Wayuotanin 20 - Dakota Wowapi Wakan Kin

¹ Hehan maḣpiya ohnihde wan maḣpiya kin eciyatanhan kun u wanmdaka, he wośbe ceteta wanica tiyopa iyuḣdoke kin yuhe c̣a, nape ohna maza icicaḣiḣa wan tanka:

² Qa he wamduśka kin iyaḣpaya, sinteḣda wanakaja tanhan un kin, Wakanśica qa Satan hee, qa kaśka ehnaka, waniyetu kektopawinge hehanyan;

³ Qa wośbe ceteta wanica he en eḣpeye c̣a onataka, qa ipuspe wan on apuspa, hecen oyate kin wicahnaye kte śni, waniyetu kektopawinge kin ihuniyanpi śni kin hehanyan. Unkan he iyohakam ptenyedan kiyuśkapi kta.

⁴ Unkan oiyotanke kin heca wanmdaka, qa tona akan iyotankapi kin hena woyaco yuhapi. Unkan tona Jesus oyakapi kin on, qa Wakantanka oie kin on pa bawicaksapi qon, wamanica kin wakagapi ko ohodapi śni, qa wowapetogton tawa kin itepi, qa napepi kin en yuhapi śni, hena nagipi kin wanwicamdaka, ake kinipi qa Messiya kin kici ounyanpi, waniyetu kektopawinge hehanyan.

⁵ Tuka wicaṭe cin unmanpi kin ake kinipi śni, waniyetu kektopawinge kin henakeca śni kin hehanyan. Piya iwicacage tokaheya kin hee.

⁶ Tuwe piya iwicacage tokaheya kin en ope cinhan he yawaśtepi qa owotanna un. Hena wiconṭe inonpa kin iyowicahi kte śni, tuka Wakantanka qa Messiya kin ekta wawayuśnapi kin heca wicayawapi kta, qa kici ounyanpi kta, waniyetu kektopawinge hehanyan.

⁷ Unkan waniyetu kektopawinge kin henakeca kinhan, Satan wicakaśka tipi kin etanhan kiyuśkapi kta.

⁸ Qa oyate kin wicahnaye kta e makata tate ouye topa kin ektakiya ye kta, qa Gog Magog kici zuya u wicaśi kta; hena miniwanca wiyaka sukaza kin iyecen wicota.

⁹ Unkan maka ohdakinyan ohna yapi, qa wicaśta owotanna ewanke cin ihdukśan hinajinpi, qa otonwe wakan kin nakun. Ukan maḣpiya kin etanhan Wakantanka eciyatanhan peta hiyu, qa ḣuḣnaḣwicaya.

¹⁰ Unkan Wakanśica, hena wicahnaye cin he peta qa inyanzi mde kin en iyoḣpeyapi, heciya wamanica qa woitonśni wokcan kin unpi, qa anpetu hanyetu ko owihanke wanin kakijapi kta.

¹¹ Hehan oiyotanke ska tanka wan wanmdaka, qa tuwe akan iyotanke cin he ite kin etanhan maka maḣpiya ko najicapi; qa tukten wanke kte cin iyeyapi śni.

¹² Qa wicaṭe ciqon, cistinpidan tankinkinyanpi ko, hena Wakantanka itokam najinpi, wanmdaka. Unkan wowapi kin yumdayapi; qa wowapi tokeca wan yumdayapi, wiconi wowapi kin hee: Qa wicaṭe ciqon token wowapi kin en kagapi kin he iyecen wicayacopi, iye wicoḣan kin eciyatanhan.

¹³ Unkan miniwanca kin wicaṭe cin tona en un kin hena hiyuwicaya, qa wiconṭe Hades ko wicaṭe cin tona en unpi kin hena hiyuwicayapi. Qa iye wicoḣan kin eciyatanhan otoiyohi wicayacopi.

¹⁴ Unkan wiconṭe qa. Hades kin hena peta mde kin en iyoḣpewicayapi. Wiconṭe inonpa kin hee.

¹⁵ Unkan tuwe wiconi wowapi kin en owapi iyeyapi śni kin he peta mde kin en iyoḣpeyapi ece.