Wayuotanin 7 - Dakota Wowapi Wakan Kin

¹ Unkan hena iyohakam maḣpiya ohnihde topa maka oise topa kin en inajinpi kin wanwicamdaka, maka tate ouye topa kin yuhapi, hecen maka qa miniwanca qa can hiyeye cin wanjidan atateyanpa kte śni.

² Hehan maḣpiya ohnihde tokeca wan wiyohiyanpa tanhan wankantkiya u kin wanmdaka, he Wakantanka ni un ipuspe tawa kin yuhe c̣a maḣpiya ohnihde topa maka miniwanca ko kiuniyanpi kta e wicaqupi qon hena hotankakiya hoyewicakiye;

³ Qa heya, Maka, qa miniwanca, qa can hiyeye cin kiuniyanpi śni po, Wakantanka unkitawapi taokiye wicaye cin itepi kin en wapetog wicuntonpi śni kin hehanyan.

⁴ Unkan tona wapetog wicatonpi wicayawapi kin nawaḣon, Israel cincapi wicoun owasin etanhan kektopawinge opawinge sam kektopawinge wikcemna topa sanpa kektopawinge topa wapetog wicatonpi.

⁵ Juda wicoun kin etanhan kektopawinge ake nom wapetog wicatonpi; qa Ruben wicoun kin etanhan kektopawinge ake nom wapetog wicatonpi; qa Gad wicoun kin etanhan kektopawinge ake nom wapetog wicatonpi;

⁶ Aser wicoun kin etanhan kektopawinge ake nom wapetog wicatonpi; qa Nepthalim wicoun kin etanhan kektopawinge akenonpa wapetog wicatonpi; qa Manasse wicoun kin etanhan kektopawinge ake nom wapetog wicatonpi;

⁷ Sumeon wicoun kin etanhan kektopawinge ake nom wapetog wicatonpi; qa Lewi wicoun kin etanhan kektopawinge ake nom wapetog wicatonpi; qa Isakar wicoun kin etanhan kektopawinge ake nom wapetog wicatonpi;

⁸ Zabulon wicoun kin etanhan kektopawinge ake nom wapetog wicatonpi; qa Joseph wicoun kin etanhan kektopawinge ake nom wapetog wicatonpi; qa Benjamin wicoun kin etanhan kektopawinge ake nom wapetog wicatonpi.

⁹ Hena taku kin iyohakam wanmdake c̣a, iho, wicota ḣinca, wicayawa kta tuwedan okihi śni, oyate hiyeye cin, qa wicoun kin, wicowazi kin, iapi ko owasin otoiyohi etanhanpi, oiyotanke kin itokam, qa Amnos kin itokam najinpi, wokoyake ska ece koyakapi, qa can wapa nape ohna yuhapi;

¹⁰ Qa hotankakiya hotaninpi qa heyapi, Wakantanka unkitawapi oiyotanke kin akan kiyotanke cin hee, Amnos kin kici, niwicaye yuha nunwe.

¹¹ Unkan maḣpiya ohnihde owasin oiyotanke kin okśan, qa hunkawicayapi taku ni un topa kin hena ko wicihdukśan inajinpi, qa oiyotanke kin itokam ite makipusdiya eḣpeic̣iyapi, qa Wakantanka ohodapi;

¹² Qa heyapi, Amen; Wowaśte, qa wowitan, qa woksape, qa wopida, qa woyuonihan, qa wowaśake, qa wicookihi henakiya Wakantanka unkitawapi kin owihanke wanin yuha nunwe. Amen.

¹³ Hehan hunkawicayapi kin etanhan wanji waayupte c̣a, Wokoyake ska koyakapi kin hena tuwepi, qa tokiya tanhan upi he, emakiya.

¹⁴ Unkan, Itancan, niye sdonyaya ce, epa. Unkan hemakiya; Wicokakije tanka etanhan upi qon dena eepi, unkan wokoyake hdujajapi, qa Amnos we kin on hduskapi.

¹⁵ Heon etanhan Wakantanka oiyotanke kin itokam yakonpi, qa tipi wakan iye tawa kin ohna anpetu hanyetu ko ohodapi ece; qa tuwe oiyotanke kin akan kiyotanke cin he hena wicacokaya ounye kta.

¹⁶ Qa tohinni wotektehdapi kte śni, qa ipuzapi kte śni, qa anpetu wi kin qa taku kata aśpanwicaye kte śni.

¹⁷ Tuka Amnos kin, oiyotanke cokaya un kin he, hena wonwicaye c̣a, miniḣdoka ni un kin icahda yus awicaye kta: qa hena iśtapi kin etanhan Wakantanka iśtamnihanpe kin owasin wicakipakinte kta.