Wayuotanin 15 - Dakota Wowapi Wakan Kin

¹ Unkan maḣpiya kin ekta wowapetokeca tanka, qa wowinihan wanmdaka; maḣpiya ohnihde śakowin wicokakije śakowin ehake kin yuhapi, hena en Wakantanka wocantiyahde tawa kin henakeca kta.

² Unkan mde wan janjan peta kici icicahiyapi seca wanmdaka, qa tona ohiya, wamanica qon, iye iyacinpi kin qa wowapetogton kin, qa tona caje iyawapi kin, ohiye ciqon hena janjan mde kin akan najinpi, qa Wakantanka candowankiyapi tawa kin heca yuhapi.

³ Qa Moses Wakantanka taokiye tadowan, qa Amnos kin tadowan kin ahiyayapi, qa heyapi, Itancan, Wakantanka Iyotan waśake cin nioḣan kin tanka, qa wowinihan, tona owotanna un kin en Wicaśtayatapi kin he niye ce, nitacanku kin owotanna qa wicaka.

⁴ Itancan, tuwe konicipe kte śni, qa nicaje kin inidowan kte śni he; niśnana oniowotanna; qa oyate hiyeye cin owasin upi, qa nitokam canpeśka makehde enajin kta; woyaco nitawa kin wanna tanin kin heon etanhan.

⁵ Unkan he iyohakam wanmdake c̣a, iho, maḣpiya kin ekta waayataninpi wakeya wakan kin he yuzamni han.

⁶ Qa maḣpiya ohnihde śakowin wicokakije śakowin yuhapi kin hena tipi wakan kin etanhan inanpapi, miniḣuha ska wiyatpa kin heca koyakapi, qa mazaskazi on maku opta ihduskitapi.

⁷ Unkan taku ni un topa kin wanji maḣpiya ohnihde śakowin kin mazaskazi wiyatke kin heca śakowin wicaqu; hena Wakantanka ohinniyan ni un wocantiyahde tawa kin on ojudan.

⁸ Unkan Wakantanka towitan, qa towaśake kin eciyatanhan tipi wakan kin śota ojudan. Qa tipi wakan kin tuwedan timahen ye kta okihi śni, wicokakije śakowin maḣpiya ohnihde śakowin yuhapi kin henakeca kte śni hehanyan.