Wayuotanin 5 - Dakota Wowapi Wakan Kin

¹ Unkan tuwe oiyotanke kin akan kiyotanke cin he etapa kin eciyatanhan wowapi wan mahen tanhan qa akapatanhan owapi, qa ipuspe śakowin on apuspapi kin he wanmdaka.

² Qa maḣpiya ohnihde waśaka wan wanmdaka, he hotankakiya hotanin qa, Wowapi kin he tuwe yumdaye c̣a ipuspe śakowin kin yuḣdoke kta okihi he, eya.

³ Unkan maḣpiya kin ekta, qa maka kin akan, qa maka kin ihukuya tanhan tuwedan wowapi kin he yumdaye c̣a, en wanyaka okihi śni.

⁴ Hehan nina waceya, tuwe wowapi kin yumdaye c̣a yawa, qa en wanyake kta iyekicihantu kin tuwedan iyeyapi śni kin heon etanhan.

⁵ Unkan hunkawicayapi kin wanji hemakiya; Ceye śni wo, ito Juda wicoun kin etanhan mnaja kin, Dawid hutkan kin hee wowapi kin yumdaye c̣a, ipuspe śakowin kin yuḣdoke kta okihi.

⁶ Hehan wanmdake c̣a, iho, oiyotanke kin cokaya, qa taku ni un topa, hunkawicayapi ko wicacokaya Amnos wan najin, wośnapi iyececa, he śakowin iśta śakowin ko yukan, Wakantanka taniya śakowin maka kin owancaya ye wicayapi kin hena eepi.

⁷ He en hi, qa tuwe oiyotanke kin akan kiyotanke cin nape etapa kin etanhan wowapi qon icu.

⁸ Unkan wowapi kin he icu qehan, taku ni un topa kin, qa hunkawicayapi wikcemna nonpa sam topa kin hena Amnos kin itokam makata eḣpeic̣iyapi, otoiyohi candowankiyapi hduhapi, qa nakun mazaskazi wiyatke taku waśtemna on ojudan, wicaśta waśte wocekiye tawapi kin hee:

⁹ Qa odowan teca wan ahiyayapi, qa heyapi; Wowapi kin iyacu, qa ipuspe kin duḣdoke kta e iyenihantu ce, waniyuśnapi qa Wakantanka ekta niwe kin on opeunyakitonpi, wicoun otoiyohi etanhan, qa iapi kin, qa wicowazi kin, qa oyate kin otoiyohi etanhan;

¹⁰ Qa Wakantanka ekta wicaśtayatapi wawayuśnapi ko unyakagapi; unkan maka kin oununyanpi kta ce.

¹¹ Unkan wanmdake c̣a, oiyotanke kin ihdukśan, qa taku ni unpi kin hunkawicayapi ko wicihdukśan, maḣpiya ohnihde woyawa tanka ota, qa kektopawinge ece kektopawinge, hena hopi kin nawaḣon;

¹² Hotankakiya heyapi, Amnos wośnapi qon he wowaśake, qa woyuha, qa woksape, qa wicookihi, qa wootanin, qa wowitan, qa wowaśte henakiya icu kta okihi ce.

¹³ Unkan taku maḣpiya ekta un, qa taku maka akan un, qa taku maka ihukuya tanhan un, qa taku miniwanca mahen un, hena taku ohnaka ko owasin kaken eyapi nawaḣon; Tuwe oiyotanke kin akan kiyotanke cin Amnos kin kici wowaśte kin, wootanin kin, wowitan kin, qa wowaśake kin henakiya owihanke wanin tawapi nunwe.

¹⁴ Unkan taku ni un topa kin hena, Hecetu nunwe, eyapi; qa hunkawicayapi wikcemna nonpa sam topa kin hena makata eḣpeic̣iyapi, qa tuwe ohinniyan ni un kin he ohodapi.