Wayuotanin 6 - Dakota Wowapi Wakan Kin

¹ Unkan Amnos kin ipuspe tokaheya yuḣdoke c̣ehan wanmdaka; unkan taku ni un tope kin wanji, wakinyan hotonpi kin iyecen hotanin qa, U qa wanyaka wo, eya nawaḣon.

² Unkan wanmdake c̣a, ito, śuktanka ska wan tuwe akan iyotanke cin he itazipa wan yuha; qa wateśdake wan qupi; unkan ohiye c̣a, ohiye kta e iyaya.

³ Unkan ipuspe inonpa yuḣdoke c̣ehan, taku ni un icinonpa kin he, U qa wanyaka wo, eya nawaḣon.

⁴ Unkan śuktanka wan tokeca hin śa kin he hinanpa; unkan tuwe akan iyotanke cin he maka kin etanhan wookiye icu kta e qupi, hecen otoiyohi kiciktepi kta; qa nakun maza sagye wan tanka qupi.

⁵ Unkan ipuspe iyamni kin yuḣdoke c̣ehan, taku ni un wiciyamni kin he, U qa wanyaka wo, eya nawaḣon. Unkan wanmdake c̣a ito śuktanka sapa wan; qa tuwe akan iyotanke cin he nape ohna taku on tke utapi wanji yuha.

⁶ Unkan taku ni un topa kin cokaya tanhan wicaho wan nawaḣon, Aguyapi iyutapi wanji he kaśpapidan wanjidan, qa śuktanka tawote iyutapi nonpa he kaśpapidan wanjidan kta; qa wihdi miniśa ko ihnuhan kiuniyaye cin, eya.

⁷ Unkan ipuspe itopa kin yuḣdoke c̣ehan, taku ni un icitopa kin he ho kin nawaḣon; U qa wanyaka wo, eya.

⁸ Unkan wanmdake c̣a ito śuktanka wan hin san; tuwe akan iyotanke cin he Wiconṭe eciyapi, qa Wicaḣapi kin he ihakam iyaya. Unkan maka hanke itopa kin hehanyan maza sagye, qa wicaakiḣan, qa wiconṭe, qa wamanica maka akan un kin hena on wicaśta wicakte kta e wowaśake qupi.

⁹ Unkan ipuspe izaptau kin yuḣdoke c̣ehan, wahna wośnapi kin ihukuya tona Wakantanka oie, qa iye waayataniupi kin he on wicaktepi qon hena nagipi kin wanwicamdaka.

¹⁰ Hena hotankakiya hotaninpi qa heyapi, Itancan wakan, qa wicaka, tohanyan tona maka kin akan yukanpi kin wicadaco śni qa we unkitawapi kin on toyec̣on śni he.

¹¹ Unkan hena otoiyohi wokoyake ska wicaqupi, qa ptecedan ape yukanpi kta, tona om taokiye unpi qon, qa iye hunkawanjitkupi kin, iś iyepi iyecen wicaktepi kte cin he yuśtanpi kta hehanyan, kewicakiyapi.

¹² Unkan ipuspe iśakpe kin yuḣdoke c̣ehan, wanmdake c̣a ito maka śkanśkan tanka, qa anpetu wi kin sapa aya, wahinske ojuha kin iyececa, qa hanyetu wi kin iś we iyecen icaga.

¹³ Qa maḣpiya wicanḣpi kin makata hinḣpayapi, witanśna hu wan tateyanpa tanka kahuhuza eca waskuyeca śtunkadan keś paḣpa ece kin he iyececa.

¹⁴ Qa wowapi pehan ehnakapi kin he iyecen maḣpiya kin tanin śni iyaye c̣a, ḣe otoiyohi, wita otoiyohi ko yutokan iyeyapi.

¹⁵ Qa maka wicaśtayatapi, qa wicaśta tankinkinyanpi, qa wicaśta watonpika, qa wicaśta itancanpi, qa wicaśta waśakśakapi, qa wicaśta wowidake unpi kin otoiyohi, qa ihduhapi kin otoiyohi, makoḣdoka qa ḣe imnija kin ehna naic̣iḣmanpi;

¹⁶ Qa inyan ḣe imnija ko hena heciyapi, Unkahinḣpayapi, qa tuwe oiyotanke kin akan kiyotanke cin itehnake kin etanhan, qa Amnos kin wocanniye tawa kin etanhan anaunḣman po:

¹⁷ He wośihda tawa anpetu tanka kin wanna hi; unkan tuwe najin okihi kta he.