Wayuotanin 2 - Dakota Wowapi Wakan Kin

¹ Ephesos ekta okodakiciye ohnihde yuhapi kin he ecen wowapi kicaga wo; Tuwe wicanḣpi śakowin nape etapa kin ohna hduhe c̣a, mazaskazi petijanjan ihupa śakowin cokaya omani kin he hecen eya;

² Nioḣan, qa nitoḣtani, qa wacinnitanka kin he sdonwaya; qa tona śicapi kin hena iyowinwicakiya oyakihi śni; qa tona yewicaśipi kin hecapi keic̣iyapi kin hena wicadukcan qa itonpiśni kin heca iyewicayaya.

³ Wacinnitanka, qa ayape, qa micaje kin on ḣtayani, qa oyakiṭe śni.

⁴ Tuka taku cistinna iyacionpa, tokaheya waśteyadake cin he aduśtan.

⁵ Heon tokiya tanhan nihinḣpaye cin he kiksuye, c̣a ihduecetu, qa nioḣan tokaheya kin hduśtan wo. Hecanon śni kinhan kohanna ekta ciu, qa petijanjan nitawa kin yutokan iyeciciye kta, nihduecetu śni kinhan.

⁶ Tuka he duha, Nikoleton wicoḣan kin śiceyadake cin, hena miś eya śicewadaka.

⁷ Tuwe noge yukan hecinhan, taku Woniya kin okodakiciye kin ewicakiye cin he naḣon kta. Tuwe ohiye cinhan he can wiconi, Wakantanka tamaga cokaya he cin, hetanhan yun wakiye kta.

⁸ Unkan Smurna ekta okodakiciye ohnihde yuhapi kin he ecen wowapi kicaga wo; Tuwe tokaheya qa ehake un kin, ṭe c̣a ake kini kin hee hecen eya;

⁹ Nioḣan kin sdonwaya, wokakije wowaḣpanica ko nitawa kin, (tuka winijica;) qa tona Juda wicaśta keic̣iyapi qa hecapi śni, tuka Satan omniciye tawa kin etanhanpi, hena waaiapi kin nakun sdonwaya.

¹⁰ Token nicakije kte cin ihnuhan taku koyakipe cin. Iho, Wakanśica niyepi wanjikji wicakaśka tipi kin en iyeniyanpi kta, iniyukcanpi kta e heon; unkan anpetu wikcemna hehanyan wokakije duhapi kta; tuka wicaṭe cin hehanyan wicaka wo, kinhan wiconi wateśdake wan cic̣u kta.

¹¹ Tuwe noge yukan hecinhan, taku Woniya kin okodakiciye kin ewicakiye cin he naḣon kta. Tuwe ohiye cinhan he wiconṭe icinonpa kin on kiuniyanpi kte śni.

¹² Unkan Pergamos ekta okodakiciye ohnihde yuhapi kin he ecen wowapi kicaga wo; Tuwe maza sagye anog ope kin hduhe cin hee hecen eya;

¹³ Nioḣan kin sdonwaya, qa tukten Satan oiyotanke tawa yanke cin hen yati; qa micaje in yuha yaun, qa wacinmayanpi kin aduśtan śni, anpetu kin Antipas waayatanin wicaka mitawa kin niyepi kin en, tukten Satan ti kin, hen ktepi qon he ehan.

¹⁴ Tuka taku wanjikjidan iyacionpa; Balaam hee Balak Israel cinca kin taku on waḣtani ic̣iyapi kte cin wicitokam ehde kin he onapekiye c̣a, taku wakagapi wakiyuśnapi kin yutapi, qa wiinaḣmanpi econpi kta, he tawoonspe tona yuhapi kin hena wicaduha;

¹⁵ Qa nakun Nikoleton tawoonspe yuhapi kin hena wicaduha, he śicewadaka tuka.

¹⁶ Ihduecetu wo; hecanon śni kinhan kohanna ekta ciu, qa mii maza sagye kin on hena kici wecize kta.

¹⁷ Tuwe noge yukan hecinhan, taku Woniya kin okodakiciye kin ewicakiye cin he naḣon kta. Tuwe ohiye cinhan he manna kihnakapi qon he etanhan yunwakiye c̣a inyan ska wan waqu kta, inyan kin he en wicacaje teca wan kagapi kin he tuwedan sdonye śni, tuka tuwe icu kte cin hecedan.

¹⁸ Unkan Thuatira ekta okodakiciye ohnihde yuhapi kin he ecen wowapi kicaga wo; Wakantanka Cinhintku, iśta peta ide kin iyecen hduhe c̣a, siha kin mazazi ecedan iyececa hee hecen eya;

¹⁹ Nioḣan kin sdonwaya, wacanyakiye, c̣a ḣtayani, qa wicayada, qa ayape, qa nioḣan kin, qa ehake kin hena tokaheya kin sam iyeya ota.

²⁰ Tuka taku tonana iyacionpa, winoḣinca wan Jezebel eciyapi, winoḣinca wokcanka keic̣iye cin he mitaokiye kin wicahnaye c̣a, wiinaḣmanpi econpi, qa taku wakagapi wakiyuśnapi kin yutapi kta e onspe wicakiye cin hee iyowinyakiya.

²¹ Unkan he wawiciḣaḣapi econ kin on iyopeic̣iye kta e anpetu waqu, tuka iyopeic̣iye śni.

²² Ito, owinja wan akan ewaonpe kta, qa tona kici wawiciḣaḣapi econpi kin hena nakun, wokakije tanka en; wicoḣan kin on iyopeic̣iyapi śni kinhan.

²³ Qa iye cinca kin wiconṭe on wicawakte kta; qa okodakiciye kin owasin, tuwe wicapakśin wicacante ko iyukcan kin he miye e sdonyapi kta. Qa niyepi kin otoiyohi nioḣanpi kin eciyatanhan cic̣upi kta.

²⁴ Tuka niyepi, qa tona Thuatira ekta woonspe kin he yuhapi śni, qa Satan ośbe tawa eyapi kin sdonye śni yaunpi kin kaken eciciyapi; Waqinpi tokeca acihnakapi kte śni;

²⁵ Tuka taku duhapi kin he ṭinsa hduha po, hibu kte cin hehanyan.

²⁶ Qa tuwe ohiye c̣a owihanke kin iyahdeya mioḣan kin yuha un kinhan, oyate kin en wowaśake waqu kta.

²⁷ Qa maza icapsinte wan on wicayuhe c̣a maka wakśica iyecen wicakamdece kta ce; hecen Ate etanhan hduha waun.

²⁸ Qa anpao wicanḣpi kin he waqu kta.

²⁹ Tuwe noge yukan hecinhan taku Woniya kin okodakiciye kin ewicakiye cin he naḣon kta.