Wayuotanin 18 - Dakota Wowapi Wakan Kin

¹ Unkan hena taku kin iyohakam maḣpiya ohnihde wan maḣpiya kin eciyatanhan kutkiya u wanmdaka, wicowaśake tanka yuha; qa he towitan kin on maka kin iyoyanpa.

² Unkan he waśagya hotankakiya hotanin, qa heya, Hinḣpaya ce, Babulon tanka kin he hinḣpaya; qa taku wakan śicapi en ounyanpi, qa wanagi aśape cin owasin he otipi, qa zitkadan śice cin śicedapi kin owasin he hoḣpi yapi ce.

³ Wawiciḣaḣapi wocantiyahde miniśa tawa kin hetanhan oyate hiyeye cin owasin yatkanpi; qa he kici wicaśtayatapi maka akan unpi kin wawiciḣaḣapi econpi, qa taku teḣika ota yuhe cin on wopeton maka akan unpi kin wijinic̣iyapi ce.

⁴ Hehan maḣpiya eciyatanhan wicaho wan tokeca nawaḣon, kaken eya, Mitaoyate kin tankata inanpa po, hecen woaḣtani tawa kin ehna yaunpi kte śni, qa wicokakije tawa kin en oyapapi kte śni.

⁵ He waḣtani kin maḣpiya kin ekta iyahdeya, qa taku śica econ kin hena Wakantanka kiksuya un.

⁶ Token ecaniconpi qon he iyecen ecakicon po, qa iye oḣan kin etanhan nonpa akihde kicu po, wiyatke ojudan ye cin he ohna nonpa akihde okicicaśtan po.

⁷ Token waḣanic̣ida qa takudan icakije śni un qon he iyecen wicokakije, qa iyokiśicapi kin qu po. Iye cante kin ekta kaken eya; Wicaśtayatapi winoḣinca heca iyotankehan waun, qa wiwazica hemaca śni, qa iyokiśicapi kin icimana wanmdake kte śni ce.

⁸ Heon etanhan anpetu wanjidan en wicokakije tawa kin hiyahde kta, wiconṭe, qa iyokiśicapi, qa wicaakiḣan, qa ocowasin peta on ḣuḣnage kta; tuwe yaco kin Itancan kin Wakantanka hee waśaka ce, heon etanhan.

⁹ Unkan wicaśtayatapi maka ohnaka kin kici wawiciḣaḣapi econpi, qa takudan icakije śni unpi kin hena he aceyapi kta, qa nihinciyapi kta, he ḣuḣnage cin śota kin wanyakapi kinhan;

¹⁰ Wicokakije kin ikopapi kin on itehanyan inajinpi, qa heyapi eta, Hehehe, hehehe, Babulon otonwe tanka kin, otonwe waśake cin, ihnuhanna niyacopi kin anihinḣpaya ce.

¹¹ Qa heon wopeton maka akan unpi kin nihinciyapi, qa ceyapi kta, hetanhan maza tawapi kin tuwedan opewicakicaton kte śni:

¹² Maza kin he mazaskazi, qa mazaska, qa inyan teḣika, qa oinpidan, qa miniḣuha waśte, qa śina to, qa miniḣuha zipzipedan, qa śina śa, qa can waśtemna ocaje owasin, qa huhu wakśica owasin, qa can teḣika, qa mazazi, qa mazasapa, qa inyan ska wakśica;

¹³ Qa canha śa, qa taku waśtemna, qa pejihuta pa, qa canśin, qa miniśa, qa wihdi, qa aguyapi mdu, qa woteca, qa taḣin wanuyanpi, qa śuktanka, qa canpahmihma, qa wicatancan, wicanagi ko henakiya.

¹⁴ Waskuyeca kin ninagi waśte dake cin he wanna henakeca, qa woyute napin qa taku wicimdeza, hena owasin aniyuśtan, qa hena ake tohinni iyeyaye kte śni.

¹⁵ Unkan wopeton tona taku hececa wiyopeyapi ece, qa on wijinic̣iyapi kin hena iteḣanyan inajinpi kta, he wokakije kin ikopapi, nihinciyapi, qa ceyapi;

¹⁶ Qa heyapi; Hehehe, hehehe, otonwe tanka kin miniḣuha waśte, śa stan, śa ko koyake c̣a, mazaskazi, inyan teḣika oinpidan ko kohdaka; qa ihnuhanna wiwicajica tanka kin he yutakuni śni.

¹⁷ Unkan tona wita wata iyupse yuzapi, qa tona ohna yapi, qa tona watopapi, qa tona miniwanca ohna wopetonpi ece kin hena owasin itehanyan inajinpi;

¹⁸ Qa he ḣuḣnage cin śota kin wanyakapi qehan, hotaninpi qa heyapi; Otonwe kin tukte wanji e otonwe tanka kin he iyececa he.

¹⁹ Qa pa kin akan maka ahdatapi, qa hotaninyan nihinciyapi, qa ceyapi, qa heyapi; Hehehe, hehehe, otonwe tanka kin he eciyatanhan tona miniwanca kin ohna wita wata yuhapi kin hena owasin watonpika, taku teḣika opeton qon heon, he ihnuhanna ḣewoskan kagapi ce.

²⁰ Heon, maḣpiya kin, iyuśkin wo, qa ohnihde owotanna yaunpi, qa wokcanpi kin nakun, niyepi kin on Wakantanka tokic̣on kin he etanhan.

²¹ Hehan maḣpiya ohnihde waśake ḣinca wan, inyan wan, inyan wiyutpan tanka iyececa, he icu, qa miniwanca kin en eḣpeye c̣a heya, Hecen wowaśake on Babulon otonwe tanka kin jujuwahan eḣpeyapi kta, qa tohinni iyeyapi kte śni ce.

²² Unkan niye kin en candowankiyapi sa, qa dowanpi sa, qa cotanka yajopi sa, qa maza yahotonpi sa wicaho kin tohinni naḣonpi kte śni; qa taku kage sa, ocaje owasin, niye kin en iyeyapi kte śni, qa wiyutpan ḣmun kin niye en hetanhan tohinni naḣonpi kte śni.

²³ Qa petijanjan ojanjan kin icimana iyoyamniye kte śni, qa niye en hihnayanpi qa tawicuyapi wicaho kin tohinni naḣonpi kte śni. Wicaśta wopeton nitawa kin hena maka akan wicaśta itancanpi kin hecapi; qa wicayaḣmunge cin on oyate kin owasin wicayahnayan.

²⁴ Unkan he ohna wicaśta wokcan wicaśta owotanna ko we kin iyeyapi, qa tona maka akan ktepi kin hena nakun.