Wayuotanin 22 - Dakota Wowapi Wakan Kin

¹ Hehan wakpa wan wiconi mini ska kin, caḣtowata iyecen ska, he makipazo, he Wakantanka qa Amnos oiyotanke tawa kin etanhan kaduza.

² Unkan canku cokaya, qa wakpa kin anokatanhan wiconi can kin icaga, he waskuyeca ocaje ake nonpa aicaga, wi otoiyohi waskuyeca aicaḣya ece; qa can wapa kin hena oyate kin okizi wicaya ece.

³ Unkan heciya wicayuśice wanice kta; tuka Wakantanka oiyotanke tawa kin he, qa Amnos tawa kin hen he kta, qa taokiye kin hena tawoahope kin ecen econpi kta:

⁴ Qa itohnake kin wanyakapi kta, qa caje kin iye itepi kin en yuhapi kta.

⁵ Qa heciya hanyetu wanice kta; qa petijanjan qa anpetu wi iyoyanpa kin he cinpi śni; Itancan Wakantanka iyoyamwicaya ece; qa ohinniyan owihanke wanin wicaśtayatapi ounyanpi kta.

⁶ Hehan hecen emakiya, Wicoie kin dena wacinyepica qa wicakapi. Qa Itancan Wakantanka wicaśta wokcan wakan tawapi kin hee, taku ecadan u kte cin hena taokiye kin owicakiyake kta e on ohnihde tawa kin u śi.

⁷ Iho ecadan wau kta. Tuwe wowapi kin de wowiyukcan oie kin tanyan yuhe cinhan he yawaśtepi ce.

⁸ Unkan Johannes he miye e hena wanmdake c̣a nawaḣon. Hena nawaḣon, qa wanmdaka; unkan maḣpiya ohnihde hena wanyagmakiye cin he siha kin en makata eḣpemic̣iye, ohowada kta tuka.

⁹ Hehan hemakiya, Ihnuhan hecanon kin; miś eya ookiye cici waun, qa nihunkawanji wicaśta wokcanpi kin etanhan waun, qa tona wowapi kin de oie yuhapi kin hena owicawapa; Wakantanka ohoda wo.

¹⁰ Hehan ake hemakiya, Wowapi kin de wowiyukcan oie kin hena sutaya apuspe śni wo. Wanna ecadan kta ce.

¹¹ Tuwe owotanna śni kin ohinniyan owotanna kte śni, qa tuwe aśape cin he ohinniyan aśapa un nunwe; qa tuwe owotanna kin he ohinniyan owotanna kta, qa tuwe ecedan kin he ohinniyan ecedan un nunwe.

¹² Unkan iho, kohanna wau kta, qa taku mitawa kin hduha waun, otoiyohi iye wicoḣan kin eciyatanhan wicawaqu kta.

¹³ Alpha qa Omega, tokapa qa hakakta, otokahe qa owihanke kin he miye ce.

¹⁴ Tona tawoahope kin ecen econpi kin hena wicayawaśtepi, hecen wiconi can kin en ya okihipi kta, qa tiyopa kin ohna otonwe kin timahen yapi kta.

¹⁵ Tuka śunka, qa tona wapiyapi sa, qa wiinaḣmanpi sa, qa wawiciḣaḣapi econpi sa, qa wakagapi ohodapi sa, qa tuwe itonśni waśtedake c̣a econ kin hena tankan yakonpi ece.

¹⁶ Jesus he miye ce, okodakiciye kin ekta niyepi kin en hena oniciyakapi kta e heon ohnihde mitawa kin u waśi. Dawid can hutkan adetka ko he miye, qa anpao wicanḣpi nina iyege cin.

¹⁷ Unkan Woniya kin tawicuyapi kin kici, Kuwa, eyapi. Qa tuwe naḣon kinhan he, Kuwa, eye kta. Qa tuwe ipuza kinhan, he u kta. Qa tuwe cin kinhan he iyunwin codan wiconi mini kin etanhan icu nunwe.

¹⁸ Tona wowapi kin de wowiyukcan oie kin naḣonpi kin hena kaken ewicawakiya; Tuwe wicoie kin dena en taku sanpa kage cinhan, he wicokakije wowapi kin de en cajeyatapi kin Wakantanka qu kta:

¹⁹ Qa tuwe wowiyukcan wowapi oie kin dena yuaoptetu kinhan, he taku tawa kte cin wiconi wowapi kin etanhan Wakantanka icu kta, qa otonwe wakan kin etanhan, qa taku tona wowapi kin de en kagapi kin he etanhan.

²⁰ Tuwe hena yaotanin kin he kaken eya, Iho, kohanna wau kta ce. Amen. Itancan Jesus hecen yau nunwe.

²¹ Jesus Messiya Itancan unkitawapi kin he towaonśida kin niyepi owasin en nicipi un kta. Amen. JESUS ITANCAN KIN YATANPI NUNWE.