1 Chronicles 27 - De Beebaa Dabu

Denga hagabuulinga o de hebagi

¹ Aanei ingoo de gau Israel — go dagi o denga huaabodu, ma dagi o de mano ma dagi o de lau, ma dagi i olaadeu lalo, go dangada e hai hegau ange gi de hodooligi, i hegau alodahi a denga hagabuulinga hebagi e hai hegau, i denga malama alodahi o de ngadau. Gai taelodo o dahi hagabuulinga se 24,000 daane.

² Tagi o tahi hagabuulinga go Jashobeam, tama daane a Zabdiel; gilaadeu e hai hegau i tahi malama. Gai taelodo o dono hagabuulinga se 24,000.

³ Ia se daane de aamuli o Perez, gai go tagi o denga dagi o denga daane hebagi alodahi i tahi malama.

⁴ Tagi o de lua hagabuulinga go Dodai taane Ahoh; gilaadeu e hai hegau i de lua malama. Gai taelodo o dono hagabuulinga se 24,000.

⁵ Tagi o tolu hagabuulinga go Benaiah, tama daane a Jehoiada, tangada haimeedabu; gilaadeu e hai hegau i tolu malama. Gai taelodo o dono hagabuulinga se 24,000.

⁶ Deenei Benaiah, taane mmahi i magavaa o tinodolu, gai go ia delaadeu dagi. Gai dana dama daane go Ammizabad go tagi o dono hagabuulinga.

⁷ Tagi o de haa hagabuulinga go Asahel taina daane o Joab; gilaadeu e hai hegau i de haa malama, gai Zebadiah, dana dama daane, go tagi i ono lalo. Gai taelodo o dono hagabuulinga se 24,000.

⁸ Tagi o de lima hagabuulinga go Shamhuth, taane Izrah; gilaadeu e hai hegau i de lima malama. Gai taelodo o dono hagabuulinga se 24,000.

⁹ Tagi o de ono malama go Ira, tama daane a Ikkesh, taane Tekoa; gilaadeu e hai hegau i de ono malama. Gai taelodo o dono hagabuulinga se 24,000.

¹⁰ Tagi o de hidu hagabuulinga go Helez, taane Pelon, mai i de aamuli o Ephraim; gilaadeu e hai hegau i de hidu malama. Gai taelodo o dono hagabuulinga se 24,000.

¹¹ Tagi o de valu hagabuulinga go Sibbecai taane Hushah, mai de aamuli o Zerah; gilaadeu e hai hegau i de valu malama. Gai taelodo o dono hagabuulinga se 24,000.

¹² Tagi o ssiva hagabuulinga go Abiezer taane Anathoth, mai i de aamuli o Benjamin; gilaadeu e hai hegau i ssiva malama. Gai taelodo o dono hagabuulinga se 24,000.

¹³ Tagi o de madaangahulu hagabuulinga go Maharai taane Netophah, mai i de aamuli o Zerah; gilaadeu e hai hegau i de madaangahulu malama. Gai taelodo o dono hagabuulinga se 24,000.

¹⁴ Tagi o de madaangahulu ma dahi hagabuulinga go Benaiah taane Pirathon, mai i de aamuli o Ephraim; gilaadeu e hai hegau i de madaangahulu ma dahi malama. Gai taelodo o dono hagabuulinga se 24,000.

¹⁵ Tagi o de madaangahulu ma lua hagabuulinga go Heldai taane Netophah, mai i de aamuli o Othniel; gilaadeu e hai hegau i de madaangahulu ma lua malama. Gai taelodo o dono hagabuulinga se 24,000.

Dagi o denga aamuli o Israel

¹⁶ Aanei dagi o denga aamuli o Israel: tagi o de aamuli o Reuben go Eliezer, tama daane a Zicri; tagi o de aamuli o Simeon go Shephatiah, tama daane a Maacah;

¹⁷ tagi o de aamuli o Levi go Hashabiah, tama daane a Kemuel; tagi o de aamuli o Aaron go Zadok;

¹⁸ tagi o de aamuli o Judah go Elihu, dahi daina o David; tagi o de aamuli o Issachar go Omri, tama daane a Michael;

¹⁹ tagi o de aamuli o Zebulun go Ishmaiah, tama daane a Obadiah; tagi o de aamuli o Naphtali go Jeremoth, tama daane a Azriel;

²⁰ tagi o de aamuli o Ephraim go Hoshea, tama daane a Azaziah; tagi o dahi luu baasi de aamuli o Manasseh go Joel, tama daane a Pedaiah;

²¹ tagi o dahi luu baasi de aamuli o Manasseh e nnoho laa i Gilead go Iddo, tama daane a Zechariah; tagi o de aamuli o Benjamin go Jaasiel, tama daane a Abner;

²² tagi o de aamuli o Dan go Azarel, tama daane a Jeroham. Aanei ingoo o dagi o denga aamuli o Israel.

²³ Gai David tee dau denga daane tigi madalua olaadeu ngadau, go hiidinga Tagi Maolunga gu lava i de hagatoo donu bolo ia e hai naa de gau Israel gi soa bei de lagolago o denga heduu.

²⁴ Joab tama daane a Zeruiah ne daamada de dau denga daane, gai tee odi i dana dau. Gai de Maadua ne hagaduasala Israel i hiidinga de dau o dangada, gai taelodo nei tee sisi i lodo beebaa e daohi ai laa hegau a de hodooligi go David.

Dangada e diiloo ange goloa o de hodooligi

²⁵ Azmaveth tama daane a Adiel, go taane e diiloo ange mommee doange goloa o de hodooligi. Gai Jonathan tama daane a Uzziah, go taane e diiloo ange mommee doange mee i denga vaaenga, ma aduhale nnui, ma aduhale vaaligiligi, aama denga hale dagitilo.

²⁶ Tagi o de gau hai hegau i lodo veelenga go Ezri, tama daane a Kelub.

²⁷ Shimei taane Ramah, go taane e diiloo ange denga veelengaa grape. Zabdi taane Shepham, go taane e diiloo ange hua o denga veelengaa grape i mommee e doange ai uvaini.

²⁸ Tagi o denga veelengaa olive ma sycamore i mommee iai duuduu paa i lalo go Baal-Hanan taane Geder. Tagi o denga mommee e doange ai lolo go Joash.

²⁹ Tagi o denga manu haangai i de mommee iai helii i Sharon go Shitrai taane Sharon. Tagi o denga kaau i lodo geelonga go Shaphat tama daane Adlai.

³⁰ Tagi o denga gamelo go Obil taane de aamuli o Ishmael. Tagi o denga donkey go Jehdeiah taane Meronoth.

³¹ Tagi o denga hagabuulingaa ssiibi go Jaziz taane Hagar. Aanei denga dagi alodahi e diiloo ange mee a de hodooligi go David.

³² Gai Jonathan, taina daane o tamana o David, se daane hagasaele niio de hodooligi, ia se daane e donu ange gi mee gai se dangada sisi; go gilaau ma Jehiel, tama daane a Hacmoni e diiloo ange dama a de hodooligi.

³³ Ahithophel se daane hagasaele niio de hodooligi, Hushai taane Erek go soa o de hodooligi.

³⁴ Gai Jehoiada tama daane a Benaiah ma Abiathar ne sui tuulanga o Ahithophel. Gai Joab go tagi o de hagabuulinga hebagi o de hodooligi.