Wayuotanin 21 - Dakota Wowapi Wakan Kin

¹ Hehan maḣpiya teca qa maka teca wan wanmdaka. Maḣpiya tokaheya qa maka tokaheya kin hena yutokan iyeyapi, qa miniwanca wanica.

² Unkan Johannes he miye e otonwe wakan kin wamdaka, Jerusalem teca kin hee maḣpiya kin etanhan, Wakantanka eciyatanhan kun u, winoḣinca wan wicaśta hihna ton kte cin on wiyeya un kin he iyececa.

³ Unkan maḣpiya kin eciyatanhan wicaho wan tanka nawaḣon, kaken eya, Wanyaka wo, Wakantanka wakeya tawa kin wicaśta kin ehna han, qa iye hena om ti kta, qa hena e oyate tawawicaye kta, qa Wakantanka ḣince cin hena om un kta, qa Wakantanka tawapi kta.

⁴ Qa wiciśta kin etanhan Wakantanka iśtamnihanpe owasin wicakipakinte kta, qa hetanhan wiconṭe wanice kta, wicocante śica, wicaceya, wicokakije ko wanice kta, taku tokaheya un kin wanna henakeca.

⁵ Unkan tuwe oiyotanke kin akan kiyotanke cin he, Ito taku owasin teca wakaga ce, eya. Hehan, Wowapi ecen kaga wo, hena oie kin wicake c̣a owotanna, emakiya.

⁶ Qa ake kaken emakiya, Wanna henakeca. Alpha qa Omega, otokahe qa owihanke kin he miye ce. Tuwe ipuza kinhan he wiconi mini ḣdoka kin etanhan iyunwin codan yatke wakiye kta.

⁷ Tuwe ohiye cinhan he taku owasin tawaye kta, qa iye Wakantanka maye kta, qa miś he cinkśiwaye kta.

⁸ Tuka tona wikopapi, qa wicadapi śni, qa waḣtepi śni, qa kin wicaktepi, qa wawiciḣaḣapi econpi sa, qa wapiyapi, qa wakagapi ohodapi sa, qa oitonpiśni kin hena owasin mde wan peta qa inyan zi on itkonyahe cin he ohna taku tawapi kta, wiconṭe inonpa kin hee.

⁹ Hehan maḣpiya ohnihde śakowin wiyatke śakowin wicokakije ehake śakowin kin on ojudan yuhapi qon hena etanhan wanji hi, qa omakiye c̣a heya, U wo, winoḣinca wan Amnos kin tawicuye kte cin he cicipazo kta ce.

¹⁰ Unkan Woniya kin on paha wan tanka tehan wankantuya kin ekta amaye c̣a, otonwe tanka kin, Jerusalem wakan, maḣpiya kin etanhan Wankantanka eciyatanhan kutkiya u kin he makipazo;

¹¹ Wakantanka wowitan tawa kin yuha, qa wiyatpa kin he inyan teḣika iyececa, inyan wan acaḣśdaya iyececa:

¹² Qa ihdukśan aconkaśkapi tanka qa tehan wankantu kin, qa tiyopa ake nonpa yukan, qa tiyopa kin hena en maḣpiya ohnihde ake nonpa yukanpi, qa akan wicacaje owapi, Israel cincapi wicoun ake nonpa kin hena eepi.

¹³ Wiyohiyanpa tanhan tiyopa yamni; qa waziyapa tanhan tiyopa yamni; qa itokaga tanhan tiyopa yamni; qa wiyoḣpeya tanhan tiyopa yamni.

¹⁴ Qa otonwe conkaśke kin taku akan he cin hena ake nonpa, qa Amnos kin yewicaśi ake nonpa cajepi kin hena en un.

¹⁵ Unkan tuwe omakiye cin he mazaskazi cedihu wan yuha, on otonwe, qa tiyopa kin, conkaśke ko iyute kta.

¹⁶ Otonwe kin oise tom yukan, qa ohdakinyan kin ohanske cin kici akidehankeca. Unkan cedihu kin on otonwe kin iyuta, wiyutapi kektopawinge ake nom; ohdakinyan ohanske cin obosdatu ko akidecen han.

¹⁷ Qa conkaśke kin he iyuta, wiciśpa opawinge sanpa wikcemna topa sam topa, wicaśta ihduta, maḣpiya ohnihde ihdute cin hee.

¹⁸ Conkaśke kin he iyaspis inyan teḣika on kagapi, qa otonwe kin he mazaskazi ecedan, janjan ecedan iyececa.

¹⁹ Qa otonwe conkaśke kin taku akan he cin he inyan teḣika ocaje owasin en un. Taku akan he cin tokaheya kin he iyaspis; inonpa kin he saphiros; iyamni kin he kalkedon; itopa kin he smaragdos;

²⁰ Qa izaptan kin he sardonis; iśakpe kin he sardius; iśakowin kin he krusolitos; iśahdogan kin he berulos; inapcinwanka kin he topaz; iwikcemna kin he krusophrasos; iakewanji kin he huakinthos; qa iakenonpa kin he amathustos.

²¹ Tiyopa ake nonpa kin hena inyan teḣika ocaje ake nom, tiyopa otoiyohi inyan teḣika wanjidan; qa otonwe ocanku kin he mazaskazi ecedan janjan kin iyecen wiyatpa.

²² Qa he en tipi wakan wanica; Itancan Wakantanka Iyotan Weśake cin, qa Amnos kin hena tipi wakan kin eepi.

²³ Qa otonwe kin he anpetu wi, hanyetu wi ko en iyoyanpapi kta cinpi śni; Wakantanka wowitan tawa kin iyoyanpa, qa Amnos kin he petijanjan kin hee.

²⁴ Qa oyate kin tona ni wicayapi kin hena iyoyanpa kin he en manipi kta; qa wicaśtayatapi maka akan unpi kin hena wowitan qa wootanin tawapi kin en ahipi kta.

²⁵ Qa tiyopa kin hena anpetu icunhan ecen iyeyapi kte śni; qa heciya hanyetu wanica.

²⁶ Oyate hiyeye cin wowitan, qa wootanin kin en ahipi kta.

²⁷ Qa taku wiśamye aśamye cin he en i kte śni, qa taku śicaya econ, qa itonśni kin; tuka tona cajepi kin wiconi wowapi Amnos tawa kin en owicawapi kin henanapidan.