange donu goodou aagu ne babudaisi, gai go Crispus donu huu ma Gaius,

¹⁵ gi deai ai se goodou e maua i de hagadaba bolo ia ne babudaisi i dogu ingoo. (

¹⁶ Au ne babudaisi hogi dangada i de hale o Stephanas. Gai au e dee manadua be e hanu ange dangada aagu ne babudaisi aabe e deai.)

¹⁷ Klisdo tee hai au gi hanadu gi babudaisi ina dangada, gai au gi agoago ina de longo danuaa — gai gi dee agoago i muna heiangi a dangada, gi dee hagangadi mee ina ai ssauaa o de laagau lui o Klisdo.

Klisdo go de heiangi ma ssauaa o de Maadua

¹⁸ Gai agoago o de laagau lui e dagodo bei muna a tangada lodo senga ange gi gilaadeu e maakau, aagai go ssauaa donu o de Maadua mai gi gidaadeu gu hagamouli laa.

¹⁹ Go hiidinga gu sisi e hai ange: “Au e hai naa gi lilo de heiangi o de gau heiangi; ma de hai gi dee sula de iloo mee o de gau iloo mee.”

²⁰ Gai go hee ai naa iai tangada heiangi? Gai go hee ai naa iai tangada sisi? Gai go hee naa iai tangada e hagadau gaavange i muna iainei? Gai de Maadua tee hai laa de heiangi o henua i lalo gi se lodo senga?

²¹ Gai go hiidinga de heiangi o de Maadua, henua i lalo tee maua gi iloo de Maadua i olaadeu heiangi donu huu, gai de Maadua ne malangilangi i de hagamouli dangada gu hagadonusia laa, i muna e deai ono haigamaiana, go mee omaadeu e agoago ai nei.

²² De gau Ssuu e llodo e tilo hanu sauaa, gai de gau Greek e ssala de heiangi,

²³ aagai gimaadeu e agoago dagodo de daudau o Klisdo i de laagau lui, go mee e hagahaisala ina de gau Ssuu, gai ni ngadi muna i daho denga Gentile.

²⁴ Gai ange gi de gau Ssuu ma de gau Greek a de Maadua gu hagahi laa, Klisdo go ssauaa ma de heiangi donu o de Maadua.

²⁵ Gai de lodo senga o de Maadua e kii ange i de heiangi o dangada, gai de baageaa o de Maadua e mmahi ange i mahi o dangada.

²⁶ Denga daina, goodou manadua oodou dagodo i mua doodou hagahia i daho de Maadua, e sogoisi donu huu goodou e dau bolo ni dangada heiangi i daho dangada, e sogoisi hogi goodou e dau bolo e mmahi, gai e sogoisi hogi goodou ni dangada mai i hanu huaabodu o de gau aamua.

²⁷ Aagai de Maadua ne hili gilaadeu e llodo ssenga i henua i lalo e hagadookaa ai gilaadeu e heiangi, gai de Maadua ne hili gilaadeu e baageaa i henua i lalo e hagadookaa ai gilaadeu e mmahi.

²⁸ De Maadua ne hili de gau maolalo ma gilaadeu e hagangadi mee ina i henua i lalo, ma mee gu dee dau, e hai ai gi deai haigamaiana mee e dau iainei,

²⁹ gi deai ai se dangada e maua i de tuhi donu huu ia i mada luu mada o de Maadua.

³⁰ Go ia oodou e mouli ai i lodo o Klisdo Iesu, go ia taadeu heiangi mai i daho de Maadua, go ia taadeu hagaheohi, go ia taadeu hagadabu, gai go ia taadeu hagaola.

³¹ Deelaa ai, gu sisi e hai ange, “Tangada e lodo e tala tuhi dahi mee gi duuhia donu huu Tagi Maolunga.”