Wayuotanin 4 - Dakota Wowapi Wakan Kin

¹ Hena iyohakam wanmdake c̣a ito maḣpiya kin ekta tiyopa wan yuḣdokapi; qa wicaho tokaheya nawaḣon kin he maza yahotonpi tanka kin iyececa, he omakiye c̣a heya, Deciya u wo, dena iyohakam taku u kte cin hena wanyagciciye kta ce.

² Unkan kohanna Woniya kin en waun; qa ito, maḣpiya kin ekta oiyotanke wan ecen hdepi, qa tuwe akan iyotankehan yanka.

³ Tuwe akan iyotanke cin he iwanyakapi kin inyan teḣika, iyaspis qa saḣdinos iyececa; qa oiyotanke kin ihdukśan wihmunke wan hmihbeya yanka, smaḣagdos inyan kin iyececa.

⁴ Qa oiyotanke kin ihdukśan oyanke wikcemna nonpa sam topa wanka; qa oyanke kin hena en hunkawicayapi wikcemna nonpa sam topa iyotankapi, qa wokoyake ska koyakapi e wanmdaka; qa pa kin en mazaskazi teśdakapi.

⁵ Unkan oiyotanke kin etan han wakanhdi qa wakinyan hotonpi qa wicaho hiyu; qa oiyotanke kin itokam petijanjan śakowin peta ece ideyapi, hena Wakantanka taniya śakowin kin heepi.

⁶ Unkan oiyotanke kin itokam mde wan wanka janjan seca, caḣtowata iyecen kohdi; qa oiyotanke kin cokaya, qa oiyotanke kin ihdukśan, taku ni un topa kin yukanpi, hena e tokapatanhan qa hektapatanhan ko iśta ojupidan.

⁷ Unkan taku ni un tokaheya kin he mnaja ouncage kin iyececa; qa taku ni un iyokihe kin he tatanka ouncage kin iyececa; qa taku ni un iciyamni kin he wicaśta itohnake kin iyecen yuha; qa taku ni un icitopa kin he wanmdi kinyan un ouncage kin iyececa.

⁸ Qa taku ni un topa kin otoiyohi ḣupahu śakpekpe yuhapi, qa ihdukśan, qa mahen tanhan iśta ojupidan; qa anpetu hanyetu ko ayaśtan śni hecen eyapi, Wakan, Wakan, Wakan, Itancan Wakantanka Iyotan waśaka, tuwe un, qa un qon, u kte cin hee ce.

⁹ Qa tohan taku ni un topa kin, tuwe oiyotanke kin akan kiyotanke c̣a owihanke wanin ni un kin he wowitan, qa wootanin, qa wopida qupi kinhan;

¹⁰ Hehan hunkawicayapi wikcemna nonpa sam topa kin hena, tuwe oiyotanke kin akan kiyotanke cin he itokam makata eḣpeic̣iyapi, qa tuwe ohinniyan ni un kin ohodapi, qa wateśdake tawapi kin oiyotanke kin itokam eḣpekiyapi, qa hecen eyapi;

¹¹ Itancan, wowitan, qa wootanin, qa wowaśake iyacu kta e iyenihantu, taku owasin yakage c̣a nitoiyokipi kin on owasin kagapi qa ecen han.