Wayuotanin 8 - Dakota Wowapi Wakan Kin

¹ Unkan ipuspe iśakowin kin yuḣdoke c̣ehan, maḣpiya ekta wihiyayedan wancadan ape cin hanke hehanyan inina yukanpi.

² Unkan maḣpiya ohnihde śakowin Wakantanka itokam najinpi kin wanwicamdaka; qa maza yahotonpi tanka śakowin wicaqupi.

³ Hehan maḣpiya ohnihde wan tokeca u qa wahna wośnapi kin ekta hinajin, mazaskazi oizinye wan yuha: Unkan taku waśtemna ota qupi kin he, tona owotanna un kin owasin wocekiye tawapi kin ahna, mazaskazi wahna wośnapi kin oiyotanke kin itokam wanke cin he akan wośna kta e heon.

⁴ Unkan maḣpiya ohnihde nape kin etanhan śota izite cin, tona owotanna un wocekiye tawapi kin hena ko, Wakantanka itokam wankantkiya aya.

⁵ Unkan maḣpiya ohnihde kin he oizinye kin icu, qa wahna wośnapi peta kin etanhan oju, qa maka kin ekta eḣpeya; unkan iho, wicaho, qa wakinyan hotonpi, qa wakanhdi, qa maka śkanśkan.

⁶ Unkan maḣpiya ohnihde śakowinpi maza yahotonpi tanka yuhapi kin hena yahotonpi kta e hduwiyeyapi.

⁷ Unkan maḣpiya ohnihde tekaheya kin yahoton, qa wasu peta ko we icicahiyapi maka kin ahinhe: Qa can iyamnimni kin ḣuḣnaga, qa wato kin iyuḣpa ḣuḣnaga.

⁸ Unkan maḣpiya ohnihde iyokihe kin he yahoton, qa taku ḣe wan tanka iyececa peta on itkonyahe cin he miniwanca kin en iyoḣpeyapi: Qa miniwanca kin hanke iyamni we icaga:

⁹ Qa taku miniwanca oicage ni un kin hanke iyamni ṭapi, qa wita wata kin iyamnimni kin owihanke yapi.

¹⁰ Unkan maḣpiya ohnihde iciyamni kin he yahoton, qa wicanḣpi wan tanka ideyapi petijanjan iyececa, maḣpiya kin eciyatanhan hinḣpaye c̣a wakpa iyamnimni kin ahinḣpaye c̣a mini ḣdoka kin en.

¹¹ Wicanḣpi kin he, Yatkepicaśni, eciyapi. Unkan mini yatkepica śni icage c̣a wicaśta ota mini kin on ṭapi, pa icage cin heon.

¹² Unkan maḣpiya ohnihde icitopa kin he yahoton; unkan anpetu wi hanke iyamni, qa hanyetu wi hanke iyamni, qa wicanḣpi iyamnimni kin apapi, qa hecen hanke iyamni otpaza icu, qa anpetu kin hanke iyamni hehanyan iyoyanpa śni un, qa hanyetu kin nakun iyececa.

¹³ Hehan wanmdake c̣a nawaḣon, maḣpiya ohnihde wan maḣpiya cokaya tanhan kinyan iyaye c̣a hotankakiya heya, Wicokakije, wicokakije, wicokakije, tona maka ounyanpi kin hena en, maza yahotonpi tanka hotonpi kin maḣpiya ohnihde yamni yahotonpi kte cin heon etanhan.