Wayuotanin 3 - Dakota Wowapi Wakan Kin

¹ Unkan Sardis ekta okodakiciye ohnihde yuhapi kin he ecen wowapi kicaga wo; Tuwe Wakantanka Taniya śakowin kin hena, qa wicanḣpi śakowin hduhe cin he hecen eya; Nioḣan kin sdonwaya, caje wan duha, yani kin hee, tuka niṭa.

² Kiktahan un, qa taku tona nahaḣin en un qa ṭe kte cin hena hduwaśaka wo; Wakantanka itokam nioḣan kin owotanna e iyewaye śni.

³ Heon token iyacu, qa nayaḣon kin kiksuye c̣a, ṭinsa yuze c̣a, ihduecetu wo. Kiktahan yaun śni kinhan wamanon sa iyecen ekta ciu kta, qa tohan ekta cihi kte cin he sdonyakiye kte śni.

⁴ Tuka Sardis ekta wicacaje tonana duha, hena e tawokoyake kin hduśapapi śni; qa ska ihduzapi ecen mici manipi kta; he iyehantupi nakaeś.

⁵ Tuwe ohiye cinhan he wokoyake ska koyake kta, qa iye caje kin wiconi wowapi kin etanhan wapejuju kte śni, tuka he caje kin Ate itokam, qa ohnihde wicaye cin hena wicitokam omdake kta.

⁶ Tuwe noge yukan hecinhan taku Woniya kin okodakiciye kin ewicakiye cin he naḣon kta.

⁷ Unkan Philadelphia ekta okodakiciye ohnihde yuhapi kin he ecen wowapi kicaga wo; Tuwe wakan qa wicaka un, qa Dawid tiyopa iyuḣdoke kin yuhe c̣a, yuḣdoka eca tuwedan ecen iyeye śni, qa ecen icu eca tuwedan yuḣdoke śni ece kin hee hecen eya;

⁸ Nioḣan kin sdonwaya, tiyopa wan yuḣdokapi ecen he cin he nitokam ewahde, qa tuwedan ecen iyeya okihi śni; wowaśake cistinna duhe c̣a mioie kin yuha yaun, qa micaje kin eḣpemayaye śni.

⁹ Ito, Satan omniciye tawa kin etanhanpi Juda wicaśta keic̣iyapi, tuka hecapi śni, qa itonpi śni kin, hena iho, upi, qa nisiha kin itokam canpeśka makehde inajin wicawakiye kta, qa waśtecicida e sdonyapi kta.

¹⁰ Woape oie mitawa kin he awandake cin, heon tohan taku wawiyutanyan un kin tona maka owancaya unpi kin iyutanwicaye kta u kinhan, hehan awanciyake kta.

¹¹ Iho ecadan wau kta; taku duhe cin he ṭinsa yuza wo, hecen ẉateśdake nitawa kin tuwedan nici kte śni.

¹² Tuwe ohiye cinhan, he tipi wakan mita Wakantanka tawa kin ohna can ihupa wan wakage kta, qa icimana tankan ye kte śni; qa he akan mita Wakantanka caje kin owawa kta, qa mita Wakantanka otonwe tawa caje kin, Jerusalem teca kin hee, maḣpiya kin etanhan Wakantanka mitawa kin eciyatanhan u kin hee, qa nakun micaje teca kin.

¹³ Tuwe noge yukan hecinhan, taku Woniya kin okodakiciye kin ewicakiye cin he naḣon kta.

¹⁴ Unkan Laodikia ekta okodakiciye ohnihde yuhapi kin he ecen wowapi kicaga wo; Tuwe Amen eciyapi, waayatanin owotanna, qa wicaka, Wakantanka woicage tawa otokahe kin hee hecen eya;

¹⁵ Nioḣan kin sdonwaya, sni qa ipiga unmana ecen yaun śni, sni qa ipiga unma tukte e ecen yaun kta wacin;

¹⁶ Tuka iniṭeca, qa sni ipiga kici unmana ecen yaun śni, heon mii kin etanhan icihdepe kta.

¹⁷ Wimajica, qa woyuha ota waton, qa takudan imakakije śni, keha ce; qa inicakije c̣a, onniśike c̣a, niwaḣpanica, qa iśta nigonge c̣a, tanconikadan e sdonyakiye śni.

¹⁸ Kaken wahokonciciya ce, mazaskazi peta on yuecedan kagapi kin he opemicaton wo, winijica kta ce; qa wokoyake ska, kodake kta e heon, hecen tanconikadan on winiśtece cin he tanin kte śni; qa wiciśta wihdi kin, niiśta iyakiun kta, hecen wawandake kta.

¹⁹ Tona cantewicawakiye cin hena wahokonwicawakiye c̣a, iyopewicawakiya ece. Heon mniheic̣iye c̣a ihduecetu wo.

²⁰ Ito, tiyopa kin en nawajin qa wakabubu ece; tuwe miho kin naḣon, qa tiyopa hduḣdoke cinhan, he ekta tin hibu, qa kici wawate kta, qa iś eya mici wote kta.

²¹ Tuwe ohiye cinhan he oiyotanke mitawa kin akan mici iyotanke wakiye kta, miye ohiwaye c̣a Ate oiyotanke tawa kin akan weci imdotanke cin he iyecen.

²² Tuwe noge yukan hecinhan, taku Woniya kin okodakiciye kin ewicakiye cin he naḣon kta.