Wayuotanin 19 - Dakota Wowapi Wakan Kin

¹ Unkan hena iyohakam maḣpiya kin ekta wicota hotankakiya hotaninpi nawaḣon, kaken eyapi, Jehowa yatan po, niwicaye c̣a, wowitan, qa wootanin, qa wowaśake, Itancan Wakantanka unkitawapi kin he tawa nunwe.

² Wayaco kin owotanna qa Wicaka; witkowin tanka, wawiciḣaḣapi econ kin on maka kin yuśice cin he yaco, qa taokiye kin hena we kin he nape kin en tokic̣on.

³ Hehan inonpa heyapi, Jehowa yatan po. Unkan he śota kin owihanke wanin wankantkiya iyaya.

⁴ Hehan hunkawicayapi wikcemna nonpa sanpa topa, qa taku ni un topa kin hena makata eḣpeic̣iyapi, qa Wakantanka oiyotanke kin akan kiyotanke cin he ohodapi, qa heyapi, Amen, Jehowa yatan po.

⁵ Hehan oiyotanke kin etanhan wicaho wan taninyan heya, Taokiye niyanpi kin owasin, qa tona cekiyapi ece, cistinpidan tankinkinyanpi ko, Wakantanka nitawapi kin yatan po.

⁶ Unkan nawaḣon, wicota hotaninpi kin iyececa, qa mini ota iḣaḣa kin iyececa, qa wakinyan tanka hotonpi kin iyececa, kaken eyapi, Jehowa yatan po; Itancan Wakantanka Iyotan Waśake cin he Wicaśtayatapi un.

⁷ Heon etanhan piundapi, qa unkiyuśkinpi kta, qa wowitan unqupi kta; Amnos kin tohan tawicu ton kte cin wanna iyehantu, qa winoḣinca kin taku owasin wiyeya ekihnaka.

⁸ Unkan he miniḣuha ska wiyatpa kin heca koyake kta e qupi; miniḣuha ska kin he tona waśte woowotanna yuhapi kin hee.

⁹ Hehan hacen emakiya, Kaken wowapi kaga wo, Tona Amnos kin winoḣinca yuze kta omniciye kin en wicakicopi kin hena wicayawaśtepi ce. Hehan ake hecen emakiya, Wakantanka oie wicake cin hena ee.

¹⁰ Unkan hehan he siha hdepi kin en makata eḣpemic̣iye c̣a ohowada kta; tuka iye hemakiya, Ihnuhan hecanon kin, miś cici ookiye waun, qa nihunkawanji Jesus yaotanin yuhapi kin hemaca; Wakantanka ohoda wo. Jesus yaotanin kin he wokcanpi woniya kin hee.

¹¹ Unkan maḣpiya kin yuzamnipi e wanmdaka, qa ito śuktanka ska wan, qa tuwe akan iyotanke cin he Wicake c̣a Owotanna eciyapi, he owotanna wicayaco qa ozuye econ ece.

¹² Iśta kin peta ide kin iyececa, qa pa kin akan wateśdake ota yukan; qa caje kin owapi, tuka he tuwedan sdonye śni, iye iśnana sdonkiya.

¹³ Qa wokoyake we en oputkanpi kin heca koyaka: Qa Wakantanka Oie kin eciyapi.

¹⁴ Unkan maḣpiya wicobe kin owasin he ihakam yapi, śuktanka ska akan iyotankapi qa miniḣuha waśte, ska, qa wakaśote śni kin heca koyakapi.

¹⁵ Qa iye i kin etanhan maza sagye anog ope kin hiyu, heon oyate kin awicape kta, qa maza icapsinte wan on wicayuhe kta; qa Wakantanka Iyotan Waśake cin he wocantiyahde ohitike cin miniśa iyuśkice kin he naśkica.

¹⁶ Qa onḣoḣda ceca sani ko akan cajo kin owapi, Wicaśtayatapi kin en Wicaśtayatapi, qa itancanpi kin Itancan kin he dee.

¹⁷ Hehan maḣpiya ohnihde wan anpetu wi kin en najin kin he wanmdaka; he hotankakiya hotanin, qa taku kinyanpi kin owasin, okotonyan kin en kinyan unpi kin hena hewicakiya; Upi qa Wakantanka he wotapi tanka tawa kin en mniciya po;

¹⁸ Wicaśtayatapi ceḣpi kin yatapi kta, qa wicaśta itancanpi ceḣpi kin, qa tona waśakśakapi ceḣpi kin he, qa śuktanka ceḣpi, qa tona akan iyotankapi kin, wicaceḣpi ocaje owasin, wowidake unpi, qa ihduhapi kin, cistinpidan tankinkinyanpi koya.

¹⁹ Unkan wamanica kin wanmdaka, qa wicaśtayatapi maka akan unpi kin akicita wicayuhapi ko witaya mniciyapi, qa tuwe śuktanka akan iyotanke cin akicita wicayuhe cin ko, kici kicizapi kte cin heon.

²⁰ Hehan wamanica kin he niyake yuzapi, qa woitonśni wokcan kin he nakun, he wamanica kin itokam wowapetokeca econ, qa on tona wamanica wowapetogton tawa yuhapi, qa iyacinpi kin ohodapi kin hena wicahnaye cin hee. Unkan hena napin niyake peta mde wan inyan zi on itkonyahe cin he en iyoḣpewicayapi.

²¹ Unkan unmanpi kin owasin tuwe śuktanka akan iyotanke cin he maza sagye tawa kin on wicaktepi, maza sagye he i kin etanhan hiyu qon hee on. Unkan hena ceḣpi kin on taku kinyan un kin owasin imnanpi.