Wayuotanin 9 - Dakota Wowapi Wakan Kin

¹ Unkan maḣpiya ohnihde icizaptan kin he yahoton, qa iho, wacanḣpi maḣpiya kin eciyatanhan maka kin ahinḣpaya wanmdaka; unkan he makoḣdoka ceteta wanica tiyopa iyuḣdoke kin qupi.

² Qa makoḣdoka ceteta wanica he tiyopa kin yuḣdoka, unkan makoḣdoka kin etanhan śota hiyu, peta on maza śdoyapi tanka ḣinca etanhan śota uye cin iyececa; qa wośbe etanhan śota kin he on anpetu wi kin okotonyan kici aotpaza.

³ Unkan śota kin etanhan psipsicadan au, maka kin ekta, qa wicowaśake wicaqupi, wamduśka maka akan un kin wicowaśake yuhe cin he iyececa.

⁴ Qa wato maka aicage cin, taku toya un, qa can kin owasin kiuniye śni wicaśipi, tuka wicaśta kin tona itepi kin en Wakantanka tawowapetogton yuhapi śni kin henana.

⁵ Qa hena wicaktepi kta e wicaqupi śni, tuka wi zaptan hehanyun kakiświcaye kta e wicaqupi. Unkan kakiśyapi kin he wamduśka wicaśta cawicape cinhan kiuniyanpi kin he iyececa.

⁶ Unkan anpetu kin hena en wicaśta wiconṭe akitapi kta, tuka iyeyapi kte śni, qa ṭapi cinpi kta, tuka wiconṭe e nawicakicipe kta.

⁷ Psipsicadan kin hena ouncage kin śuktanka ozuye on wiyeya ehnag najinpi kin he iyececa; qa pa akan mazaskazi wateśdake iyececa wapaha kitonpi, qa itepi kin wicaśta ite kin iyececa.

⁸ Qa paha kin he winoḣinca paha iyecen yuhapi, qa hi kin hena mnaja hi kin iyececa.

⁹ Qa maza sapa maku akaḣpe iyececa maku akaḣpe tonpi; qa ḣupahu ḣmuḣmunyan he ozuye canpahmihma, qa śuktanka ota ozuye ekta nawang yapi kin he iyececa.

¹⁰ Wamduśka kin iyecen sinte yuhapi, qa sinte kin en icape yuke c̣a, wi zaptan hehanyan wicaśta kin kiuniwicaye kta okihipi.

¹¹ Unkan wicaśtayatapi wan yuhapi, wośbe ceteta wanica etanhan ohnihde, Hebrew iapi kin eciyatanhan Abaddon eciyapi, qa Helenes iapi kin eciyatanhan Apoluon eciyapi kin hee.

¹² Wicokakije kin wanji wanna henakeca, qa ito he iyohakam wicokakije nom u kta ce.

¹³ Unkan hehan maḣpiya ohnihde iciśakpe kin yahoton, qa mazaskazi wahna wośnapi Wakantanka itokam wanke cin he he topa kin etanhan wicaho wan taninyan nawaḣon:

¹⁴ He maḣpiya ohnihde iciśakpe maza yahotonpi tanka yuhe cin he heciya; Maḣpiya ohnihde topa wakpa tanka Yuphrate kin ekta wicakaśkapi kin hena wicakiyuśka wo.

¹⁵ Hehan maḣpiya ohnihde topa kin wicakiyuśkapi; hena e wancadan ape cin, qa anpetu wanji, qa wi wanji, qa omaka wanjidan hehanyan wiyeya ehnag unpi, wicaśta iciyamnimni kin wicaktepi kta e heon.

¹⁶ Unkan ozuye kin śuktanka akan iyotankapi kin hena kektopawinge kektopawinge opawinge nonpa; hena wicayawapi kin nawaḣon.

¹⁷ Qa wowanyake kin en śuktanka kin hecen wanwicamdaka, qa wicaśta akan iyotankapi kin hena maku akaḣpe śaśa, toto, qa zizi yuhapi. Unkan śuktanka pa kin he mnaja pa kin iyececa, qa ipi kin etanhan peta, qa śota, qa caḣdi on kagapi kin hiyu.

¹⁸ Unkan hena yamni, peta, qa śota, qa caḣdi on kagapi, hena ipi kin etanhan hiyu qon he on wicaśta iciyamnimni kin wicaktepi.

¹⁹ Wowaśake yuhapi kin he ipi kin ohna qa sintepi kin ohna; sintepi kin hena wamduśka kin iyececa, qa pa yukan ece, qa hena on wakiuniyapi ece.

²⁰ Unkan wicaśta tona wicokakije kin hena on wicaktepi śni kin hena iye napepi wicoḣan kin on iyopeic̣iyapi śni, hecen taku wakan śicapi kin ohowicadapi, qa mazaskazi, qa mazaska, qa mazazi, qa inyan, qa can wakagapi ohodapi ece kin ayuśtanpi śni; hena wawanyake śni, qa winaḣon śni qa mani okihi śni.

²¹ Qa nakun tinwicaktepi, qa wapiyapi, qa wiinaḣmanpi, qa wamanonpi econpi kin on iyopeic̣iyapi śni.