1 Chronicles 20 - De Beebaa Dabu

De hagadee kii o Rabbah

¹ De masavaa o de matili age, go de masavaa o denga hodooligi e hulo ai e hebagi, gai a Joab ne kave denga daane hebagi ga hulo gi de hebagi. Gai gilaadeu ne hulo ga oha de henua o de gau Ammon, gai gilaadeu ne duuli luu baasi de aduhale go Rabbah. Aagai David e noho i Jerusalem. Gai a Joab ne hebagi ga hagadee kii ma de oha de aduhale go Rabbah.

² Gai David ne kave gee de hau i honga de biho o delaadeu hodooligi, gai taemaha o de hau laa se dahi talent goolo, gai e hagalaagii i hadu hagamogomogo, gai de hau laa gu gaavange gi honga de biho o David. Gai ne lagolago ana goloa ne kave gee mai i de aduhale laa.

³ Gai ia ne kave dangada i de aduhale laa, ga hagahai hegau gilaadeu i denga soaa ma piigi iron aama denga hagadaguu. Deenei de hai a David ne hai ai dangada i denga aduhale alodahi o de gau Ammon. Gai David ma dono hagabuulinga hebagi alodahi ne aahe gi Jerusalem.

De daa ga maakau o denga doa

⁴ Dua mee laa gai gilaadeu ne hebagi ange hogi gi de gau Philistia i Gezer; gai Sibbecai, taane Hushah, ne daa Sippai, dahi daane mai i de aamuli o denga doa, gai de gau Philistia tee maua gi kii.

⁵ Gai gilaadeu ne aahe ange hogi ga hebagi ange gi de gau Philistia, gai Elhanan, tama daane a Jair, ne daa ga magau Lahmi, taina daane o Goliath taane Gath. Gai de gau o dono dao e laumalie bei de laagau o de mee llanga malo.

⁶ Gai gu hai ange hogi de hebagi i Gath; gai e dahi doa i kilaa e ono ono madannia ma dabuvae, se madalua ma haa alodahi ono madannia ma dabuvae. Ia se daane hogi mai i de aamuli o Rapha.

⁷ Ia ne basa hagamaolunga i de gau Israel, gai Jonathan, tama daane a Shimea, taina daane o David, ga daa ia gu magau.

⁸ Denga daane nei ni daane mai i de aamuli o denga doa i Gath; gai David ma ono daane ne daa gilaadeu ga maakau.