Wayuotanin 16 - Dakota Wowapi Wakan Kin

¹ Unkan tipi wakan kin etanhan wicaho wan tanka nawaḣon, maḣpiya ohnihde śakowinpi qon hewicakiya, Yapi, qa wiyatke Wakantanka wocantiyahde tawa kin hena maka kin en akaśtan po, eya.

² Hehan maḣpiya ohnihde tokaheya kin u, qa wiyatke tawa kin maka kin en akaśtan. Unkan wicaśta tona wamanica wowapetogton tawa kin yuhapi, qa iyacinpi kin ohodapi kin hena en śiyaka o tanka qa śica awicahinḣpaya.

³ Unkan maḣpiya ohnihde icinonpa kin wiyatke tawa kin miniwanca kin en akaśtan; unkan he we icaga, wicaṭe cin we kin iyececa, qa miniwanca kin en taku niyake un kin owasin ṭapi.

⁴ Unkan maḣpiya ohnihde iciyamni kin wiyatke tawa kin wakpa qa wakoniya kin hena en akaśtan; unkan hena we icaga.

⁵ Hehan maḣpiya ohnihde wan mini kin yuhe cin he kaken eya, nawaḣon; Itancan, tuwe un, qa un qon, u kte cin he niye, oniowotanna, hecen wicadaco:

⁶ Wicaśta owotanna, qa wokcanpi kin hena we kin wicakipapsonpi; qa hecen we yatke wicayakiya, he iyekicihantupi nakaeś.

⁷ Unkan wanji tokeca wahna wośnapi kin eciyatanhan kaken eya, nawaḣon; Itancan, Wakantanka Iyotan waśaka, wadaco kin he ohinniyan owotanna qa wicaka ce.

⁸ Hehan maḣpiya ohnihde icitopa kin wiyatke tawa kin anpetu wi kin en akaśtan. Unkan he wicaśta kin peta on wicagu kta e qupi.

⁹ Qa iyokatapi tanka kin wicaśta wicagu, qa hecen Wakantanka wicokakije hena yuhe cin he caje kin ośtehdapi, qa wowitan qupi kta on ihduecetupi śni.

¹⁰ Unkan maḣpiya ohnihde icizaptan kin wiyatke tawa kin wamanica oyanke tawa kin en akaśtan; unkan wokiconze tawa kin otpaza ojudan, qa wayazanpi on cejipi kin hdaḣtaḣtakapi.

¹¹ Qa wicokakije qa śiyaka o kin on etanhan maḣpiya Wakantanka kin yaśicapi, qa iye oḣanpi kin on iyopeic̣iyapi śni.

¹² Unkan maḣpiya ohnihde iciśakpe kin wiyatke tawa wakpa tanka kin Yuphrate, he en akaśtan; unkan mini kin puza aya, hecen wicaśtayatapi wiyohiyanpa tanhan au kin canku kin wicakiciyumdayapi kta.

¹³ Unkan wamduśka i kin etanhan, qa wamanica i kin etanhan, qa woitonśni wokcan kin he i kin etanhan, taku wakan śica yamni, hnaśka iyececa, hena hiyu wanmdaka.

¹⁴ Hena taku wakan śica taniyapi kin hecapi, wowapetokeca econpi, qa maka sitomniyan wicaśtayatapi kin, qa wicoicage ocowasin ekta yapi, Wakantanka Iyotan waśake cin anpetu tawa tanka kin en zuya awicaupi kta e heon.

¹⁵ Iho, wamanon sa wan iyecen wau ce. Tuwe kiktahan un, qa wokoyake kpatan kin he yawaśtepi ece, hecen tancodan mani kte śni, qa wiśtece cin wanyakapi kte śni.

¹⁶ Unkan Hebrew iapi kin eciyatanhan tukten Armagedon eciyapi, hen witaya u wicaya.

¹⁷ Hehan maḣpiya ohnihde iciśakowin kin wiyatke tawa kin okaduze cin en akaśtan. Unkan maḣpiya kin ekta tipi wakan kin etanhan, qa oiyotanke kin etanhan, wicaho tanka wan tanin, qa heya, Wanna henakeca.

¹⁸ Unkan iho wicaho taninpi, qa wakinyan hotonpi, qa wakanhdi tanin, qa maka śkanśkan wan tanka, wicaśta kin maka akan iwicacage cin ehantanhan maka śkanśkan iyecen tanka wanica.

¹⁹ Qa otonwe tanka kin he yamni kiyuśpapi; qa otonwe Ikcewicaśta tawapi kin hena hinḣpayapi. Qa Babulon tanka kin he Wakantanka itokam kiksuyapi, wocanniye ohitike cin miniśa wiyatke kin qu kta heon.

²⁰ Unkan wita kin owasin najica, qa ḣe kin hena tuktedan iyeyapi śni.

²¹ Unkan maḣpiya kin eciyatanhan wasu tanka wicaśta kin awicahinhe, otoiyohi taku tke utapi opawinge wanjidan inskokeca. Unkan wasu wicokakije kin on wicaśta kin Wakantanka yaśicapi ece, he wokakije iyotan tanka kin heon.